ନା ନିର୍ମୋହୀ, ନା ୱକଫ ବୋର୍ଡ, ନା ରାମଜନ୍ମଭୂମି ନ୍ୟାସ, ଜାଣନ୍ତୁ କାହାକୁ ମିଳିଛି ବିବାଦୀୟ ଜମି

ନୂଆଦିଲ୍ଲୀ: ଅଯୋଧ୍ୟା ମାମଲାରେ ସୁପ୍ରିମକୋର୍ଟରୁ ଐତିହାସିକ ରାୟ ପ୍ରକାଶ ପାଇଛି । ପ୍ରଧାନ ବିଚାରପତିଙ୍କ ଅଧ୍ୟକ୍ଷତାରେ ୫ ଜଣିଆ ସାମ୍ୱିଧାନିକ ପୀଠ ବିବାଦୀୟ ଜମି ଉପରେ ନିଜ ରାୟ ପ୍ରଦାନ କରିଛନ୍ତି । ବିବାଦୀୟ ଜମି ଉପରେ ରାମଲଲା ବିରାଜମାନର ଅଧିକାର କଥା ସ୍ୱୀକାର କରିଛନ୍ତି ସର୍ବୋଚ୍ଚ କୋର୍ଟ । ନିଜ ରାୟରେ କୋର୍ଟ କହିଛନ୍ତି ଯେ ବିବାଦୀୟ ଜମି ଉପରେ ରାମଲଲାଙ୍କ ଦାବି ଯଥାର୍ଥ । ଏହି ଜମି ଉପରେ ମନ୍ଦିର ନିର୍ମାଣର ରୂପରେଖା ପ୍ରସ୍ତୁତ କରିବା ପାଇଁ କେନ୍ଦ୍ର ସରକାରଙ୍କୁ ୩ ମାସରେ ଟ୍ରଷ୍ଟ ଗଠନ କରିବାର ଆଦେଶ ଦେଇଛନ୍ତି କୋର୍ଟ । କେନ୍ଦ୍ର ସରକାର ହିଁ ଟ୍ରଷ୍ଟର ସଦସ୍ୟଙ୍କ ନାଁ ନିର୍ଦ୍ଧାରିତ କରିବେ ।

ରାୟରେ ସୁପ୍ରିମକୋର୍ଟ ନିର୍ମୋହୀ ଅଖାଡ଼େର ଦାବିକୁ ଖାରଜ କରି ଦେଇଛନ୍ତି । ଏହାସହ ସୁନ୍ନି ୱକଫ ବୋର୍ଡକୁ ମସଜିଦ ନିର୍ମାଣ କରିବା ପାଇଁ ୫ ଏକର ବିକଳ୍ପ ଜମି ଦେବାର ଆଦେଶ ଦେଇଛନ୍ତି କୋର୍ଟ । ଏହି ବିକଳ୍ପ ଜମି କେନ୍ଦ୍ର ସରକାର ଓ ଯୋଗୀ ସରକାର ଅଯୋଧ୍ୟାରେ ଦେବେ । ରାମଜନ୍ମଭୂମି ନ୍ୟାସକୁ ମଧ୍ୟ ଜମିର ମାଲିକାନ ଅଧିକାର ମିଳି ନାହିଁ । ନିଜ ରାୟରେ କୋର୍ଟ କହିଛନ୍ତି ଯେ ବିବାଦୀୟ ଜମିର ବାହ୍ୟ ଓ ଆଭ୍ୟନ୍ତରୀଣ ଅଂଶ ଉପରେ ରାମଲଲାଙ୍କ ଅଧିକାର ରହିଛି । ଏଥିପାଇଁ ଏକ ଟ୍ରଷ୍ଟ ଗଠନ କରାଯାଉ ।

ଏହାସହ ନିଜ ଅଧ ଘଣ୍ଟାର ରାୟରେ ବିଭିନ୍ନ ଦିଗ ଉପରେ ଆଲୋକପାତ କରିଥିଲେ ପ୍ରଧାନ ବିଚାରପତି ରଞ୍ଜନ ଗୋଗୋଇ । ପ୍ରତ୍ନତତ୍ତ୍ୱର ରିପୋର୍ଟ ଆଧାରରେ ଦ୍ୱାଦଶ ଶତାବ୍ଦୀରେ ଏଠାରେ ମନ୍ଦିର ଥିଲା ବୋଲି କହିଛନ୍ତି କୋର୍ଟ । ତେବେ ମନ୍ଦିର ଭାଙ୍ଗି ମସଜିତ ହୋଇଥିବା ନେଇ କୌଣସି ପ୍ରମାଣ ନାହିଁ ବୋଲି ଅଦାଲତ ସ୍ପଷ୍ଟ କରିଥିଲେ । ଅଯୋଧ୍ୟା ଭଗବାନ ରାମଙ୍କ ଜନ୍ମଭୂମି । ହିନ୍ଦୁମାନଙ୍କ ଏହି ବିଶ୍ୱାସ ରହିଛି । ହିନ୍ଦୁମାନଙ୍କ ବିଶ୍ୱାସକୁ ଅଣଦେଖା କରାଯାଇପାରିବନି । ମାତ୍ର କୌଣସି ଆସ୍ଥା ଓ ବିଶ୍ୱାସକୁ ନେଇ କୋର୍ଟ ରାୟ ଦେବେ ନାହିଁ ବୋଲି କହିଥିଲେ ଜଷ୍ଟିସ ଗୋଗୋଇ ।