କଙ୍କଡାହାଡ ବେଆଇନ ପଥର ଖଣି: ମାଲାମାଲ ମାଫିଆ, ଅସ୍ତବ୍ୟସ୍ତ ଜନ ଜୀବନ

ବେଆଇନ ଭାବେ ଚାଲୁଛି ପଥର ଖଣି...କୋଟି କୋଟି ଟଙ୍କା ରାଜସ୍ୱ ହରାଉଛନ୍ତି ସରକାର...ଜଙ୍ଗଲ କାଟି ପଦା କରୁଛନ୍ତି ମାଫିଆ...ସ୍ପଷ୍ଟ ଦିବାଲୋକରେ କଟାଯାଉଛି ପଥର...ପଥର ମାଫିଆଙ୍କ ଭୟରେ ଲୋକ ମୁହଁ ଖୋଲୁନାହାଁନ୍ତି...ପ୍ରଶାସନ ହାତବାନ୍ଧି ବସିଛି...

ସଦାଶିବ ସେଠୀ, କାମାକ୍ଷାନଗର: ଢେଙ୍କାନାଳ କଙ୍କଡାହାଡ ଅଞ୍ଚଳର ୫ଟି ସ୍ଥାନରେ ଚାଲିଛି ବେଆଇନ ପଥର ଖଣି । ଗଡପଳାଶୁଣି, କରଗଳା, ଜରଡା, ବାହାଡାପାଳ ,ଖଜୁରିଆରେ ଚାଲିଛି ବେଆଇନ ପଥର ଖଣି। ବେଆଇନ ଭାବେ ଏହି ମଙ୍କଡା ପଥର ଖଣି ଚାଲୁଛି । ଘଞ୍ଚ ଜଙ୍ଗଲକୁ କାଟି ପଦା କରି ସାରିଲେଣି ପଥର ମାଫିଆ । ବର୍ଷ ବର୍ଷ ଧରି ଚାଲୁଥିଲେ ମଧ୍ୟ ଏଥି ପ୍ରତି ପ୍ରଶାସନର ନିଘା ନାହିଁ।  ବିନା ଲିଜରେ ମାଙ୍କଡା ପଥର କାଟି ଚାଲାଣ କରାଯାଉଥିବା ଅଭିଯୋଗ ଆସିଛି । 

କେତେକ ଖାଦାନ ପରିତ୍ୟକ୍ତ ଅବସ୍ଥାରେ ଥିବାବେଳେ ଆଉ କେତେକ ଖାଦାନ କାର୍ଯ୍ୟକ୍ଷମ ରହିଛି ।  ଖାଦାନରୁ ପ୍ରଚୁର ପରିମାଣର ପଥର କଟା ଯାଇ ବେଧଡକ ଭାବେ ଦିନ ଦ୍ୱିପ୍ରହରରେ ଚାଲାଣ କରାଯାଉଛି । ପଥର ମାଫିଆମାନେ ଦିନ ରାତି ପଥର କାଟି ମୋଟା ଅଙ୍କର ମୁନାଫା କମାଉଛନ୍ତି । ଏମିତିକ ପଥର ମାଫିଆଙ୍କ ଧମକ ଯୋଗୁଁ ସ୍ଥାନୀୟ ଅଞ୍ଚଳର ବାସିନ୍ଦାମାନେ ମୁହଁ ଖୋଲୁନାହାନ୍ତି । କେହି ଯଦି ଏ ବିଷୟରେ କିଛି କହୁଛନ୍ତି ତାହେଲେ ସେମାନଙ୍କୁ ଧମକ ମିଳିୁଥିବା ଅଭିଯୋଗ କରିଛନ୍ତି ଗ୍ରାମବାସୀ ।

ଜିଲ୍ଲାର ଉଭୟ କାମାକ୍ଷାନଗର ପୂର୍ବାଞ୍ଚଳ ଓ ମହାବିରରୋଡ ରେଞ୍ଜ ଅଧିନରେ ଥିବା ଜଙ୍ଗଲ ଜମିରେ ଚାଲୁଛି ବେଆଇନ ପଥର ଖଣି । ଜଙ୍ଗଲ କିସମ ଜମିରୁ ବେଆଇନ ଭାବେ ଦୀର୍ଘ ବର୍ଷ ଧରି ପଥର ଖଣି ଚାଲୁଛି । ପ୍ରଶାସନର କୋହଳ ମନୋଭାବ ହେତୁ ମାଫିଆ ମାନେ ଦିନ ଏବଂ ରାତିରେ ପଥର କାଟି ମୁନାଫା କମାଉଛନ୍ତି। ପଥର ଖଣି ଯୋଗୁଁ ପ୍ରାକୃତିକ ପରିବେଶ ନଷ୍ଟ ହେଉଛି । ଏଥି ସହିତ  ବର୍ଷା ଦିନେ ଏହି ସବୁ ଜାଗା ମରଣାଯନ୍ତା ପାଲଟୁଛି । ଖାଲ ମାନଙ୍କରେ ପାଣି ଜମି ରହୁଥିବାରୁ  ଛୋଟ ପିଲାଙ୍କ ଠାରୁ ଆରମ୍ଭ କରି ଗ୍ରାମବାସୀ ଯାତାୟାତରେ ଅନେକ ଅସୁବିଧାର ସମ୍ମୁଖୀନ ହେଉଛନ୍ତି । 

କେବଳ ଏତିକି ନୁହେଁ, ଏଥିପାଇଁ ହାତୀମାନଙ୍କ ଗତିପଥ ବଦଳିଯାଉଛି । ଯାହା ଫଳରେ ସେମାନେ ଏବେ ଜନବସତି ମୁହାଁ ହେଉଛନ୍ତି । ବିଗତ ବର୍ଷ ଗୁଡିକରେ ଏହି ବେଆଇନ ପଥର ଖଣି ଉପରେ କୌଣସି କାର୍ଯ୍ୟାନୁଷ୍ଠାନ ହୋଇ ନ ଥିବା ବେଳେ ବିଭାଗୀୟ ଅଧିକାରୀ ମାଫିଆଙ୍କ ଠାରୁ ମୋଟା ଅର୍ଥ ନେଇ ଚୂପ ବସିଥିବା ଅଭିଯୋଗ ହେଊଛି । ଏସମ୍ପର୍କରେ ଉପଜିଲ୍ଲାପାଳ ବିଷ୍ଣୁପ୍ରସାଦ ଆଚାର୍ଯ୍ୟଙ୍କୁ ପଚାରିବାରୁ ସେ ଚିରାଚରିତ ଉତ୍ତର ରଖିଛନ୍ତି । ବର୍ଷାଋତୁ ଯୋଗୁଁ କଟା ବନ୍ଦ ଥିଲା। ଏବେ  ଘଟଣା ସମ୍ପର୍କରେ ଅବଗତ ଥିବା କହିଛନ୍ତି କାମାକ୍ଷାନଗର ଉପଜିଲ୍ଲାପାଳ ବିଷ୍ଣୁପ୍ରସାଦ ଆଚାର୍ଯ୍ୟ । ଅଞ୍ଚଳରେ  ପୁଣିଥରେ ରେଡ୍ କରିବେ ବୋଲି ସେ କହିଛନ୍ତି ।

ବେଆଇନ ପଥର ଖଣି ଯୋଗୁଁ ସରକାରଙ୍କ ରାଜସ୍ୟ ବର୍ଷକୁ କୋଟି କୋଟି ଟଙ୍କା କ୍ଷତି ହେଉଛି । ଏହାର ସିଧାସଳଖ ଲାଭ ଉଠାଉଛନ୍ତି ମାଫିଆ। ଏପରି ସ୍ଥଳେ ବିଭାଗୀୟ ଅଧିକାରୀ ଏହି ଚୋରା ପଥର ଖାଦାନ ଉପରେ ଚଢାଉ କରି ବେଆଇନ ଭାବେ ଚାଲୁଥିବା ଖାଦାନକୁ ବନ୍ଦ କରିବାକୁ ଦାବି ହେଉଛି ।

ଆହୁରି ପଢନ୍ତୁ; ପୋଲିସର ଜୋତାକୁ କିସ୍ କଲେ ସାଂସଦ