ପିଏମ କେୟାର ଫଣ୍ଡକୁ ନେଇ PIL, ଗ୍ରହଣ କରୁନି କୋର୍ଟ!

ନୂଆଦିଲ୍ଲୀ: ପିଏମ କେୟାର ଫଣ୍ଡକୁ ସୂଚନା ଅଧିକାର ଆଇନ(RTI) ପରସରଭୂକ୍ତ କରିବା ପାଇଁ ଦାଏର ହୋଇଥବା ଜନସ୍ୱାର୍ଥ ମାମଲାକୁ (PIL) ଖାରଜ କରିଛନ୍ତି ଦିଲ୍ଲୀ ହାଇକୋର୍ଟ | ଏଥିରେ ସ୍ୱଚ୍ଛତା ଆଣିବା ପାଇଁ ଏହାକୁ ଆରଟିଆଇ ପରିସରଭୂକ୍ତ କରିବାକୁ ଏକ ଯାଚିକା ମାଧ୍ୟମରେ ଆବେଦନ କରିଥିଲେ ଆବେଦନକାରୀ | ଏହା ଉପରେ ଶୁଣାଣି କରିବାକୁ ଯାଇ କୋର୍ଟ କହିଛନ୍ତି ପୂର୍ବରୁ ଏଭଳି ଏକ ମାମଲା କର୍ଣ୍ଣାଟକ ହାଇକୋର୍ଟରେ ପଡିରହିଛି |  

ଏନେଇ ଦିଲ୍ଲୀ ହାଇକୋର୍ଟରେ ଦାଏର ହୋଇଥିବା ଜନସ୍ୱାର୍ଥ ମାମଲାରେ କୁହାଯାଇଛି ପିଏମ କେୟାର ଫଣ୍ଡ ହେଉଛି ଏକ ପବ୍ଲିକ ଅଥରିଟି ଯାହା ସୂଚନା ଅଧିକାର ଅଧିନିୟମର ଧାରା ୨(ଏଚ) ଅନୁସାରେ କେଉଁ ସ୍ରୋତରୁ ଏହାର ପାଣ୍ଠି ସଗୃହୀତ ହେଉଛି ଏବଂ କିପରି ଏହାର ବିନିଯୋଗ କରାଯାଉଛି ତାହାର ବିବରଣୀ ସରକାରୀ ୱେବସାଇଟରେ ଉପଲବ୍ଧ କରିବା ଆବଶ୍ୟକ | ଏହି ଆବେଦନରେ ଏହା ମଧ୍ୟ ଦର୍ଶାଯାଇଛି ଯେ ସରକାରଙ୍କ ଦ୍ୱାରା ଅଧିକୃତ, ପରିଚାଳିତ, ପାଣ୍ଠି ଯୋଗାଣ ହେଉଥିବା ସଂସ୍ଥା ଆଟଟିଆଇ ପରିସରଭୂକ୍ତ ହେବା ଆବଶ୍ୟକ |

ଏହା ସହିତ ଆବେଦନକାରୀ ଏହା ମଧ୍ୟ ଦର୍ଶାଇଥିଲେ ଯେ,  କୋଭିଡ19ର ମୁକାବିଲା ପାଇଁ ପିଏମ କେୟାର ଫଣ୍ଡ ମାଧ୍ୟମରେ ସଗୃହୀତ ପାଣ୍ଠି ବାବଦରେ ଜାଣିବାର ଅଧିକାର କୋରୋନା ଆକ୍ରାନ୍ତଙ୍କ ରହିଛି | ଏହ ସହିତ କୋରୋନା ପଜିଟିଭ ଯାହାର ତୁରନ୍ତ ଆର୍ଥିକ ସହାୟତା ଆବଶ୍ୟକ ରହିଛି, ଯେଉଁମାନେ କୌଣସି ପଦପଦବୀରେ ନାହାଁନ୍ତି ସେମାନେ ଏହି ପାଣ୍ଠିର କାର୍ଯ୍ୟକାରିତା ବାବଦରେ ଅବଗତ ହେବାର ଆବଶ୍ୟକତା ରହିଛି | 

ଆବେଦନକାରୀ ଏହା ମଧ୍ୟ ଦର୍ଶାଇଥିଲେ ପିଏମ କେୟାର ଫଣ୍ଡ ବାବଦରେ କୌଣସି ସୂଚନା ଉପଲବ୍ଧ ନାହିଁ | ଯେଉଁଥିପାଇଁ ଏହା ସନ୍ଦେହ ଘେରରେ ରହିଛି | ଏ ସମ୍ପର୍କିତ କୌଣସି ତଥ୍ୟ ଉପଲବ୍ଧ ନାହିଁ | ପ୍ରାୟ ୨ ମାସ ମଧ୍ୟରେ ପିଏମ କେୟାର ଫଣ୍ଡକୁ ୧୦ ହଜାର କୋଟିର ସହାୟତା ଆସିଛି | ରାଷ୍ଟ୍ରାୟତ୍ତ ଉଦ୍ୟୋଗ, ବିଭିନ୍ନ କେନ୍ଦ୍ରୀୟ ମନ୍ତ୍ରଣାଳୟ, ସଶସ୍ତ୍ର ବାହିନୀ ଯବାନ, ପ୍ରଶାସନିକ ଅଧିକାରୀ, ନ୍ୟାୟିକ ବ୍ୟବସ୍ଥା ସହ ଜଡିତ ଲୋକଙ୍କ ପକ୍ଷରୁ ଏହି ପାଣ୍ଠିକୁ ସହାୟତା ପ୍ରଦାନ କରାଯାଇଥିଲା |