close

खास खबरें सिर्फ आपके लिए...हम खासतौर से आपके लिए कुछ चुनिंदा खबरें लाए हैं. इन्हें सीधे अपने मेलबाक्स में प्राप्त करें.

ସର୍ଦ୍ଦାରଙ୍କୁ ଦେଲେନି ଶ୍ରଦ୍ଧାଞ୍ଜଳି, ନିନ୍ଦା କଲେ ଗୁଜୁରାଟ ମୁଖ୍ୟମନ୍ତ୍ରୀ

ଲୌହ ମାନବ ସର୍ଦ୍ଦାର ବଲ୍ଲଭ ଭାଇ ପଟେଲଙ୍କୁ ଜନ୍ମଦିନ ଅବସରରେ ଶ୍ରଦ୍ଧାଞ୍ଜଳି ନଦେବା ନେଇ କଂଗ୍ରେସ ନେତାଙ୍କୁ ସମାଲୋଚନା ।

ସର୍ଦ୍ଦାରଙ୍କୁ ଦେଲେନି ଶ୍ରଦ୍ଧାଞ୍ଜଳି, ନିନ୍ଦା କଲେ ଗୁଜୁରାଟ ମୁଖ୍ୟମନ୍ତ୍ରୀ
ଫାଇଲ ଫଟୋ

ନୂଆଦିଲ୍ଲୀ: ଲୌହ ମାନବ ସର୍ଦ୍ଦାର ବଲ୍ଲଭ ଭାଇ ପଟେଲଙ୍କୁ ଜନ୍ମଦିନ ଅବସରରେ ଶ୍ରଦ୍ଧାଞ୍ଜଳି ନଦେବା ନେଇ କଂଗ୍ରେସ ନେତାଙ୍କୁ ସମାଲୋଚନା । କଂଗ୍ରେସ ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀଙ୍କୁ ଏନେଇ ଟାର୍ଗେଟ କରିଛନ୍ତି ଗୁଜୁରାଟ ମୁଖ୍ୟମନ୍ତ୍ରୀ ବିଜୟ ରୂପାନୀ । ଉଭୟ ସାମାନ୍ୟ ଶିଷ୍ଟାଚାର ମଧ୍ୟ ଭୁଲି ଯାଇଥିବା ସେ କହିଛନ୍ତି । 

ନିଜ ଟ୍ୱିଟରେ ଗୁଜୁରାଟ ମୁଖ୍ୟମନ୍ତ୍ରୀ କହିଛନ୍ତି,  ସର୍ଦ୍ଦାରଙ୍କ ଜନ୍ମଦିନରେ ସମଗ୍ର ଦେଶ ଶ୍ରଦ୍ଧାଞ୍ଜଳି ଦେଇଛି । ହେଲେ କଂଗ୍ରେସ ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀ ଏହି ମହାନ ନେତାଙ୍କୁ ଶ୍ରଦ୍ଧାଞ୍ଜଳି ଦେଇନାହାଁନ୍ତି । ଉଭୟ ସାମାନ୍ୟ ଶିଷ୍ଟାଚାର ମଧ୍ୟ ଭୁଲି ଯାଇଛନ୍ତି । ଲୌହ ମାନବଙ୍କୁ ଏପ୍ରକାର ନିରାଦର ବିଶ୍ୱାସ ବାହାରେ ବୋଲି କହିଛନ୍ତି ଗୁଜୁରାଟ ମୁଖ୍ୟମନ୍ତ୍ରୀ । ତେବେ ରାହୁଲ ଏକ ଫେସବୁକ ପୋଷ୍ଟରେ ଗୁରୁବାର ସକାଳୁ ଦେଶର ପ୍ରଥମ ଉପ-ପ୍ରଧାନମନ୍ତ୍ରୀ ସର୍ଦ୍ଦାର ପଟେଲଙ୍କୁ ଶ୍ରଦ୍ଧାଞ୍ଜଳି ଦେଇଥିବା ଜଣାପଡିଛି । 

୨୦୧୪ରୁ ମୋଦି ସରକାର ସର୍ଦ୍ଦାରଙ୍କ ଜନ୍ମଦିନ ଅକ୍ଟୋବର ୩୧କୁ ଏକତା ଦିବସ ଭାବରେ ଘୋଷଣା କରିଛନ୍ତି । ଏହି ସମୟରୁ ପ୍ରତିବର୍ଷ ରନ ଫର ୟୁନିଟ ମଧ୍ୟ ଆୟୋଜିତ ହୋଇଆସୁଛି । ଏଥର ଭୁବନେଶ୍ୱରରେ ଆୟୋଜିତ ରନ ଫର ୟୁନିଟିରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ଭୁବନେଶ୍ୱର ସାଂସଦ ତଥା ବିଜେପି ନେତ୍ରୀ ଅପରାଜିତା ଷଡ଼ଙ୍ଗୀ ସାମିଲ ହୋଇଛନ୍ତି ।  ରାଷ୍ଟ୍ରପତି ରାମନାଥ କୋବିନ୍ଦ ଏବଂ ଗୃହମନ୍ତ୍ରୀ ଅମିତ ଶାହ ପଟେଲଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କେବଡ଼ିଆ ଷ୍ଟାଚ୍ୟୁ ଅଫ ୟୁନିଟି ଗସ୍ତ କରି ଶ୍ରଦ୍ଧାଞ୍ଜଳି ଦେଇଛନ୍ତି । 

ବିଶ୍ୱର ସର୍ବୋଚ୍ଚ ସର୍ଦ୍ଦାର ପଟେଲଙ୍କ ପ୍ରତିମୂର୍ତ୍ତି ‘ଷ୍ଟାଚ୍ୟୁ ଅଫ୍ ୟୁନିଟି’ ଅନ୍ତରୀକ୍ଷରୁ ମଧ୍ୟ ସ୍ପଷ୍ଟଭାବେ ଦେଖାଯାଉଛି । ଦୁବାଇ ତଟରେ ନିର୍ମିତ ପାମ୍ ଆଇଲ୍ୟାଣ୍ଡ, ମିଶରର ଗ୍ରେଟ୍ ପିରାମିଡ୍ ଅଫ୍ ର୍ଗିଜା ସମେତ ଦୁଇ ଅନ୍ୟ ମାନବ ନିର୍ମିତ ସରଞ୍ଚନା ମଧ୍ୟ ଅନ୍ତରୀକ୍ଷରୁ ଦେଖାଯାଉଛି । ଷ୍ଟାଚ୍ୟୁ ଅଫ ୟୁନିଟିକୁ ହେଲିକପ୍ଟରରେ ମଧ୍ୟ ବୁଲି ଦେଖିବାର ବ୍ୟବସ୍ଥା ରହିଛି । ଷ୍ଟାଚ୍ୟୁ ଅଫ ୟୁନିଟି ଗୁଜରାଟକୁ ବିଶ୍ୱ ପର୍ଯ୍ୟଟନ ମାନଚିତ୍ରରେ ସ୍ଥାନ ଦେଇଥିବା କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।  ଜମ୍ମୁ ଓ କଶ୍ମୀର ଉପରେ ସରକାରଙ୍କ ନିଷ୍ପତ୍ତି ପଛରେ ସର୍ଦ୍ଦାର ପଟେଲଙ୍କ ପ୍ରେରଣା ରହିଛି।  ଯେଉଁ ଜମ୍ମୁ କାଶ୍ମୀର ପାଇଁ ସ୍ୱତନ୍ତ୍ର ସମ୍ବିଧାନ ରହିଥିଲା ଆଜି ସେହି ଜମ୍ମୁ କାଶ୍ମୀର ନୂଆ ପରିଚୟ ପାଇଛି ।  ଗୁରୁବାର ଜମ୍ମୁ କାଶ୍ମୀରର ନୂଆ ଉପରାଜ୍ୟପାଳଭାବେ ଶପଥ ନେଇଥିଲେ ଓଡ଼ିଆ ପ୍ରାଶାସନିକ ଅଧିକାରୀ ଗିରିଶ ଚନ୍ଦ୍ର ମୁର୍ମୁ ।