ଅଫେରା ଦୁନିଆରେ ବିଶ୍ୱେଶ ତୀର୍ଥ ସ୍ୱାମୀ, ମୋଦି କହିଲେ ମନେ ରହିବ...

ପେଜାୱର ମଠର ୩୨ତମ ମହନ୍ତ ଥିଲେ ସ୍ୱାମୀଜୀ

ଅଫେରା ଦୁନିଆରେ ବିଶ୍ୱେଶ ତୀର୍ଥ ସ୍ୱାମୀ, ମୋଦି କହିଲେ ମନେ ରହିବ...
ଫଟୋ ସୌଜନ୍ୟ: ସୋସିଆଲ ମିଡିଆ

ନୂଆଦିଲ୍ଲୀ: କର୍ଣ୍ଣାଟକ ପେଜାୱର ମଠର ମହନ୍ତ ବିଶ୍ୱେଶ ତୀର୍ଥ ସ୍ୱାମୀଙ୍କ ପରଲୋକ । ୮୮ ବର୍ଷ ବୟସରେ ସେ ଇହଧାନ ତ୍ୟାଗ କରିଛନ୍ତି । ରବିବାର ସକାଳୁ ଉଡ଼ୁପୀ ମଠରେ ସେ ଶେଷଥର ପାଇଁ ନିଶ୍ୱାସ ନେଇଥିଲେ । ଦୀର୍ଘ ଦିନ ହେଲା ଅସୁସ୍ଥ ଥିଲେ  ବିଶ୍ୱେଶ ତୀର୍ଥ ସ୍ୱାମୀ । ସ୍ୱାସ୍ଥ୍ୟରେ ଅବନତି କାରଣରୁ ଗତ ୨୦ ତାରିଖରୁ କେଏମସି ମେଡିକାଲରେ ତାଙ୍କୁ ଭର୍ତ୍ତି କରାଯାଇଥିଲା । ତାଙ୍କ ଇଚ୍ଛା ଅନୁସାରେ ତାଙ୍କୁ ରବିବାର ମଠକୁ ଅଣାଯାଇଥିଲା । ଆଉ ନିଜ ମଠରେ ହିଁ ସେ ଅନ୍ତିମ ଶ୍ୱାସ ନେଇଥିଲେ । ସ୍ୱାମୀଜୀଙ୍କ ମୃତ୍ୟୁ ପରେ ଗଭୀର ଶୋକବ୍ୟକ୍ତ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । 

ବିଶ୍ୱେଶ ତୀର୍ଥ ସ୍ୱାମୀ ଗଭୀର ଭାବରେ ନିମୋନିଆରେ ଆକ୍ରାନ୍ତ ଥିଲେ । ତାଙ୍କୁ ଜୀବନ ରକ୍ଷାକାରୀ ଯନ୍ତ୍ରରେ ରଖାଯାଇଥିଲା । ମେଡିକାଲର ଏକ ସ୍ୱତନ୍ତ୍ର ଡାକ୍ତରୀ ଦଳ ତାଙ୍କ ଚିକିତ୍ସା ଜାରି ରଖିଥିଲେ । ତେବେ ସବୁ ପ୍ରକାର ଉଦ୍ୟମ ସତ୍ତ୍ୱେ ତାଙ୍କ ସ୍ୱାସ୍ଥ୍ୟବସ୍ଥାରେ ଉନ୍ନତି ଆସିନଥିଲା । ଶନିବାର କର୍ଣ୍ଣାଟକ ମୁଖ୍ୟମନ୍ତ୍ରୀ ବିଏସ ୟେଦୁରପ୍ପା ମଧ୍ୟ ଡାକ୍ତରଖାନା ଯାଇ ତାଙ୍କ ସ୍ୱାସ୍ଥ୍ୟବସ୍ଥା ପଚାରି ବୁଝିଥିଲେ । 

ତେବେ ସ୍ୱାମୀଜୀଙ୍କ ମୃତ୍ୟୁ ଖବର ପାଇବା ପରେ ଗଭୀର ଶୋକବ୍ୟକ୍ତ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ସ୍ୱାମୀଜୀ ସେହିମାନଙ୍କ ହୃହୟରେ ସବୁବେଳେ ରହିବେ, ଯେଉଁମାନଙ୍କ ସେ ଭଲ ରାସ୍ତାରେ ଚାଲିବାକୁ ଶିଖେଇଥିଲେ ବୋଲି ମୋଦି କହିଛନ୍ତି । ସମାଜର ଉନ୍ନତି ପାଇଁ ତାଙ୍କର ବହୁ ଅବଦାନ ଥିବା କହିଛନ୍ତି ପ୍ରଧାନମନ୍ତ୍ରୀ । ସନ୍ଥ ଶ୍ରୀ ବିଶ୍ୱେଶ ତୀର୍ଥ ସ୍ୱାମୀ ପେଜାୱର ମଠର ୩୨ତମ ମହନ୍ତ ଥିଲେ । ଚଳିତ ବର୍ଷ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁରୁପୂର୍ଣ୍ଣିମା ଅବସରରେ ସ୍ୱାମୀଜୀଙ୍କୁ ଭେଟି ଆଶୀର୍ବାଦ ନେଇଥିଲେ ।