 "ସଟଡାଉନରେ ବନ୍ଦ ରହିବ ମାଟ୍ରିକ ଖାତା ଦେଖା")
ଶାନ୍ତସ୍ୱରୂପ ରାଉତ, ଭୁବନେଶ୍ୱର: ସଟ୍ ଡାଉନ୍ ଜିଲ୍ଲାରେ ହେବନି ମାଟ୍ରିକ ମୂଲ୍ୟାୟନ । ରାଜ୍ୟ ସରକାର ସାପ୍ତାହିକ ଦୁଇ ଦିନ ପାଇଁ ୧୧ ଜିଲ୍ଲାରେ ସଟ୍ ଡାଉନ୍ ଘୋଷଣା କରିଥିବା ବେଳେ ଏହି ଜିଲ୍ଲାରେ ଜୁନ୍ ଶେଷ ଯାଏଁ ଶନିବାର ଓ ରବିବାର ମାଟ୍ରିକ ମୂଲ୍ୟାୟନ ବନ୍ଦ ରହିବା ନେଇ ନିଷ୍ପତ୍ତି ନିଆଯାଇଛି । ସେପଟେ ପୂର୍ବ ଆଲୋଚନା ମୁତାବକ ରାଜ୍ୟରେ ଚଳିତ ବର୍ଷରୁ ବନ୍ଦ ହେବନି ୨୦ରୁ କମ୍ ଶିକ୍ଷାର୍ଥୀ ଥିବା ବିଦ୍ୟାଳୟ । ତେବେ କୋରୋନା କଟକଣା ଭିତରେ ରାଜ୍ୟର ପ୍ରାଥମିକ ଓ ମାଧ୍ୟମିକ ଶ୍ରେଣୀରେ ନାମଲେଖା ପ୍ରକ୍ରିୟା ଆରମ୍ଭ ହେବାକୁ ବିଦ୍ୟାଳୟ ଓ ଗଣଶିକ୍ଷା ବିଭାଗ ନିଷ୍ପତ୍ତି ନେଇଛି । ଏସବୁ ପ୍ରକ୍ରିୟା କୋଭିଡ ୧୯ ଗାଇଡଲାଇନ ଅନୁପାଳନ କରି ହେବ ବୋଲି ନିର୍ଦ୍ଦେଶ ରହିଛି ।
ସଟ୍ ଡାଉନ ଜିଲ୍ଲାରେ ବନ୍ଦ ରହିବ ଖାତା ଦେଖା । ରାଜ୍ୟର ସଟ୍ ଡାଉନ ଘୋଷିତ ୧୧ ଜିଲ୍ଲାରେ ଦୁଇଦିନ ପାଇଁ ସ୍ଥଗିତ ରହିବ ମୂଲ୍ୟାୟନ । ଗମନାଗମନ ବାଧାପ୍ରାପ୍ତ ହେତୁ ଏସମସ୍ତ ଜିଲ୍ଲାରେ ଖାତା ଦେଖା ବନ୍ଦ ରଖିବାକୁ ନିଷ୍ପତ୍ତି ନିଆଯାଇଥିବା ବିଭାଗୀୟ ମନ୍ତ୍ରୀ କହିଛନ୍ତି । ତେବେ ମୋଟ ୬୦ ଟି କେନ୍ଦ୍ରରେ ଖାତା ଦେଖା ହେଉଥିବା ବେଳେ ୧୧ ଜିଲ୍ଲା ବ୍ୟତୀତ ଅନ୍ୟାନ୍ୟ ସମସ୍ତ ଜିଲ୍ଲାରେ ଖାତା ଦେଖା ପ୍ରକ୍ରିୟା ସ୍ୱାଭାବିକ ରହିବ । ଜୁନ ମାସରେ ଏଭଳି ୮ ଦିନର ସଟ୍ଡାଉନ ରହୁଥିବାରୁ ସମୟକୁ ପୂରଣ କରିବା ପାଇଁ ବିକଳ୍ପ ବ୍ୟବସ୍ଥା କରାଯାଉଥିବା ମାଧ୍ୟମିକ ବୋର୍ଡ ପକ୍ଷରୁ ସୂଚନା ମିଳିଛି ।
ଏହାସହ ୨୦ ରୁ କମ ସଂଖ୍ୟକ ଛାତ୍ର ଛାତ୍ରୀ ଥିବା ବିଦ୍ୟାଳୟ ଗୁଡିକ ବନ୍ଦ ନ ହେବା ସହ ଗତ ବର୍ଷ ନାମଲେଖା ହୋଇଥିବା ବିଦ୍ୟାଳୟ ଗୁଡିକରେ ଚଳିତ ବର୍ଷ ମଧ୍ୟ ନାମଲେଖା ହେବ ବୋଲି ବିଭାଗୀୟ ମନ୍ତ୍ରୀ କହିଛନ୍ତି । ଆସନ୍ତା ସୋମବାର ଠାରୁ ଜୁଲାଇ ୧୫ ମଧ୍ୟରେ ନାମଲେଖା ହେବ ବୋଲି ମନ୍ତ୍ରୀ କହିଛନ୍ତି । ପ୍ରତି କାର୍ଯ୍ୟ ଦିବସରେ ସକାଳ ୭ଟାରୁ ପୂର୍ବାହ୍ନ ୯ଟା ୩୦ ମଧ୍ୟରେ ବିଦ୍ୟାଳୟରେ ନାମଲେଖା ହେବ । ଏକ ସମୟରେ ୫ରୁ ଅଧିକ ଅଭିଭାବକ ଓ ଛାତ୍ରଛାତ୍ରୀ ସ୍କୁଲକୁ ପ୍ରବେଶ କରିବାକୁ ଅନୁମତି ଥିବା ବେଳେ ମାସ୍କ ଓ ସାମାଜିକ ଦୂରତା ବଜାୟ ରଖିବାକୁ ବାଧ୍ୟାତାମୂଳକ କରାଯାଇଛି । ଏହାସହ ଛାତ୍ରଛାତ୍ରୀ ଓ ଅଭିଭାବକ ବିଦ୍ୟାଳୟକୁ ଆସିଲେ କୋଭିଡ୍-୧୯ ଗାଇଡ୍ଲାଇନ୍ ପାଳନ କରିବାକୁ କୁହାଯାଇଛି । ବିଦ୍ୟାଳୟ ରେ ସମସ୍ତ ନିର୍ଦେଶାବଳୀ ଓ ତଥ୍ୟ ନୋଟିସ୍ ବୋର୍ଡରେ ଉଲ୍ଲେଖ ରହିବାକୁ କୁହାଯାଇଥିବା ବେଳେ ହ୍ଟାଟ୍ସଆପ୍ ଗ୍ରୁପରେ ମଧ୍ୟ ଛାତ୍ରଛାତ୍ରୀ ଓ ଅଭିଭାବକଙ୍କୁ ଜଣାଯିବ ।
)