ତାଳି ଓ ଥାଳି ବଜାଇବା ପରି 'ହର ହର ମହାଦେବ' ନାରା ଦେବ ପଞ୍ଜାବ

ଚଣ୍ଡିଗଡ଼: ଦେଶର ଡାକ୍ତର, ସ୍ୱାସ୍ଥ୍ୟ କର୍ମଚାରୀ ଏବଂ ଅନ୍ୟାନ୍ୟ କର୍ମଚାରୀଙ୍କ ଆତ୍ମବିଶ୍ୱାସ ବଢ଼ାଇବା ପାଇଁ ତାଳି ଓ ଥାଳି ବଜାଇବାକୁ ଆହ୍ୱାନ କରିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏବେ ପଞ୍ଜାବ କଂଗ୍ରେସ ମଧ୍ୟ ଏମିତି କିଛି ତରିକା ଆପଣେଇଛି । ଆସନ୍ତା ୨୦ ଏପ୍ରିଲ ସନ୍ଧ୍ୟା ୬ଟାରେ 'ଜୟଘୋଷ ଦିବସ' ପାଳନ ପାଇଁ ଅପିଲ କରିଛି ଦଳ । ଏହି ସମୟରେ ପଞ୍ଜାବବାସୀ ଘରେ ରହି 'ଜୋ ବୋଲୋ ସୋ ନିହାଲ' ଏବଂ 'ହର ହର ମହାଦେବ' ନାରା ଲଗାଇବାକୁ  ଦଳ ପକ୍ଷରୁ କୁହାଯାଇଛି । 

ପଞ୍ଜାବ ପିସିସି ଅଧ୍ୟକ୍ଷ ସୁନୀଲ ଜାଖର ଏନେଇ ନିଜ ଚିଠିଲେ ଦର୍ଶାଇଛନ୍ତି, ଆମେ କ୍ୟାପଟେନ ଅମରିନ୍ଦର ସିଂହଙ୍କ ନେତୃତ୍ୱରେ କୋରୋନା ଯୁଦ୍ଧ ଲଢ଼ୁଛୁ । ଏପରିକି କୋରୋନା ଭାଇରସ୍ ପ୍ରଭାବକୁ ନିୟନ୍ତ୍ରଣ କରିବାରେ ମଧ୍ୟ ସଫଳ ହୋଇଛୁ । ସେ ଆହୁରି ମଧ୍ୟ ଲେଖିଛନ୍ତି, ''ମୁଖ୍ୟମନ୍ତ୍ରୀ କୋରୋନାର ମୁକାବିଲା ପାଇଁ ରିଲିଫ ପ୍ୟାକେଜ ପ୍ରଦାନ କରିବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ନିବେଦନ କରିଛନ୍ତି । ତେଣୁ ମୁଖ୍ୟମନ୍ତ୍ରୀ ଅମରିନ୍ଦର ସିଂହଙ୍କ ଦାବିକୁ କେନ୍ଦ୍ର ନିକଟରେ ପହଞ୍ଚାଇବା ଏବଂ ପୋଲିସ କର୍ମଚାରୀ, ଡାକ୍ତର ଓ ଅନ୍ୟ କର୍ମଚାରୀଙ୍କ ସହ ଏକତା ପ୍ରଦର୍ଶନ ପାଇଁ ଆସନ୍ତା ୨୦ ଏପ୍ରିଲରେ 'ଜୟଘୋଷ ଦିବସ' ପାଳନ କରିବାକୁ ଅପିଲ କରୁଛୁ ।'' 

କହିରଖୁଛୁ, ଭାରତରେ ଏବେ କୋରୋନା ଆକ୍ରାନ୍ତଙ୍କ ସଂଖ୍ୟା ୧୪୩୭୮ରେ ପହଞ୍ଚିଛି । ଏମାନଙ୍କ ମଧ୍ୟରୁ ୧୯୯୧ ଜଣ ସୁସ୍ଥ ହୋଇଥିବା ବେଳେ ୪୮୦ ଜଣଙ୍କ ମୃତ୍ୟୁ ହେଲାଣି । ଏବେ ୧୧୯୦୬ ଜଣ ଆକ୍ରାନ୍ତଙ୍କ ଚିକିତ୍ସା ଚାଲିଛି । କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଏନେଇ ସୂଚନା ଦିଆଯାଇଛି ।