ଦେଶବାସୀଙ୍କୁ ଆଉ ୯ ମିନିଟ ସମୟ ମାଗିଲେ ମୋଦି

ନୂଆଦିଲ୍ଲୀ: କୋରୋନା ମୁକାବିଲା କ୍ଷେତ୍ରରେ ପ୍ରଧାନମନ୍ତ୍ରୀଙ୍କ ଆଉ ଏକ ସନ୍ଦେଶ । ଏହି ଲଢେଇରେ କେହି ଏକୁଟିଆ ନୁହଁନ୍ତି । ସମଗ୍ର ଦେଶ ଏକଜୁଟ ରହିଛି । ଆଉ ଏହି ବିଶ୍ୱାସକୁ ଉଜାଗର ରଖିବା ପାଇଁ ପୁଣି ଏକ ନିବେଦନ କରିଛନ୍ତି ମୋଦି । ଆସନ୍ତା ୫ ଏପ୍ରିଲ ରାତି ୯ଟାରେ ସମସ୍ତ ଲାଇଟ ବନ୍ଦ କରିବା ସହ ଘରର ଦ୍ୱାର କିମ୍ବା ବାଲକୋନୀରେ ଛିଡା ହୋଇ ୯ ମିନିଟ ପର୍ଯ୍ୟନ୍ତ ଆଲୁଅ ଜାଳିବାକୁ ପ୍ରଧାନମନ୍ତ୍ରୀ ଅପିଲ କରିଛନ୍ତି । ପୂର୍ବରୁ କୋରୋନା ଯୁଦ୍ଧାଙ୍କ ପାଇଁ ତାଳି ଓ ଥାଳି ବଜାଇବାକୁ ମଧ୍ୟ ମୋଦି ଅପିଲ କରିଥିଲେ । 

ଆଜି ଏକ ଭିଡିଓ ବାର୍ତ୍ତାରେ ଏଭଳି କିଛି ଅନୁରୋଧ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । କହିଛନ୍ତି, ''କୋରୋନା ସଙ୍କଟ ଯୋଗୁ ସୃଷ୍ଟି ହୋଇଥିବା ଅନ୍ଧକାର ଓ ଅନିଶ୍ଚିତତାକୁ ସମାପ୍ତ କରି ଆମକୁ  ଆଲୋକ ଏବଂ ନିଶ୍ଚିତତା ଆଡକୁ ଯିବାକୁ ପଡିବ । କୋରୋନା ସଙ୍କଟକୁ ଦୂର କରିବାକୁ ହେଲେ ଆମକୁ ଆଲୋକର ତୀବ୍ରତାକୁ ସବୁ ଦିଗରେ ବିସ୍ତାର କରିବାକୁ ପଡିବ । ଆସନ୍ତା ୫ ଏପ୍ରିଲ, ରବିବାର ଦିନ ରାତି ୯ଟାରେ ୧୩୦ କୋଟି ଭାରତୀୟଙ୍କୁ ସୁପର ପାୱାର୍ ଜାଗ୍ରତ କରିବାକୁ ହେବ ।'' 

On April 5, at 9 pm, light Diya, candle for 9 minutes to mark fight against coronavirus: Modi

Read @ANI Story | https://t.co/NTYxNUl8DC pic.twitter.com/NHcGrQTG2H

— ANI Digital (@ani_digital) April 3, 2020

ସେହି ସମୟରେ ଘରର ସମସ୍ତ ଆଲୁଅ ବନ୍ଦ କରିବା ସହ ଘରର ଦ୍ୱାର କିମ୍ବା ବାଲକୋନୀରେ ଛିଡ଼ା ହୋଇ ଏକ କ୍ୟାଣ୍ଡେଲ, ଦୀପ, ଫ୍ଲାସ୍ ଲାଇଟ୍ କିମ୍ବା ମୋବାଇଲ୍ ଫ୍ଲାସ୍ ଲାଇଟ୍ ୯ ମିନିଟ୍ ପାଇଁ ଜଳାଇବାକୁ ଅପିଲ କରିଛନ୍ତି ପ୍ରଧାନମନ୍ତ୍ରୀ । ମୋଦିଙ୍କ କହିବା କଥା ହେଲା, ଯଦି ଘରର ସମସ୍ତ ଲାଇଟ ହୋଇଥାଏ ଏବଂ ଏଭଳି କିଛି ଆଲୁଅ ସମସ୍ତଙ୍କ ଘର ସାମ୍ନାରେ ଜଳେ, ତେବେ ଆମକୁ ଆଲୋକର ଶକ୍ତି ଅନୁଭବ ହେବ । ଆମ ଭିତରେ ବିଶ୍ୱାସଟିଏ ହେବ ଯେ ଆମେ ସଂଗ୍ରାମ କରୁଛୁ । 

ତେବେ ଏଠାରେ ମୋଦି ବେଶ୍ ଗୁରୁତ୍ୱପୂର୍ଣ୍ଣ ଦିଗ ଉପରେ ମଧ୍ୟ ସମସ୍ତଙ୍କୁ ଚେତାଇ ଦେଇଛନ୍ତି । ପୂର୍ବଥର ତାଳି ଓ ଥାଳି ବାଜାଇବା ବେଳେ କିଛି ଲୋକ ଭିଡ଼ ବାନ୍ଧିଥିଲେ । ତେଣୁ ଏଥର ସେପରି କିଛି ନକରିବାକୁ ପ୍ରଧାନମନ୍ତ୍ରୀ କହିଛନ୍ତି । ନିଜ ଘର କବାଟ ପାଖରେ କିମ୍ବା ବାଲକୋନୀରେ ଛିଡ଼ା ହୋଇ ଆଲୁଅ ଜଳାଇବାକୁ କହିଛନ୍ତି ପ୍ରଧାନମନ୍ତ୍ରୀ ।