ପୋଲିସ ହାତରେ ଠକ ଶ୍ରୀ ୪୨୦, ଟାର୍ଗେଟରେ ବଡ ବଡିଆ

ସରକାରୀ ଅଧିକାରୀ କହି ଠକିଥିଲେ ଲକ୍ଷାଧିକ ଟଙ୍କା

ସରୋଜ ବେହେରା, ଭୁବନେଶ୍ଵର:  କମିଶନରେଟ ପୋଲିସ ହାତରେ ଲାଗିଛି ଖିଲାଡୀ ଚାର ସୋ ବିସ ।  ନିଜକୁ କେତେ ବେଳେ ସରକାରୀ ଅଧିକାରୀ ତ ଆଉ କେତେ ବେଳେ ଗୁଗଲର ବଡ ଅଧିକାରୀ କହି ଲୋକଙ୍କୁ ଠକୁଥିବା କୁଖ୍ୟାତ ଠକ ସୌମ୍ୟଜିତ ତ୍ରିପାଠୀଙ୍କୁ ଗିରଫ କରିଛି କମିଶନରେଟ ପୋଲିସ । ସହିଦ ନଗର ଥାନାରେ ଅଭିଯୋଗ ପରେ ସ୍ପେଶାଲ ସ୍କାବଡ ବ୍ୟକ୍ତି ଜଣଙ୍କୁ ଗିରଫ କରି ତଦନ୍ତ କରିବା ପରେ ଖୋଲିଛି ଗୋଟାଏ ପରେ ଗୋଟାଏ ଠକେଇର ପରଦା । 

ଦେଖିବାକୁ ସେ ପୁରାପୁରି ଇନୋସେଣ୍ଟ । ଅପରାଧୀ ଭଳି ତାଙ୍କର କୌଣସି ଆଚରଣ ବ୍ୟବହାର ମଧ୍ୟ ନାହିଁ । ଲାଗୁଛି ଯେମିତି କିଏ ତାଙ୍କୁ ଠକି ନେଇଛନ୍ତି ।  ହେଲେ ଆଜ୍ଞା ଯୁବକ ଜଣକଙ୍କ ସାଦାସିଧା ଚେହେରା ପଛରେ ଥିବା ଏକ କୁଖ୍ୟାତ ଠକ ଦିମାଗ କଥା ଶୁଣିଲେ ଆପଣଙ୍କ ମୁଣ୍ଡ ମଧ୍ୟ ଗୁଡୁମ ହୋଇଯିବ । ଯୁବକ ଜଣକ ହେଉଛନ୍ତି ସୌମ୍ୟଜିତ ତ୍ରିପାଠୀ । ପେଶାରେ ଜଣେ ମେକାନିକାଲ ଇନଜିନିୟର । ହେଲେ ସଉକ ହେଉଛି ଲୋକଙ୍କୁ ଠକିବା ।  ଆଉ ଠକେଇ ବି କିଛି ଏଭଳି ସେଭଳି ନୁହଁ  ।  ନିଜକୁ କେତେ ବେଳେ କମରସିଏଲ ଟ୍ୟାକ୍ସ ଅଫିସର ତ ଆଉ କେତେ ବେଳେ ପିଡି ଡିଆରଡିଓ ଭଳି ସରକାରୀ ଅଫିସର କହି ଅନେକ ଦୋକାନରୁ ଠକି ନେଇଛନ୍ତି ଲକ୍ଷାଧିକ ଟଙ୍କାର ମୋବାଇଲ, ଲ୍ୟାପଟପ ଓ ଅନ୍ୟାନ୍ୟ ଇଲେକ୍ଟ୍ରୋନିକ ଗ୍ୟାଜେଟସ୍ଭୁ । ଭୁବନେଶ୍ୱର  ସହିଦନଗରରେ ଥିବା ମୋବାଇଲ ଦୋକାନୀଠାରୁ ୩ ଲକ୍ଷ ଟଙ୍କାର ଆଇଫୋନ ଠକି ନେବା ପରେ ପୋଲିସ ଏହାର ଖୋଳତାଡ ଆରମ୍ଭ କରିଥିଲା । ଆଉ ଯେତେବେଳେ ସୌମ୍ୟଜିତ ଧରା ପଡିଥିଲା ସେତେ ବେଳେ ସୌମ୍ୟଜିତଙ୍କ ଶ୍ରୀ ୪୨୦ ଚେହେରା ପଦାକୁ ଆସିଥିଲା । 

ସୌମ୍ୟଜିତ ନିଜକୁ ବିପିନ ବିହାରୀ ତ୍ରିପାଠୀ ନାଁରେ ସମସ୍ତଙ୍କୁ ପରିଚୟ ଦେଉଥିଲା । ନିଜ ବାପା ନାଁକୁ ସେ ଠକେଇ କରିବାରେ ବେଶ ସିଦ୍ଧହସ୍ତ ହୋଇସାରିଥିଲା । କେବଳ ବ୍ୟବସାୟୀ ନୁହଁନ୍ତି ତାଙ୍କ ଜାଲରେ ଫସିଛନ୍ତି ଅନେକ ସେଲିବ୍ରିଟି ଓ ଖେଳାଳୀ । କରାଟେରେ ଓଡିଶା ପାଇଁ ସୁନାମ ଆଣିଥିବା ଭାଲେନା ଭାଲେଣ୍ଟିନା ମଧ୍ୟ ଠକାମୀ ର ଶିକାର ମଧ୍ୟରୁ ଜଣେ ଥିଲେ । ଚିହ୍ନା ପରିଚୟ ପରେ ପରିବାରରେ ଆର୍ଥିକ ଅବସ୍ଥା ଠିକ ନ ଥିବା କହି ଭାଲେଣ୍ଟିନାଙ୍କ ପରିବାରଠାରୁ ସେ ନେଇଥିଲେ ୩ ଲକ୍ଷ ଟଙ୍କା । ବିଭିନ୍ନ ଇଣ୍ଟର ନ୍ୟାସନାଲ ବ୍ରାଣ୍ଡରେ କାମ କରୁଥିବା କହି ଟଙ୍କା ବଦଳରେ ସେ କେତେ ବେଳେ ଆଇ ଫୋନ ତ ଆଉ କେତେ ବେଳେ ଲ୍ୟାପଟପ ନେବାକୁ ବାଧ୍ୟ କରୁଥିଲେ । ହେଲେ ବିଲ୍ ଦେବା କଥା ପଡିଲା ବେଳକୁ ବାବୁ ଧରା ଛୁଆଁ ଦେଇନଥିଲେ । ଯେତେ ଚେଷ୍ଟା କଲେ ମଧ୍ୟ ସେ ପରେ ଆଉ ଫୋନ ଉଠାଉନଥିବା କହିଛନ୍ତି ଭାଲେନା ଭାଲେଣ୍ଟିନା ।

କେବଳ ଏ  ନୁହଁ ଏମାନଙ୍କ ଭଳି ଅନେକ ଲୋକଙ୍କୁ ଠକି ସେ ଚାଲିଥିଲେ । ବର୍ତ୍ତମାନ ସୁଦ୍ଧା ସହିଦ ନଗର ଥାନାରେ ୩ଟି ମାମଲା ରୁଜୁ ହୋଇସାରିଛି । ଏଭଳି ଠକେଇ ମାମଲାର ସଂଖ୍ୟା ଆହୁରି ଅଧିକ ବଢିବା ସମ୍ଭାବନା ରହିଛି । ଗିରଫ ଅଭିଯୁକ୍ତ ନିଜ ଶିକ୍ଷାଗତ ଯୋଗ୍ୟତା ଓ କଥା କହିବାର ଶାଳିନତାରେ ଯେ କୌଣସି ଲୋକଙ୍କୁ ସରକାରୀ ଅଧିକାରୀ ଭାବେ ପ୍ରାମାଣିତ କରି ଦେଉଥିଲେ । ମୋବାଇଲରେ ଲୋକଙ୍କୁ ସରକାରୀ ଅଧିକାରୀ ବୋଲି ଚିହ୍ନଟ କରିଥିବା ବେଳେ ଚିହ୍ନା ପରିଚିତ ଲୋକଙ୍କୁ ସେ ଗୁଗୁଲର ବଡ ପଦବୀରେ ଥିବା କହୁଥିଲେ ବୋଲି ତଦନ୍ତ ବେଳେ ଜାଣିବାକୁ ପାଇଛି ପୋଲିସ । 

ଗିରଫ ଏହି ଶ୍ରୀ ୪୨୦ଙ୍କ ବାବଦରେ ତଦନ୍ତ କରିବା ବେଳେ ବହୁ ପୂର୍ବରୁ ସେଲ୍ସ ଟ୍ୟାକ୍ସ ଅଧିକାରୀଙ୍କୁ ଅନେକ ଲୋକେ ସୌମ୍ୟଜିତଙ୍କ ବାବଦରେ ପଚରାପଚରୁ କରିଥିବା ଜଣାପଡିଛି । କେବଳ ସହିଦ ନଗର ଥାନାରେ ମାମଲା ରହିଛି ନା ତାଙ୍କର ଏଭଳି ଠକେଇ ଅନ୍ୟ କେଉଁଠି ରହିଛି ସେ ସବୁକୁ ନେଇ ତଦନ୍ତ ଜାରି ରଖିଛି କମିଶନରେଟ ପୋଲିସର ସ୍ପେଶାଲ ସ୍କାବଡ।