କଟକଣା ମଧ୍ୟରେ ଖୋଲିଲା କୋଣାର୍କ, ସୀମିତ ପର୍ଯ୍ୟଟକଙ୍କୁ ଅନୁମତି

ବିଶ୍ୱରଞ୍ଜନ ବିଶ୍ୱଶ୍ରୀ, କୋଣାର୍କ: ଦୀର୍ଘ ଦିନ ଧରି କୋରୋନା ସଂକଟ ସହ ଲଢେଇ କରିଆସୁଥିଲା ମାନବ ସମାଜ । ଆଉ ଏହି ଲଢେଇରେ ସାମିଲ ଥିଲେ ଅର୍କକ୍ଷେତ୍ର ବାସିନ୍ଦା । ବେଶ ଲମ୍ବା ସମୟ ଧରି ସଂଗ୍ରାମ କରିବା ପରେ ଏବେ ସେମାନଙ୍କ ମୁହଁରେ ହସଫୁଟୁଛି। ମଙ୍ଗଳବାର (ସେପ୍ଟମ୍ବର ୧, ୨୦୨୦) ଠାରୁ ଖୋଲିଛି ବିଶ୍ୱ ପ୍ରସିଦ୍ଧ ଐତିହ୍ୟ (World Heritage) ଭାବେ ଜଣାଶୁଣା କୋଣାର୍କ ସୂର୍ଯ୍ୟ ମନ୍ଦିର (Konark Sun Temple) ।

କୋରୋନା ମୁକାବିଲା କ୍ଷେତ୍ରରେ ଓଡିଶାର ସ୍ଥିତି ଅନ୍ୟ ରାଜ୍ୟଙ୍କ ତୁଳନାରେ ଅପେକ୍ଷାକୃତ ଭଲ ରହିଛି । ଏହା ମଧ୍ୟରେ କୋଣାର୍କ ବାସୀଙ୍କ ମୁହଁରେ ହସ ଫୁଟାଇଛନ୍ତି କେନ୍ଦ୍ରସରକାର । ସୂର୍ଯ୍ୟମନ୍ଦିର ଉପରେ ନିର୍ଭର କରୁ୍ଥିବା ସାଧାରଣ ଗରିବ ଖଟିଖିଆ । କୋରୋନା ମାଡରେ ହୋଇପଡିଥିଲେ ଘାଇଲା । ଦିନକୁ ଦୁଇ ଓଳି ଦୁଇ ମୁଠା ଦାନା ଯୋଗାଡ କରିବା ସେମାନଙ୍କ ଲାଗି ହୋଇ ପଡିଥିଲା କଷ୍ଟସାଧ୍ୟ । ବେଶ କିଛି ଦିନ ଧରି ବିଶ୍ୱପର୍ଯ୍ୟଟନ ମାନଚିତ୍ରରେ ସ୍ୱତନ୍ତ୍ର ସ୍ଥାନ ଅଧିକାର କରିଥିବା କୋଣାର୍କ ଏବେ ଖୋଲିବାକୁ ଯାଉଥିବାର ଏବେ ସେମାନଙ୍କ ମୁଁହରେ ହସ ଫୁଟିଛି ।

ସ୍ୱାଭାବିକ ଅବସ୍ଥାକୁ ଫେରୁଛି ଅର୍କକ୍ଷେତ୍ର କୋଣାର୍କ । ଯେଉଁ ସ୍ଥାନରେ ପ୍ରାୟ ୬ ମାସରୁ ଉର୍ଦ୍ଧ୍ୱ ସମୟ ଧରି ତାଲା ଝୁଲୁଥିଲା ତାହା ଏବେ ଖୋଲିବାକୁ ଯାଉଛି । କୋରୋନା ସଂକଟ କାରଣରୁ ବନ୍ଦ ହୋଇ ପଡିଥିବା ପର୍ଯ୍ୟଟନ ଶିଳ୍ପ ସହ ଜଡିତ ଛୋଟବଡ ବ୍ୟବସାୟ ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଥିଲା । ଯାହା ଏବେ ଠାରୁ ପୁଣି ଥରେ କାର୍ଯ୍ୟକ୍ଷମ ହେବାକୁ ଯାଉଛି । ସେପ୍ଟମ୍ବର ପହିଲାରୁ କୋଣାର୍କରେ ଅନଲାଇନ୍ ଟିକଟ ସେବା ଆରମ୍ଭ ହୋଇଛି । ଯେଉଁ ପର୍ଯ୍ୟଟକ ଅ।ସିବେ ସେମାନଙ୍କୁ କ୍ୟାସଲେସ ଟ୍ରାଞ୍ଜାକସନ (Cashless Transaction) ବ୍ୟବସ୍ଥାକୁ ଅପଣେଇବାକୁ ପଡିବ । ମୁଖ୍ୟ ଫାଟକ ପର୍ଯ୍ୟଟଙ୍କ ପାଇଁ ଖୋଲା ହେବାରୁ ପୁଣି ଥରେ ଚଳଚଞ୍ଚଳ ହୋଇଉଠିବ ।

ଯଦିଓ କୋଣାର୍କ ଖୋଲିଛି ହେଲେ ଏହା ଉପରେ ନିର୍ଭର କରି ଗୁଜୁରାଣ ମେଣ୍ଟାଉଥିବା ଫଟୋଗ୍ରାଫର (Photo Grapher), ଟୁରିଷ୍ଟ ଗାଇଡ (Tourist Guide) ଜୀବନଜୀବିକା ପ୍ରଭାବିତ ହୋଇଛ । ଏପରିକି ସେମାନଙ୍କୁ ମନ୍ଦିରରେ ପ୍ରବେଶ ଲାଗି ଅନୁମତି ମିଳିନଥିଲା । ଯାହାକୁ ନେଇ ଅସନ୍ତୁଷ୍ଟ ହୋଇ ଉଠିଛନ୍ତି ପ୍ରାୟ ୪୦୦ରୁ ଉର୍ଦ୍ଧ୍ୱ ଫଟୋଗ୍ରାଫର ଏବଂ ଟୁରିଷ୍ଟ । ଖୁବ ଶୀଘ୍ର ସେମାନଙ୍କୁ ଭାରତୀୟ ପ୍ରତ୍ନତତ୍ତ୍ୱ ବିଭାଗ-ଏଏସଆଇ (ASI-Archeological Survey of India) ଅନୁମତି ଦେବ ବୋଲି ଅ।ଶାବାଦୀ ଅଛନ୍ତି । ସେପଟେ ଟ୍ୟୁରିଷ୍ଟ ଗାଇଡଙ୍କୁ ମନ୍ଦିର ପ୍ରବେଶ ପାଇଁ ଅନୁମତି ଦେବାକୁ ଦାବି କରିଛି କୋଣାର୍କ ସୁରକ୍ଷା ସମିତି ।