ଅଦିନିଆ ବର୍ଷାରେ ଭିଜିଲା ରାଜ୍ୟ

ଶାନ୍ତାସ୍ୱରୂପ ରାଉତ, ଭୁବନେଶ୍ୱର: ମୁଣ୍ଡଫଟା ଖରାରେ  ଭିଜିଲା ରାଜ୍ୟ । ଅଦିନିଆ ବର୍ଷାରେ ଧୋଇଲା ସାରା ଓଡ଼ିଶା । ରାଜ୍ୟରେ ଗ୍ରୀଷ୍ମ ଋତୁରେ ଦେଖାଦେଇଛି କାଳବୈଶାଖୀର ତାଣ୍ଡବ । ଏହାର ପ୍ରଭାବରେ ଗତ ୨୪ ଘଣ୍ଟାରୁ ରାଜ୍ୟରେ ବର୍ଷା ଆରମ୍ଭ ହୋଇଯାଇଥିବା ବେଳେ ଆସନ୍ତା ୫ ଦିନ ପର୍ଯ୍ୟନ୍ତ ବିକ୍ଷିପ୍ତ ଭାବେ ପ୍ରବଳ ବର୍ଷା ସାଙ୍ଗକୁ ସର୍ବାଧିକ ୬୦ କିଲୋମିଟର ବେଗରେ ପବନ ବହିବା ନେଇ ବିଭିନ୍ନ ଜିଲ୍ଲାକୁ ଅରେଂଜ ଓ ୟେଲୋ ୱାର୍ଣ୍ଣିଂ ଜାରି କରିଛି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର । ଏହାସହ ଆସନ୍ତା ୨୯ ତାରିଖରେ ଏକ ଲଘୁଚାପ ବଳୟ ସୃଷ୍ଟି ହେବା ନେଇ କେନ୍ଦ୍ର ଆକଳନ କରିଥିବା ବେଳେ ଏହାର ପ୍ରଭାବ ନେଇ ପୂର୍ବାନୁମାନ କରାଯାଇନାହିଁ ।

ପାଣିପାଗ ବିଭାଗ ଦେଇଥିବା ସୂଚନା ମୁତାବକ ଉତ୍ତର ପୂର୍ବ ବିଦର୍ଭ ଏବଂ ତାର ଆଖପାଖ ଅଞ୍ଚଳରେ ସୃଷ୍ଟ ଘୁର୍ଣ୍ଣିବଳୟ ଏବଂ ସମୁଦ୍ର ପତନ ଠାରୁ ଦେଢ କିମି ଉପରେ ବାୟୁମଣ୍ଡଳ ଥିବା ଟ୍ରଫ ଲାଇନ ସହ ତେଲେଙ୍ଗାନା ରୁ କୋମୋରୀନ ଅଞ୍ଚଳ ମଧ୍ୟରେ ଥିବା ଆଉ ଏକ ଟ୍ରଫ ଲାଇନ ପ୍ରଭାବରେ ବର୍ଷା ଲାଗି ରହିଛି । ତେବେ ଏହାର ପ୍ରଭାବରେ ଗତ ୨୪ ଘଣ୍ଟାରେ ଫୁଲବାଣୀଠାରେ ସର୍ବାଧିକ ୧୨୪.୪  ମିମି ବର୍ଷା ରେକର୍ଡ କରାଯାଇଛି । ଆସନ୍ତା ପାଞ୍ଚ ଦିନ ପର୍ଯ୍ୟନ୍ତ ବର୍ଷାର ପ୍ରଭାବ ଜାରି ରହିବ ବୋଲି କେନ୍ଦ୍ର ପୂର୍ବାନୁମାନ କରିଛି ।

ତେବେ ଏହି ବର୍ଷା ପ୍ରଭାବରେ ଆସନ୍ତା ୨୪ ଘଣ୍ଟାରେ ସୁନ୍ଦରଗଡ, ଦେଓଗଡ, କେଉଁଝର, ମୟୂରଭଞ୍ଜ, କୋରାପୁଟ, ରାୟଗଡ, ଗଜପତି, ପୁରୀ, କେନ୍ଦ୍ରାପଡା ଓ ଜଗତସିଂହପୁର ଜିଲ୍ଲାରେ ପ୍ରବଳ ବର୍ଷା ଓ କୂଆପଥର ବଜ୍ରପାତ ସହ ୫୦ରୁ ୬୦ କିଲୋମିଟର ବେଗରେ ପବନ ବହିବା ନେଇ ଅରେଂଜ ୱାର୍ଣ୍ଣି ଜାରି କରିଛି କେନ୍ଦ୍ର । ଏହାସହ ବାକି ଅଂଚଳରେ ଘଡଘଡି ବର୍ଷା ସହ ୩୦ରୁ ୪୦ କିଲୋମିଟର ବେଗରେ ପବନ ବହିବା ନେଇ ୟେଲୋ ୱାର୍ଣ୍ଣିଂ ଜାରି କରାଯାଇଛି । ସେହିପରି ଆସନ୍ତା ୨୮ ତାରିଖ ପର୍ଯ୍ୟନ୍ତ ବିକ୍ଷିପ୍ତ ଭାବେ ବିଭିନ୍ନ ଜିଲ୍ଲାରେ ଅରେଜଂ ଓ ୟେଲୋ ୱାର୍ଣ୍ଣିଂ ଜାରି କରାଯାଇଛି । ଏହାସହ ଆସନ୍ତା ୫ ଦିନ ପର୍ଯ୍ୟନ୍ତ ମସ୍ତ୍ରଜୀବୀଙ୍କୁ ସମୁଦ୍ର ପ୍ରବେଶ ନେଇ ବାରଣ କରାଯାଇଛି ।