ଜଳପଥରେ ଶକ୍ତି ବଢାଇବ ଭାରତ, ନୌସୈନାରେ ସାମିଲ ହେବ 'ରୋମିଓ'

ନୂଆଦିଲ୍ଲୀ: ଭାରତ ମହାସାଗର ଏବଂ ଆରବ ସାଗରରେ ଦିନକୁ ଦିନ ଚୀନର କାର୍ଯ୍ୟକଳାପ ବୃଦ୍ଧି ପାଉଥିବାରୁ ଏହାର ମୁକାବିଲା କରିବାକୁ ସଜାଗ ରହିଛି ଭାରତୀୟ ନୌସେନା | ଏହାକୁ ଦୃଷ୍ଟିରେ ରଖି ମହାସାଗରୀୟ କ୍ଷେତ୍ରରେ ଶକ୍ତି ସାମର୍ଥ୍ୟ ବୃଦ୍ଧି କରିବା ଉପରେ ଦିଆଯାଇଛି ଗୁରୁତ୍ୱ | ଏହି କ୍ରମରେ ୨୪ଟି ରୋମିଓ ହେଲିକପ୍ଟରକୁ ନୌସେନାରେ ସାମିଲ କରିବ ଭାରତ | ଏହି ହେଲିକପ୍ଟରେ ଜଳଭାଗରେ କୌଣସି ବୁଡାଜାହାଜ କିମ୍ବା ଯୁଦ୍ଧ ଜାହାଜର ମୁକାବିଲା କରିବାରେ ସକ୍ଷମ | 

 
ଆମେରିକାରୁ ପ୍ରାୟ ୨୦ ହଜାର କୋଟି ଟଙ୍କା ବ୍ୟୟରେ ୨୪ଟି ରୋମିଓ ହେଲିକପ୍ଟର ଆମଦାନୀ କରିବ | ଗତ ଫେବୃଆରୀରେ ଆମେରିକା ରାଷ୍ଟ୍ରପତି ଡୋନାଲ୍ଟ ଟ୍ରମ୍ପଙ୍କ ଭାରତ ଗସ୍ତ ଅବସରରେ ଏ ସମ୍ପର୍କିତ ଚୁକ୍ତି ସ୍ୱାକ୍ଷର ହୋଇଥିଲା |  ଫେବୃଆରୀ ୧୫ ତାରିଖରେ ୭୦୦୦ କୋଟିର ଏହି ପ୍ରତିରକ୍ଷା ଚୁକ୍ତିକୁ ସ୍ୱୀକୃତି ମିଳିଛି | ବାକି ଟଙ୍କା ହେଲିକପ୍ଟରରେ ଲାଗିବାକୁ ଥିବା ହତିଆର ଏବଂ ସାମରିକ ଉପକରଣ ପାଇଁ ଖର୍ଚ୍ଚ ହେବ | ଲକହିଡ ମାର୍ଟିନ କମ୍ପାନୀ ସହ ହୋଇଥିବା ଚୁକ୍ତି ଅନୁସାରେ ଆମେରିକା ନୌସେନାକୁ ମିଳିବାକୁ ଥିବା ୩ଟି ରୋମିଓ ହେଲିକପ୍ଟର ଭାରତକୁ ମିଳିବ | 

ଏହାକୁ ଭାରତୀୟ ନୌସେନା ପାଇଲଟଙ୍କ ପ୍ରଶିକ୍ଷଣ ପାଇଁ  ବ୍ୟବହାର କରାଯିବ | ଆସନ୍ତା ବର୍ଷ ସମସ୍ତ ହେଲିକପ୍ଟର ଭାରତକୁ ହସ୍ତାନ୍ତର କରାଯିବ | ଗୋଟିଏ ନ୍ୟୁକ୍ଲିୟାର ସବମେରିନ ସମେତ ଭାରତ ପାଖରେ ୧୬ଟି ବୁଡାଜାଜାହ ରହିଛି | ୨୦୨୪ ସୁଦ୍ଧା ୨୪ଟି ସବମେରିନ ନିର୍ମାଣ କରିବାକୁ ଯୋଜନା କରିଛି ଭାରତ | ବର୍ତ୍ତମାନ ପର୍ଯ୍ୟନ୍ତ କେବଳ ୨ଟି ବୁଡାଜାହାଜ ହସ୍ତଗତ ହୋଇଛି | ଅନ୍ୟପଟେ ପ୍ରତିଦ୍ୱନ୍ଦୀ ଚୀନ ପାଖରେ ୭୬ ସବମେରିନ ଥିବା ବେଳେ ସେଥି ମଧ୍ୟରୁ ୧୦ ଆଣବିକ କ୍ଷମତା ସମ୍ପନ୍ନ | ଚୀନ ପାକିସ୍ତାନକୁ ୟୁଆନ କ୍ଲାସର ୮ଟି ସବମେରିନ ପ୍ରଦାନ କରିବ | ଆସନ୍ତା ୨୦୨୮ରେ ଏହା ପାକିସ୍ତାନର ହସ୍ତଗତ ହେବାର ଅଛି |  ଏଭଳି ଧରଣର ସେବମେରିନରେ ଏୟାର ଇଣ୍ଡିପେଣ୍ଡେଣ୍ଟ ପ୍ରୋପଲସନ ଲଗାଯାଇଛି, ଯାହା ମାଧ୍ୟମରେ ଏହା ସମୁଦ୍ରରେ ଗୋପନୀୟ ଭାବେ ରହିପାରେ |       

  
ଭାରତ ମହାସାଗର ଏବଂ ଆରବ ସାଗରରେ ସାମୁଦ୍ରିକ ବ୍ୟାପାର ଏବଂ ସୁରକ୍ଷା ଆଳରେ  ଚୀନର ଉପସ୍ଥିତି ଦିନକୁ ଦିନ ବୃଦ୍ଧି ପାଉଥିବାରୁ ଏହାର ଜବାବ ଦେବାକୁ ପ୍ରସ୍ତୁତ ହେଉଛି ଭାରତ | ଏଭଳି ସ୍ଥିତିର ମୁକାବିଲା ପାଇଁ ଭାରତୀୟ ନୌସେନା ବିଗତ ପାଞ୍ଚ ଦଶନ୍ଧି ଧରି କିଙ୍ଗ ଆଣ୍ଟି ସବମେରିନ ହେଲିକପ୍ଟର ବ୍ୟବହାର କରି ଆସୁଛି | ରୋମିଓ ହେଲିକପ୍ଟର ଜଳପଥରେ କୌଣସି ଧରଣର ସବମେରିନ କିମ୍ବା ଜାହାଜକୁ ଠାବ କରିବା ସହ ଏହାକୁ ଧ୍ୱଂସ କରିବାରେ ସକ୍ଷମ | ସମୁଦ୍ର ମଧ୍ୟରେ ଥିବା କୌଣସି ବୁଡାଜାହାଜର ଉପସ୍ଥିତିକୁ ଚିହ୍ନଟ କରିବା ପାଇଁ ଏଥିରେ  ସେନର୍ସ୍ସ ସହ ଏହାକୁ ଧ୍ୱଂସ କରିବା ପାଇଁ 54 ଟର୍ପିଡୋ ଲଗାଯାଇଛି | କୌଣସି ଧରଣର ଯୁଦ୍ଧ ଜାହାଜକୁ ଜବାବ ଦେବା ପାଇଁ ହେଲଫାୟାର ମିସାଇଲ ମହଜୁଦ ରହିଛି | ଦିନ ହେଉ ଅଥବା ରାତି କୌଣସି ପାଗରେ ପ୍ରାୟ ୧୨୦୦୦ ଫୁଟ ଉଚ୍ଚରେ ଉଡିବାରେ ସକ୍ଷମ ଏହି ହେଲିକପ୍ଟର | ଯାହାର ଘଣ୍ଟାପ୍ରତି ବେଗ ୨୭୦ କିମି ପର୍ଯ୍ୟନ୍ତ ବଢିପାରେ |