ଭାରତୀୟ ଅର୍ଥ ବ୍ୟବସ୍ଥାକୁ ନେଇ ଚେତାଇଲେ ଅଭିଜିତ ବାନାର୍ଜୀ

ନୂଆଦିଲ୍ଲୀ: ଭାରତୀୟ ବଂଶୋଦ୍ଭବ ଅର୍ଥନୀତିଜ୍ଞ ଅଭିଜିତ ବିନାୟକ ବାନାର୍ଜୀଙ୍କୁ ମିଳିଛି ଦୁନିଆର ସର୍ବୋଚ୍ଚ ସମ୍ମାନ ନୋବେଲ ପୁରସ୍କାର । ଅର୍ଥନୀତି କ୍ଷେତ୍ରରେ ଅଶେଷ ଅବଦାନ ପାଇଁ ତାଙ୍କୁ ଏହି ପୁରସ୍କାର ମିଳିଛି । ତାଙ୍କ ସହ ତାଙ୍କ ପତ୍ନୀ ଏଷ୍ଟର ଡ୍ୟୁଫଲୋ ଓ ମାଇକେଲ କ୍ରେମରଙ୍କୁ ମଧ୍ୟ ଅର୍ଥଶାସ୍ତ୍ରରେ ନୋବେଲ ପୁରସ୍କାର ମିଳିଛି । ଅନ୍ୟପକ୍ଷେ ନୋବେଲ ପୁରସ୍କାର ମିଳିବା ପରେ ଅଭିଜିତ ସଙ୍କଟରେ ଭାରତୀୟ ଅର୍ଥ ବ୍ୟବସ୍ଥା ରହିଛି ବୋଲି କହିଛନ୍ତି । ଅର୍ଥ ବ୍ୟବସ୍ଥାକୁ ସୁଧାରିବା ପାଇଁ ଯଦି କୌଣସି ଗୁରୁତ୍ୱପୂର୍ଣ୍ଣ ପଦକ୍ଷେପ ନ ନିଆଯାଏ ତେବେ ଆଗାମୀ ଦିନରେ ଏହା ଆହୁରି ଅଧିକ ଖରାପ ଦିଗକୁ ଗତି କରିବ ବୋଲି ସେ କହିଛନ୍ତ । 

ଅଭିଜିତ ଓ ତାଙ୍କ ପତ୍ନୀ ଡ୍ୟୁଫଲୋ ଆମେରିକାର ମ୍ୟାସାଚୁସେଟ୍ସ ଇନଷ୍ଟିଟ୍ୟୁଟ ଅଫ ଟେକ୍ନୋଲଜିରେ ଅଧ୍ୟାପକ ଭାବେ କାର୍ଯ୍ୟରତ ଅଛନ୍ତି ।  ନୋବେଲ ପୁରସ୍କାର ଘୋଷଣା ପରେ ଏମଆଇଟିରେ ଅଭିଜିତ ଓ ତାଙ୍କ ପତ୍ନୀ ଗଣମାଧ୍ୟମକୁ ବିଭିନ୍ନ ପ୍ରଶ୍ନର ଉତ୍ତର ଦେଉଥିଲେ । ସେହି ସମୟରେ ଜଣେ ସାମ୍ବାଦିକ ଭାରତୀୟ ଅର୍ଥ ବ୍ୟବସ୍ଥାକୁ ନେଇ ପ୍ରଶ୍ନ ପଚାରିଥିଲେ । ଯାହାର ଜବାବରେ ସେ କହିଛନ୍ତି ଯେ, ଭାରତର ଅର୍ଥ ବ୍ୟବସ୍ଥା ବହୁତ ଖରାପ ପରିସ୍ଥିତି ମଧ୍ୟ ଦେଇ ଗତି କରୁଛି ।

ଭାରତୀୟମାନେ ଅଭାବଗ୍ରସ୍ତ ଯୋଗୁଁ ନିଜ ଉପଭୋଗକୁ କମ କରୁଛନ୍ତି । କ୍ରମାଗତ ଏଥିରେ ହ୍ରାସ ଦେଖା ଦେଇଛି, ଯେଉଁ ହାରରେ ଏହା ହେବାକୁ ଲାଗିଛି ସେଥିରୁ ଲାଗୁଛି ଏହାକୁ ନିୟନ୍ତ୍ରଣ କରାଯାଇ ହେବ ନାହିଁ । ଅଭିଜିତ ଓ ତାଙ୍କ ସ୍ତ୍ରୀ ଡୁଫଲୋ ଏମଆଇଟିରେ ଅର୍ଥଶାସ୍ତ୍ରରେ ଅଧ୍ୟାପକ ଅଛନ୍ତି । ଦୁହେଁଙ୍କ ବିବାହ ୨୦୧୫ରେ ହୋଇଥିଲା ।

ଅଭିଜିତ ବାନାର୍ଜୀ ଭାରତରେ ମଧ୍ୟ ବହୁ ଗବେଷଣା ପ୍ରଜେକ୍ଟ ଉପରେ କାମ କରୁଛନ୍ତି । ସେ ଭାରତୀୟ ଅର୍ଥବ୍ୟବସ୍ଥାକୁ ନେଇ ଆହୁରି କହିଛନ୍ତି ଯେ, ମୋତେ ଲାଗୁଛି ଭାରତୀୟ ଅର୍ଥବ୍ୟବସ୍ଥାର ପରସ୍ଥିତି ବହୁତ ଖରାପ । ଏନଏସଏସର ଡାଟା ଦେଖିଲେ ଜଣାପଡୁଛି ଯେ ୨୦୧୪-୧୫ ଓ ୨୦୧୭-୧୮ର ମଧ୍ୟରେ ସହରାଞ୍ଚଳ ଓ ଗ୍ରାମୀଣ ଭାରତର ଲୋକେ ନିଜ ଉପଭୋଗକୁ ଭାରି ମାତ୍ରାରେ କମ କରି ଦେଇଛନ୍ତି । ବହୁ ବର୍ଷ ପରେ ଏମିତି ହୋଇଛି । ଏହା ସଙ୍କଟର ଆରମ୍ଭ ବୋଲି ଅଭିଜିତ କହିଛନ୍ତି ।