ଲକ୍ ଡାଉନରେ ଦେଶ, ପରିବାର ସହ ସମୁଦ୍ର କୂଳରେ ସ୍ୱାସ୍ଥ୍ୟମନ୍ତ୍ରୀ

ନୂଆଦିଲ୍ଲୀ: ଲକ୍ ଡାଉନ ବେଳେ ନ୍ୟୁଜିଲ୍ୟାଣ୍ଡ ମନ୍ତ୍ରୀଙ୍କ ସମୁଦ୍ର କୂଳ ପରିଭ୍ରମଣ । ପରିବାର ସହ ମସ୍ତି ମୁଡରେ ମନ୍ତ୍ରୀ । ଘଡ଼ିସନ୍ଧି ମୁହୂର୍ତ୍ତରେ ଦେଶ, ମନ୍ତ୍ରୀଙ୍କ ସମୁଦ୍ର କୂଳ ମଉଜ । ପୁଣି ଅନ୍ୟ କୌଣସି ମନ୍ତ୍ରୀ ନୁହେଁ, ଖୋଦ ନ୍ୟୁଜିଲ୍ୟାଣ୍ଡର ସ୍ୱାସ୍ଥ୍ୟମନ୍ତ୍ରୀଙ୍କ ଏଭଳି ଖାମଖିଆଲି ମନୋଭାବ । ଶେଷରେ ଭୁଲ ମାନିଛନ୍ତି ମନ୍ତ୍ରୀ , ଆଉ ନିଜ କାମକୁ ଇଡିୟଟ ବୋଲି କହିଛନ୍ତି । ଏପଟେ ନ୍ୟୁଜିଲ୍ୟାଣ୍ଡ ପ୍ରଧାନମନ୍ତ୍ରୀ ମଧ୍ୟ ସମ୍ପୃକ୍ତ ମନ୍ତ୍ରୀଙ୍କ ବିରୋଧରେ ଉଚିତ କାର୍ଯ୍ୟାନୁଷ୍ଠାନ ନେଇଛନ୍ତି । 

ପୁରା ଘଟଣା ଥିଲା କିଛି ଏପରି । କିଲର କୋରୋନା ଯୋଗୁଁ ନ୍ୟୁଜିଲ୍ୟାଣ୍ଡ ମଧ୍ୟ ଏବେ ଲକ୍ ଡାଉନ୍ । ତେବେ ଲକ୍ ଡାଉନ୍ ସମୟରେ ନ୍ୟଜିଲ୍ୟାଣ୍ଡର ସ୍ୱାସ୍ଥ୍ୟମନ୍ତ୍ରୀ ଡେଭିଡ କ୍ଲାର୍କ ପରିବାର ସହ ସି-ବିଚ୍ ପରିଭ୍ରମଣରେ ଯାଇଥିଲେ । ଏହା କେବଳ ନିୟମ ଉଲଙ୍ଘନ ନଥିଲା, ଆହୁରି ମଧ୍ୟ ଘଡ଼ିସନ୍ଧି ମୁହୂର୍ତ୍ତରେ କର୍ତ୍ତବ୍ୟ ତୁଲାଇବାରେ ଖାମଖିଆଲି ମନୋଭାବ ଥିଲା ।

ପରବର୍ତ୍ତୀ ସମୟରେ ନିଜ ଭୁଲକୁ ସ୍ୱୀକାର କରିଥିଲେ ମନ୍ତ୍ରୀ  ଡେଭିଡ କ୍ଲାର୍କ । କହିଥିଲେ, ''ଏଭଳି ମୁସକିଲ ସମୟରେ ସେ ଲୋକଙ୍କ ସହ ଛିଡା ହୋଇପାରିନାହାଁନ୍ତି । ଲକ୍ ଡାଉନ୍ ସତ୍ତ୍ୱେ ପରିବାର ସହ ସି-ବିଚ୍ ପରିଭ୍ରମଣରେ ଯାଇଥିଲେ ।'' ମନ୍ତ୍ରୀ ଆହୁରି ମଧ୍ୟ କହିଛନ୍ତି, ଘରଠୁ ସମୁଦ୍ରର ଦୂରତା ୨୦ କିଲୋମିଟର । ପରିବାରକୁ ସମୟ ଦେବା ପାଇଁ ସେ ଏପରି କରିଥିଲେ । 

ତେବେ ନିଜ ଭୁଲକୁ ସ୍ୱୀକାର କରିବା ସହ ନିଜ କାମକୁ ଇଡିୟଟ ବୋଲି କହିଥିଲେ ଡେଭିଡ କ୍ଲାର୍କ । ଏପରିକି ନିଜ ଇସ୍ତଫା ପତ୍ର ନ୍ୟୁଜିଲ୍ୟାଣ୍ଡ ପ୍ରଧାନମନ୍ତ୍ରୀ  ଜାକିଣ୍ଡା ଆର୍ଡରଙ୍କୁ ପଠାଇଦେଇଥିଲେ । ତେବେ ବର୍ତ୍ତମାନ ଦେଶ ଘଡ଼ିସନ୍ଧି ମୁହୂର୍ତ୍ତ ଦେଇ ଗତି କରୁଥିବାରୁ ପରିପକ୍ୱ ନିଷ୍ପତ୍ତି ନେଇଛନ୍ତି ନ୍ୟୁଜିଲ୍ୟାଣ୍ଡ ପ୍ରଧାନମନ୍ତ୍ରୀ । ତେଣୁ ଡେଭିଡ କ୍ଲାର୍କଙ୍କ ମନ୍ତ୍ରୀପଦ ପରିବର୍ତ୍ତନ କରି ଆସୋସିଏଟ ଅର୍ଥମନ୍ତ୍ରୀ ଦାୟିତ୍ୱ ଦେଇଛନ୍ତି ।