ସୁନ୍ଦରଗଡ଼ରୁ ଆଉ ଜଣେ କୋରୋନା ଆକ୍ରାନ୍ତ ଚିହ୍ନଟ

ଭୁବନେଶ୍ୱର: ରାଜ୍ୟରେ ୧୬୩ ନମ୍ବର କୋରୋନା ଆକ୍ରାନ୍ତ ଚିହ୍ନଟ । ନୂଆ ମାମଲାଟି ସୁନ୍ଦରଗଡ଼ର ବୋଲି ଜଣାପଡ଼ିଛି । ପୂର୍ବରୁ ସୁନ୍ଦରଗଡ଼ରେ ୧୦ ଜଣ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ଏବେ ପୁଣି ଏକ ମାମଲା ସାମ୍ନାକୁ ଆସିଛି । ଅର୍ଥାତ ଜିଲ୍ଲାରେ ଆକ୍ରାନ୍ତଙ୍କ ସଂଖ୍ୟା ଏବେ ୧୧ରେ ପହଞ୍ଚିଛି । ରାଜ୍ୟ ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଏନେଇ ସୂଚନା ଦିଆଯାଇଛି । 

ରାଜ୍ୟରେ ଏବେ ଆକ୍ରାନ୍ତଙ୍କ ସଂଖ୍ୟା ୧୬୩ ଥିବା ବେଳେ ସେମାନଙ୍କ ମଧ୍ୟରୁ ୬୦ ଜଣ ସୁସ୍ଥ ହେଲେଣି । ସେହିପରି ପୂର୍ବରୁ ଜଣଙ୍କ ମୃତ୍ୟୁ ହୋଇଛି । ଅର୍ଥାତ ଏବେ ୧୦୨ ଜଣ କୋରୋନା ଆକ୍ରାନ୍ତ ରାଜ୍ୟର ବିଭିନ୍ନ କୋଭିଡ ହସ୍ପିଟାଲରେ ଚିକିତ୍ସିତ ହେଉଛନ୍ତି । ଅନ୍ୟପଟେ ଆକ୍ରାନ୍ତଙ୍କ ମଧ୍ୟରେ ୧୧୫ ପୁରୁଷ ଥିବା ବେଳେ ୪୮ ମହିଳା ରହିଛନ୍ତି । 

ସେହିପରି ଏପର୍ଯ୍ୟନ୍ତ ରାଜ୍ୟର ୧୬ ଜିଲ୍ଲାକୁ କୋରୋନା ପଶିଲାଣି । ସର୍ବାଧିକ ଆକ୍ରାନ୍ତ ଯାଜପୁର(୪୮)ରେ ଚିହ୍ନଟ ହୋଇଛନ୍ତି । ୪୭ ଆକ୍ରାନ୍ତଙ୍କ ସହ ଖୋର୍ଦ୍ଧା ୨ ୟ ସ୍ଥାନରେ ରହିଛି । ସେହିପରି ୨୧ ଆକ୍ରାନ୍ତଙ୍କ ସହ ବାଲେଶ୍ୱର ୩ୟ ସ୍ଥାନରେ ଅଛି । ଅନ୍ୟ ଜିଲ୍ଲା ଗୁଡ଼ିକ ମଧ୍ୟରେ ଭଦ୍ରକରୁ ୧୯, ସୁନ୍ଦରଗଡରୁ ୧୧, କଳାହାଣ୍ଡିର ୨, କେନ୍ଦ୍ରାପଡ଼ାରୁ ୨, ବଲାଙ୍ଗୀରରୁ ୨, କେନ୍ଦୁଝରରୁ ୨, ଝାରସୁଗୁଡ଼ାରୁ ୨, ଗଞ୍ଜାମରୁ ୨, କୋରାପୁଟ, ପୁରୀ, କଟକ, ଦେବଗଡ, ଢେଙ୍କାନାଳରୁ ଜଣେ ଲେଖାଏଁ ଆକ୍ରାନ୍ତ ଚିହ୍ନଟ ହୋଇଛନ୍ତି ।