ଠିକ୍ ଶହେ ଦିନ ପୂର୍ବରୁ ଦେଶରେ ଚିହ୍ନଟ ହୋଇଥିଲେ ପ୍ରଥମ କୋରୋନା ଆକ୍ରାନ୍ତ

ନୂଆଦିଲ୍ଲୀ: ଦେଶବାସୀ ଏକଜୁଟ ହୋଇ କୋରୋନା ମୁକାବିଲା କରୁଛନ୍ତି । ଏବେ ଦେଶରେ କୋରୋନା ଆକ୍ରାନ୍ତଙ୍କ ସଂଖ୍ୟା ୬୦ ହଜାର ଛୁଇଁବାକୁ ବସିଲାଣି । ମୃତ୍ୟୁ ସଂଖ୍ୟା ମଧ୍ୟ ପାଖାପାଖି ୨ ହଜାର ହେଲାଣି ।  ହେଲେ ଆପଣ ଜାଣିଛନ୍ତି, ଠିକ୍ ଶହେ ଦିନ ପୂର୍ବରୁ ଦେଶରେ ପ୍ରଥମ କୋରୋନା ଆକ୍ରାନ୍ତ ଚିହ୍ନଟ ହୋଇଥିଲେ । ଅର୍ଥାତ ଶହେ ଦିନ ପୂର୍ବରୁ ଦେଶରେ ଖାତା ଖୋଲିଥିଲା କୋରୋନା । ଏବେ ସଂଖ୍ୟା ୫୯୬୬୨ରେ ପହଞ୍ଚିଛି । 

୩୦ ଜାନୁଆରୀ, ୨୦୨୦ । ଦେଶରେ ଚିହ୍ନଟ ହୋଇଥିଲେ ପ୍ରଥମ କୋରୋନା ଆକ୍ରାନ୍ତ । ଆଉ ଆକ୍ରାନ୍ତ ଜଣକ କେରଳର ଥିଲେ । ଉହାନରୁ ଫେରିଥିବା ଏହି ଛାତ୍ର କୋରୋନା ପଜିଟିଭ ବୋଲି ସ୍ପଷ୍ଟ ହୋଇଥିଲା ।  ପରବର୍ତ୍ତୀ ସମୟରେ କେରଳରୁ ହିଁ ଅନ୍ୟ ଦୁଇଟି ମାମଲା ସାମ୍ନାକୁ ଆସିଥିଲା । ଅର୍ଥାତ ଦେଶର ପ୍ରଥମ ୩ କୋରୋନା ଆକ୍ରାନ୍ତ କେରଳର ହିଁ ଥିଲେ । ହେଲେ ସେହି କେରଳରେ ଏବେ ସକ୍ରିୟ କୋରୋନା ମାମଲା ମାତ୍ର ୧୬ ରହିଛି । ଅର୍ଥାତ ଦେଶରେ ଯେଉଁ ରାଜ୍ୟରୁ ପ୍ରଥମେ କୋରୋନା ଆକ୍ରାନ୍ତ ଚିହ୍ନଟ ହୋଇଥିଲେ, ସେହି ରାଜ୍ୟ ଏହାକୁ ନିୟନ୍ତ୍ରଣ କରିବାରେ ଗୋଟିଏ ପ୍ରକାର ସଫଳ ହୋଇଛି ।