'ଆରୋଗ୍ୟ ସେତୁ'ରେ ଅଛି କି ପ୍ରାଇଭେସି ଲିକର ଭୟ ? ସ୍ପଷ୍ଟ କଲା ଆପ୍

ଶୁଭଶ୍ରୀ ମହାପାତ୍ର, ଭୁବନେଶ୍ୱର:  Covid -19 ସଚେତନତା ପାଇଁ ସରକାର ବୈଷୟିକ ଜ୍ଞାନ କୌଶଳ ସହ ବିଭିନ୍ନ ପ୍ରକାର ଟେକ୍ନୋଲୋଜିର ସାହାଯ୍ୟ ନେଉଛନ୍ତି । ଅପ୍ରେଲ,୨ ତାରିଖରେ ଭାରତ ସରକାର ଲଞ୍ଚ କରିଥିଲେ ‘ଆରୋଗ୍ୟ ସେତୁ’ । ଏହି ଆପ୍ ମାଧ୍ୟମରେ ପ୍ରତ୍ୟେକ ବ୍ୟକ୍ତି କୋଭିଡ୍ ୧୯ ବା କୋରୋନା ଭାଇରସ୍ ସମ୍ପର୍କରେ ସବିଶେଷ ତଥ୍ୟ ପାଇପାରିବେ । ଆଖପାଖରେ କୋରୋନା ସଂକ୍ରମିତଙ୍କ ସଂଖ୍ୟା ନେଇ ତାଜା ଅପଡେଟ୍ ମଧ୍ୟ ପାଇପାରିବେ । ଲଞ୍ଚ ହେବାର କିଛି ଦିନ ଭିତରେ ହିଁ କୋଟି କୋଟି ୟୁଜର୍ସ ଏହାକୁ ଇନଷ୍ଟଲ କରିଥିଲେ । 
 
ଏହାରି ଭିତରେ ଫ୍ରାନ୍ସିସିସ୍ ସିକ୍ୟୁରିଟି ରିସର୍ଚ୍ଚର ଇଲିୟଟ ଏଲଡ଼ରସନ୍ ଟ୍ୱିଟ କରି ଜଣାଇଥିଲେ ଯେ, ‘ଆରୋଗ୍ୟ ସେତୁ’ରେ ସୁରକ୍ଷା ଜନିତ ସମସ୍ୟା ରହିଛି । ଏହି ଆପ୍ ବ୍ୟବହାର କାରଣରୁ ୯୦ମିଲିୟନ୍ ୟୁଜର୍ସଙ୍କ ପ୍ରାଇଭେସି ସାର୍ବଜନୀନ ହୋଇଛି ।
 
ଏଭଳି ଟ୍ୱିଟ୍ ପରେ ଆରୋଗ୍ୟ ସେତୁ ଆପ୍ ପକ୍ଷରୁ ସ୍ପଷ୍ଟୋକ୍ତି ରଖାଯାଇଛି । ଏଭଳି ସମସ୍ୟା ଦେଖାଯିବ ବୋଲି ପୂର୍ବରୁ ହ୍ୟାକରଙ୍କ ସହ ଆଲୋଚନା କରାଯାଇଥିଲା । ୟୁଜର୍ସଙ୍କ ବ୍ୟକ୍ତିଗତ ଗୋପନୀୟତା ଲିକ୍ ର କୌଣସି ସମ୍ଭାବନା ନଥିବା ଆଲୋଚନାରୁ ସ୍ପଷ୍ଟ ହୋଇଥିଲା ।

 
ବର୍ତ୍ତମାନ ପର୍ଯ୍ୟନ୍ତ୯ କୋଟିରୁ ଅଧିକ ଲୋକେ ଆରୋଗ୍ୟ ସେତୁ ଆପକୁ ଡ଼ାଉନଲୋଡ୍ କରିଛନ୍ତି ।  କୋରୋନା ଭାଇରସ ସଂକ୍ରମଣର ଆଶଙ୍କା ସମ୍ବନ୍ଧରେ ୟୁଜର୍ସଙ୍କୁ ସବିଶେଷ ତଥ୍ୟ ଦେଇଥାଏ, ‘ଆରୋଗ୍ୟ ସେତୁ’ । ଏହା ପୂର୍ବରୁ ରାହୁଲ ଗାନ୍ଧୀ ମଧ୍ୟ APPରେ ବ୍ୟକ୍ତିଗତ ଡାଟା ସୁରକ୍ଷାକୁ ନେଇ ପ୍ରଶ୍ନ ଉଠାଇଥିଲେ ।
 
‘ଆରୋଗ୍ୟ ସେତୁ’ ସମ୍ପର୍କରେ ସୋସିଆଲ୍ ମିଡ଼ିଆରେ ଅନେକ ଗୁଜବ ସୃଷ୍ଟି କରାଯାଉଛି  । ଏସବୁକୁ ବିଶ୍ୱାସ ନକରିବା ପାଇଁ  କେନ୍ଦ୍ର ସରକାରଙ୍କ ତରଫରୁ ଲୋକଙ୍କୁ ଅନୁରୋଧ କରାଯାଇଛି । ଆରୋଗ୍ୟ ସେତୁ ଆପ୍ଲିକେସନ୍ ଗୁଗୁଲ ପ୍ଲେ ଷ୍ଟୋର, ଆପଲ ଷ୍ଟୋର, ମେରି ସରକାର( ମୋ ଗାଁ) ୱେବସାଇଟରେ ଉପଲବ୍ଧ ଅଛି । ସୋସିଆଲ୍ ମିଡ଼ିଆରେ ଯଦି କେହି ଆରୋଗ୍ୟ ସେତୁ ଆପର ଲିଙ୍କ୍ ପଠାନ୍ତି, ତେବେ ଆଦୌ Click କରନ୍ତୁ ନାହିଁ । ଏହା ଭାଇରସ ହୋଇଥାଇପାରେ । ଏଭଳି ଲିଙ୍କ୍ ଆସିଲେ, ତୁରନ୍ତ ରିପୋର୍ଟ କରିବା ପାଇଁ ସରକାର ଅନୁରୋଧ କରିଛନ୍ତି ।