ଶେଷଦେବ ମହାପାତ୍ର, ନୂଆଦିଲ୍ଲୀ: ଆଜି ମହାରାଷ୍ଟ୍ର ରାଜନୈତିକ ପାଣିପାଗକୁ ନେଇ ଉଠୁଛି ପଡୁଛି ମୁମ୍ବାଇ । ହେଲେ ଠିକ ୧୧ ବର୍ଷ ପୂର୍ବ ଆଜିର ଦିନରେ ବି ସାରା ବିଶ୍ୱର ନଜର ଲାଖି ରହିଥିଲା ଏହି ମୁମ୍ବାଇ ଉପରେ । ଧରୁଥିଲା ମାୟା ନଗରୀ । ବାଣିଜ୍ୟିକ ରାଜଧାନୀରେ ଆତଙ୍କର ରାଜ୍ । ସାଧାରଣ ଲୋକଙ୍କ ସୁରକ୍ଷା ପାଇଁ ପୋଲିସ କେତେ ସମର୍ପିତ, ତାହା ଦେଶ ଦେଖୁଥିଲା । କାହିଁକିନା ଅଗ୍ନି ପରୀକ୍ଷା ଦେଉଥିଲା ମୁମ୍ବାଇ ପୋଲିସ ।
ଆତଙ୍କୀଙ୍କ ଆଡୁ ଆତର୍କିତ ଗୁଳି ବର୍ଷା । ଆଖି ଆଗରେ ଅନେକ ମୃତଦେହ । ଜଳୁଥିଲା ହୋଟେଲ ତାଜ୍ । ଶିବାଜୀ ରେଲୱେ ଟର୍ମିନାଲ, ଲିଓପୋଲ୍ଡ କାଫେରେ କେହି କିଛି ଭାବିବା ପୂର୍ବରୁ ଟଳି ପଡୁଥିଲେ ସାଧାରଣ ଜନତା । ସାରା ରାତି ସଂହାର ଲୀଳା ଚଳାଇଥିଲେ ଲସ୍କର-ଏ-ତୋଏବାର ୧୦ ଆତଙ୍କବାଦୀ । ଆଉ ଏହାକୁ ସାମ୍ନା କରିବା ଆମ ସୁରକ୍ଷାକର୍ମୀଙ୍କ ପାଇଁ ସବୁଠି ବଡ ଚ୍ୟାଲେଞ୍ଜ ଥିଲା ।
ମାଛ ଖାଇବ ଇଲିସି, ଚାକିରି କରିବ ପୋଲିସି । ସାଧାରଣ ଲୋକଙ୍କ ଭିତରେ ପୋଲିସକୁ ନେଇ ବିଭିନ୍ନ ସମୟରେ ଏମିତି କିଛି ଚର୍ଚ୍ଚା ହୋଇଥାଏ । ହେଲେ ଆମ ପୋଲିସ ଯେ ସାଧାରଣ ଲୋକଙ୍କ ସୁରକ୍ଷା ପାଇଁ ଦରକାର ପଡିଲେ ଯବାନଙ୍କ ପରି ନିଜ ଜୀବନକୁ ବାଜି ଲଗାଇ ଦେଇପାରେ, ତାହା କହି ଯାଉଥିଲା ମୁମ୍ବାଇ ପୋଲିସ ।
ଗୋଟିଏ ପଟେ ନର ସଂହାର କରି ଚାଲିଥିଲେ ଆତଙ୍କୀ, ଅନ୍ୟପଟେ ଏହାକୁ ସାମ୍ନା କରିବା ପାଇଁ ଅଣ୍ଟା ଭିଡିଥିଲା ମୁମ୍ବାଇ ପୋଲିସ । ଆରମ୍ଭ ହୋଇଥିଲା ଅପରେସନ୍ ବ୍ଲାକ ଟର୍ଣ୍ଣାଡୋ । ୪ ଦିନର ଅପରେସନ । ଏହାରି ଭିତରେ ୧୬୪ରୁ ଉର୍ଦ୍ଧ୍ୱ ଲୋକଙ୍କ ମୃତ୍ୟୁ ହୋଇ ସାରିଥିଲା । ହୋଟେଲ ତାଜରେ ବହୁ ଲୋକ ଫସି ରହିଥିଲେ । ୨୯ ନଭେମ୍ବର ୨୦୦୮ରେ ଶେଷ ହୋଇଥିଲା ଅପରେସନ୍ ।
ଏକମାତ୍ର ଆତଙ୍କୀ କସବ ହିଁ ଜୀବନ୍ତ ଧରା ପଡିଥିଲା । ଅନ୍ୟ ୯ ପାକିସ୍ତାନୀ ଆତଙ୍କବାଦୀଙ୍କୁ ସଫା କରିଦେଇଥିଲା ମୁମ୍ବାଇ ପୋଲିସ । ଆଉ ଆତଙ୍କବାଦୀଙ୍କୁ ସଫା କରିବାକୁ ଯାଇ ୨୨ଜଣ ସୁରକ୍ଷାକର୍ମୀ ସହିଦ ହୋଇଥିଲେ । ଦେଶ ଦେଖିଥିଲା ମୁମ୍ବାଇ ପୋଲିସର ତ୍ୟାଗ ଓ ବୀରତ୍ୱର କାହାଣୀ । ଆକ୍ରମଣରେ ୩ଶହରୁ ଉର୍ଦ୍ଧ୍ୱ ଲୋକେ ଗୁରୁତର ଆହତ ମଧ୍ୟ ହୋଇଥିଲେ ।
ଆତଙ୍କୀ କସବକୁ ଫାଶି ହୋଇସାରିଛି । ମୁମ୍ବାଇ ପୋଲିସ ଏବେ ବହୁ ଆଗକୁ ଗଲାଣି । ହେଲେ ୧୧ ବର୍ଷ ପୂର୍ବେ ଘଟିଥିବା ଏ ଘଟଣା ଆଜି ବି ମନେ ପଡିଲେ ଲୋମ ଟାଙ୍କୁରି ଉଠୁଛି । ଆତଙ୍କବାଦୀଙ୍କ ଚରାଭୂମି ପାଲଟିଥିବା ପାକିସ୍ତାନ ଉପରେ ଘୃଣା ସୃଷ୍ଟି ହେଉଛି । ମୁମ୍ବାଇ ପୋଲିସର ତ୍ୟାଗ ଏବଂ ବଳିଦାନକୁ ନେଇ ଗର୍ବ କରୁଛି ସମଗ୍ର ଦେଶ । ସହିଦଙ୍କୁ ସମସ୍ତେ ଦେଉଛନ୍ତି ଶ୍ରଦ୍ଧାଞ୍ଜଳି ।
ଆହୁରି ପଢନ୍ତୁ; ବିଶ୍ୱର ସର୍ବବୃହତ ଲିଖିତ ସମ୍ବିଧାନକୁ ୭୦ ବର୍ଷ: We The People Of India...
