ଘର ବାହୁଡ଼ା ଶ୍ରମିକଙ୍କ ଠାରୁ ଭଡ଼ା ଆଦାୟ କରୁନି ରେଳ ମନ୍ତ୍ରାଳୟ, ଆସିଲା ବଡ଼ ବୟାନ

ନୂଆଦିଲ୍ଲୀ: ଲକଡାଉନ୍ ଯୋଗୁ ବିଭିନ୍ନ ରାଜ୍ୟରେ ଫସି ରହିଥିବା ଶ୍ରମିକ, ଛାତ୍ର ଏବଂ ପର୍ଯ୍ୟଟକଙ୍କୁ ନିଜ ନିଜ ରାଜ୍ୟକୁ ଯିବାକୁ ଅନୁମତି ମିଳିଛି । ରାଜ୍ୟ ସରକାରଗୁଡ଼ିକ ପରସ୍ପର ସହ ସମ୍ପର୍କ କରି ସ୍ଥାନୀୟ ନାଗରିକଙ୍କୁ ଫେରାଇ ଆଣିବାର ବ୍ୟବସ୍ଥା କରିଛନ୍ତି । ତେବେ ଏସବୁ ଭିତରେ ଟ୍ରେନ ଭଡ଼ା ଯାତ୍ରୀ ହିଁ ବହନ କରିବେ ବୋଲି ଖବର ଆସିଥିଲା । ଯାହାକୁ ନେଇ ସରକାରଙ୍କୁ କଡ଼ା ସମାଲୋଚନା କରିଥିଲା କଂଗ୍ରେସ । ତେବେ ରେଳ ବିଭାଗ ପକ୍ଷରୁ ଏନେଇ ବଡ଼ ବୟାନ ଆସିଛି । ଏହା ଉପରେ ସଫେଇ ଦେଇଛି ଭାରତୀୟ ରେଳ ବିଭାଗ । 

ଭାରତୀୟ ରେଳ ଯାତ୍ରୀଙ୍କ ପାଖରୁ ଭଡ଼ା ଆଦାୟ କରୁନାହିଁ

ଏକ ବୟାନ ଜାରି କରି ରେଳ ବିଭାଗ ସ୍ପଷ୍ଟ କରିଛି, ସ୍ପେଶାଲ ଟ୍ରେନ ଚଳାଇବା ଖର୍ଚ୍ଚ ରାଜ୍ୟ ସରକାର ଗୁଡ଼ିକ ବହନ କରୁଛନ୍ତି । ଆମେ ବିନା ଟିକଟରେ କୌଣସି ମଧ୍ୟ ଯାତ୍ରା ପାଇଁ ଅନୁମତି ଦେଇନଥାଉ । ତେଣୁ ସ୍ପେଶାଲ ଟ୍ରେନରେ ଘରକୁ ଫେରୁଥିବା ଯାତ୍ରୀଙ୍କ ପାଇଁ ଗୋଟିଏ ଗୋଟିଏ ଟିକେଟ ଇସ୍ୟୁ କରାଯାଉଛି । ତେବେ ଯାତ୍ରୀଙ୍କ ପାଖରୁ ଭଡ଼ା ଆଦାୟ କରାଯିବ ନା ନାହିଁ, ସେନେଇ ରାଜ୍ୟ ସରକାର ନିଷ୍ପତ୍ତି ନେବେ । ମାତ୍ର ଆମେ କୌଣସି ଯାତ୍ରୀଙ୍କ ଠାରୁ ଭଡ଼ା ଆଦାୟ କରୁନଥିବା କହିଛି ରେଳ ମନ୍ତ୍ରାଳୟ । 

ରେଳ କିମ୍ବା ବସ୍ ଷ୍ଟେସନକୁ ଭୁଲରେ ବି ଯାଆନ୍ତୁ ନାହିଁ

ଆପଣ ବାହାର ରାଜ୍ୟରେ ଫସି ରହିଛନ୍ତି କି ? ଆପଣ ଭାବୁଛନ୍ତି କି, ସିଧାସଳଖ ଷ୍ଟେସନ ଯାଇ ରେଳ ଧରିବେ ? ଜମା ବି ସେ ଭୁଲ କରନ୍ତୁ ନାହିଁ । ଆପଣଙ୍କୁ ରେଳରେ ଯିବା ତ ଦୂରର କଥା, ଷ୍ଟେସନ ଭିତରକୁ ଯିବାକୁ ମଧ୍ୟ ଅନୁମତି ମିଳିବ ନାହିଁ । 

କେମିତି ଘରକୁ ଫେରିବେ ? 

ଆପଣଙ୍କୁ ସ୍ପେଶାଲ ଟ୍ରେନରେ ଘରକୁ ଫେରିବାକୁ ହେଲେ, ତାଲିକାରେ ଆପଣଙ୍କ ନାଁ ଥିବା ଦରକାର । ଅର୍ଥାତ, ଆପଣଙ୍କୁ ପ୍ରଥମେ ପଞ୍ଜିକରଣ କରିବାକୁ ପଡ଼ିବ । ଆପଣ ଏନେଇ ରାଜ୍ୟ ସରକାରଙ୍କ ୱେବ ସାଇଟରେ ପଞ୍ଜିକରଣ କରିବେ । ସମ୍ପୃକ୍ତ ରାଜ୍ୟ ସରକାରଙ୍କ ପକ୍ଷରୁ ଯାତ୍ରା କରିବାକୁ ଥିବା ଯାତ୍ରୀଙ୍କ ଏକ ତାଲିକା ପ୍ରସ୍ତୃତ ହେବ । ଏନେଇ ରାଜ୍ୟ ସରକାରଙ୍କ ପକ୍ଷରୁ ନୋଡାଲ ଅଧିକାରୀ ନିଯୁକ୍ତ ହୋଇଛନ୍ତି । ଆଉ ସେମାନେ ଯେଉଁ ତାଲିକା ପ୍ରସ୍ତୁତ କରିବେ, ସେହି ହିସାବରେ ଆପଣ ଘରକୁ ଫେରିବେ । ରେଳ ବିଭାଗ ଏହି ତାଲିକା ଅନୁସାରେ ହିଁ ଲୋକଙ୍କୁ ଟ୍ରେନରେ ଚଢ଼ିବାକୁ ଅନୁମତି ଦେବ ।