ପ୍ରଧାନମନ୍ତ୍ରୀଙ୍କ ସହିତ କୋରୋନା ମହାମାରୀ ସମ୍ପର୍କରେ ଆଲୋଚନା କଲେ ଏହି ରାଷ୍ଟ୍ର ମୁଖ୍ୟ

ନୂଆଦିଲ୍ଲୀ: ସମଗ୍ର ବିଶ୍ୱରେ ବର୍ତ୍ତମାନ କୋରୋନା ସଂକଟମୟ ପରିସ୍ଥିତି ସୃଷ୍ଟି କରିଛି । ଫଳରେ ବିଶ୍ୱର ଅନେକ ରାଷ୍ଟ୍ରକୁ ବର୍ତ୍ତମାନ ଭାରତ ସହାୟତାର ହାତ ବଢାଇଛି । ସେହିପରି ଅନ୍ୟ କିଛି ରାଷ୍ଟ୍ର ମୁଖ୍ୟଙ୍କ ସହିତ ଏହି ସଂକଟର ମୁକାବିଲା ନେଇ ପ୍ରଧାନମନ୍ତ୍ରୀ ଆଲୋଚନା କରିଛନ୍ତି । ଏହି କ୍ରମରେ ଆଜି ପ୍ରଧାନମନ୍ତ୍ରୀ ମୋଦି ଦକ୍ଷିଣ ଆଫ୍ରିକାର ରାଷ୍ଟ୍ରପତି କ୍ରିଲ ରାମାଫୋସାଙ୍କ  ସହିତ ଫୋନ ଯୋଗେ ଆଲୋଚନା କରିଥିବା ସୂଚନା ରହିଛି । ଏନେଇ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସୂଚନା ପ୍ରଦାନ କରାଯାଇଛି ।

ବିଶ୍ୱର ଦୁଇ ତୁଙ୍ଗ ନେତା ଏହି ମହାମାରୀକୁ କିପରି ସଫଳତାର ସହିତ ସାମ୍ନା କରାଯିବ ସେନେଇ ଦୀର୍ଘ ସମୟ ଫୋନ ଯୋଗେ ଆଲୋଚନା କରିଥିଲେ । ଏହା ସହିତ ଦୁଇ ନେତା ଆଞ୍ଚଳିକ ସମସ୍ୟା, ଘରୋଇ ଓ ବୈଶ୍ୱକ ମହାମାରୀ ସମ୍ପର୍କରେ ମଧ୍ୟ ଆଲୋଚନା କରିଥିଲେ । ଏହା ସହିତ ସେମାନଙ୍କ ସରକାର ମହାମାରୀ ମୁକାବିଲା କରିବା ପାଇଁ ନେଇଥିବା ପଦକ୍ଷେପ ସମ୍ପର୍କରେ ମଧ୍ୟ ଆଲୋଚନା କରିଥିଲେ । 

ମହାମାରୀର ମୁକାବିଲା ପାଇଁ ରାଷ୍ଟ୍ରପତିଙ୍କ ଦ୍ୱାରା ଗ୍ରହଣ କରାୟାଇଥିବା ସମସ୍ତ ସକ୍ରିୟ ପଦକ୍ଷେପକୁ ପ୍ରଧାନମନ୍ତ୍ରୀ ମୋଦି ବେଶ ପ୍ରଶଂସା କରିଛନ୍ତି । ଏହା ସହିତ ଏକ ଉତ୍ତମ ବନ୍ଧୁ ଭାବେ ଦକ୍ଷିଣ ଆଫ୍ରିକା ନିକଟରେ ଛିଡ଼ା ହେବ ବୋଲି ପ୍ରଧାନମନ୍ତ୍ରୀ ପ୍ରତିଶୃତି ଦେଇଛନ୍ତି । ଏହା ସହିତ ଏହି କୋରୋନା ମହାମାରୀ ବିପକ୍ଷରେ ଲଢିବା ପାଇଁ ଦକ୍ଷିଣ ଆଫ୍ରିକାକୁ ସହଯୋଗ କରିବ ବୋଲି ପ୍ରଧାନମନ୍ତ୍ରୀ କହିଛନ୍ତି ।