ନବଜାତ ଶିଶୁର ମୃତଦେହ ଉଦ୍ଧାର, ଜୀବିତ ଅବସ୍ଥରେ ଫୋପାଡ଼ି ଦେଇଥିଲେ !

ଫୁଲବାଣୀ: ବାଲିଗୁଡ଼ା ଥାନା ବୁଡ଼ାଗୁଡ଼ା ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର ନିକଟ ନେଡ଼ିପାଙ୍ଗା ଗ୍ରାମର କାଡ଼ଗି ନାଳରୁ ନବଜାତ ଶିଶୁର ମୃତ ଦେହ ଉଦ୍ଧାର । ମୃତ ଶିଶୁକୁ ପୋଲିସ ଉଦ୍ଧାର କରି ବାଲିଗୁଡା ଉପଖଣ୍ଡ ସ୍ୱାସ୍ଥ୍ୟ କେନ୍ଦ୍ରକୁ ବ୍ୟବଚ୍ଛେଦ ପାଇଁ ପଠାଇଛି । ଏହାସହ ପୋଲିସ ନିଜଆଡ଼ୁ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି । 

ଯାହା କୁହାଯାଉଛି, ଗତକାଲି ସକାଳେ କେହି ଜୀବିତ ନବଜାତ ଶିଶୁକୁ ବୁଡ଼ାଗୁଡା ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର ଠାରୁ ମାତ୍ର ୫୦୦ ମିଟର ଦୂର ନେଡ଼ିପାଙ୍ଗା ଗ୍ରାମର କାଡ଼ଗି ନାଳରେ ପକାଇ ଚାଲିଯାଇଥିଲା । ଆଉ ସ୍ଥାନୀୟ ଲୋକେ ମଧ୍ୟ ଜୀବିତ ନବଜାତ ଶିଶୁଟି ନାଳରେ ପଡ଼ିଥିବା ଦେଖିବାକୁ ପାଇଥିଲେ । ମାତ୍ର ଭୟରେ ପାଖ ମାଡ଼ିନଥିଲେ । ଶେଷରେ ନବଜାତ ଶିଶୁଟିର ମୃତ୍ୟୁ ହୋଇଥିଲା । ବୁଡ଼ାଗୁଡା ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରର କର୍ମଚାରୀମାନେ ସନ୍ଧ୍ୟାରେ ଖବର ପାଇ ଘଟଣା ସ୍ଥଳେ ପହଞ୍ଚିଥିଲେ । ମଧ୍ୟରାତ୍ରିରେ ବାଲିଗୁଡ଼ା ପୋଲିସ ନବଜାତ ଶିଶୁର ମୃତ ଦେହକୁ ଉଦ୍ଧାର କରିଥିଲା । 

ସେପଟେ ପୋଲିସ ପକ୍ଷରୁ ଏହି ଘଟଣାର ତଦନ୍ତ ଜଣେ ଡିଏସପି କରୁଥିବା ଜଣାପଡିଛି । ଆଉ ସ୍ଥାନୀୟ ଅଙ୍ଗନବାଡି କର୍ମୀମାନେ ଘରକୁ ଘର ବୁଲି ସମସ୍ତ ଗର୍ଭବତୀ ମହିଳାଙ୍କ ତଦନ୍ତ କରୁଛନ୍ତି । ତେବେ କିଏ ଆଉ କେଉଁ ଅବସ୍ଥାରେ ନବଜାତ ଶିଶୁଟିକୁ ଜୀବିତ ଅବସ୍ଥାରେ ନାଳରେ ପକାଇ ଚାଲିଗଲା, ତାକୁ ନେଇ ଅନେକ ପ୍ରଶ୍ନ ସୃଷ୍ଟି ହୋଇଛି ।