ଡିଡିସିଏ ସଭାପତି ପଦ ଛାଡିଲେ ରଜତ, ଜାଣନ୍ତୁ କାରଣ

ଅସନ୍ତୋଷ ହେଲେ, ପଦ ଛାଡ଼ିଲେ

ଡିଡିସିଏ ସଭାପତି ପଦ ଛାଡିଲେ ରଜତ, ଜାଣନ୍ତୁ କାରଣ
ସୌଜନ୍ୟ: ସୋସିଆଲ ମିଡିଆ

ଭୁବନେଶ୍ୱର: ମାତ୍ର ୨୦ ମାସ ହେବ ଦିଲ୍ଲୀ ଓ ଜିଲ୍ଲା କ୍ରିକେଟ ଆସୋସିଏସନର ସଭାପତି ଭାବେ ଦାୟିତ୍ୱ ନେଇଥିବା ବରିଷ୍ଠ ଟିଭି ସାମ୍ୱାଦିକ ରଜତ ଶର୍ମା ଶନିବାର ନିଜ ପଦବୀରୁ ଇସ୍ତଫା ଦେଇଛନ୍ତି । ଇସ୍ତଫା ଦେବା ପରେ ଟ୍ୱିଟ କରି ସମସ୍ତଙ୍କୁ କୃତଜ୍ଞତା ଜଣାଇଛନ୍ତି ରଜତ । ଇସ୍ତଫା ଦେବାର କାରଣ ଦର୍ଶାଇ ସେ କହିଛନ୍ତି ଯେ ତାଙ୍କୁ ବିଭିନ୍ନ ମହଲରୁ ବିଭିନ୍ନ ପ୍ରକାରର ଚାପ ଦିଆଯାଉଥିଲା । ଆଉ କ୍ରିକେଟ ପରି ଏକ ମହାନ କ୍ରୀଡ଼ାରେ ଅନେକଙ୍କ ବ୍ୟକ୍ତିଗତ ସ୍ୱାର୍ଥ ପାଇଁ ମହାନ କ୍ରୀଡ଼ାର ପରମ୍ପରା ନଷ୍ଟ ହେଉଥିବା କଥା କହିଛନ୍ତି ରଜତ । ଆଉ ପ୍ରକାଶ କରିଛନ୍ତି ତୀବ୍ର ଅସନ୍ତୋଷ । ଆଗକୁ ମଧ୍ୟ ରଜତ କୈଣସି ବି କାରଣରୁ  ନିଜର ନିଷ୍ପତ୍ତି ସହିତ ସାଲିସ କରିବେ ନାହିଁ ବୋଲି ମଧ୍ୟ ମତବ୍ୟକ୍ତ କରିଛନ୍ତି । 

ରଜତ ନିଜର ଟ୍ୱିଟର ଏକାଉଣ୍ଟରେ 'ମୁଁ ଆଜି ନିଜ ଡିଡିସିଏ ପଦବୀରୁ ଇସ୍ତଫା ଦେଇଛି ଓ ଇସ୍ତଫାପତ୍ର ସର୍ବୋଚ୍ଚ ପରିଷଦକୁ ପଠାଇଛି । ମୁଁ ସମସ୍ତଙ୍କୁ ମୋର କୃତଜ୍ଞତା ଜଣାଇବା ସହିତ ମୋ କାର୍ଯ୍ୟକାଳ ସମୟରେ ସମସ୍ତଙ୍କର ସାହାଯ୍ୟ ସମର୍ଥନ ପାଇଁ ଧନ୍ୟବାଦ ଜଣାଉଛି' । ଆଉ ସମସ୍ତଙ୍କୁ ଆଗାମୀ ଦିନ ପାଇଁ ଶୁଭେଚ୍ଛା ମଧ୍ୟ ଜଣାଇଛନ୍ତି ରଜତ ।  ଦିଲ୍ଲୀର କ୍ରିକେଟ ପ୍ରଶାସନ ସବୁ ସମୟରେ ବିଭିନ୍ନ ପ୍ରକାର ଚାପରେ ଚାଲୁଥିବା ଏବଂ ବ୍ୟକ୍ତିଗତ ସ୍ୱାର୍ଥ ପାଇଁ କ୍ରିକେଟର ମହତ୍ୱ ନଷ୍ଟ ହେଉଥିବା ବୟାନ ଦେଇଛନ୍ତି ରଜତ ।

'ଏସବୁ ଦେଖିଲା ପରେ ମୋତେ ଲାଗୁନି ମୁଁ ମୋ ନୀତି ସାଧୁତା, ସ୍ୱଚ୍ଛତା ଓ ଆଦର୍ଶ ସହ ସାଲିସ କରି ଆଗକୁ ଦାୟିତ୍ୱ ସମ୍ଭାଳି ପାରିବି । ' ରଜତ ଏହା ମଧ୍ୟ କହିଛନ୍ତି ଯେ ଅରୁଣ ଜେଟଲୀଙ୍କ ସମର୍ଥନ ପରେ ମୁଁ କାର୍ଯ୍ୟଭାର ନିଜ କାନ୍ଧକୁ ନେଇଥିଲି ମାତ୍ର ତାଙ୍କର ମୃତ୍ୟୁ ପରେ ବିଭିନ୍ନ ଆଡୁ ସେ ସମର୍ଥନ ହରାଇଥିବା କହିଛନ୍ତି ।

ରଜତ ଇସ୍ତଫାପତ୍ର ଦେବା ପରେ ଏବେ ନାନା କଥା ଚର୍ଚ୍ଚା ଜୋର ଧରିଛି । ତେବେ କିଏ ଓ କାହା ବ୍ୟକ୍ତିଗତ ସ୍ୱାର୍ଥ ପୂରଣ କରିବାରେ ଅତିଷ୍ଠ ହୋଇପଡ଼ିଥିଲେ ରଜତ ଓ ଏହିପରି ଚାପ ସବୁ କ୍ରିକେଟ ସଂଘ ଉପରେ ପଡ଼ୁନାହିଁ ତ ବୋଲି ବିଭିନ୍ନ ମହଲରେ ଚର୍ଚ୍ଚାର ବିଷୟ ପାଲଟିଛି ।