ପୃଥିବୀର ନିକଟତର ହେଉଛି ଉଲକାପିଣ୍ଡ...

ଭୁବନେଶ୍ୱର: ଚଳିତ ମାସ ୨୯ ତାରିଖରେ ପୃଥିବୀର ନିକଟତର ହେବ ବିରାଟକାୟ ଉଲକା ପିଣ୍ଡ । ଏନେଇ ବିଭିନ୍ନ ମହାକାଶ ସଂସ୍ଥା ପକ୍ଷରୁ ଆକଳନ କରାଯାଇଛି । ଆମେ ଜାଣୁ ଅନେକ ଗୁଡିଏ ଗ୍ରହାଣୁ ବା ଉଲକାପିଣ୍ଡ ମଙ୍ଗଳ ଓ ବୃହସ୍ପତ୍ତି ଗ୍ରହ କକ୍ଷ ମଧ୍ୟରେ ସୂର୍ଯ୍ୟ କୁ ପରିକ୍ରମା କରୁଛନ୍ତି । ଏମାନଙ୍କ ସଂଖ୍ୟା ଲକ୍ଷ ଲକ୍ଷ ଓ ଆକାରରେ ୧ ମିଟରରୁ ଆରମ୍ଭ ହୋଇ ଶହ ଶହ କିଲୋମିଟର ପର୍ଯ୍ୟନ୍ତ ହୋଇଥାଏ । ତେବେ ବେଳେବେଳ ଏହି ଗ୍ରହାଣୁ ଗୁଡିକ ପୃଥିବୀର ମାଧ୍ୟକର୍ଷଣ ଶକ୍ତି ଦ୍ବାରା ପୃଥିବୀ ଆଡକୁ ଆକର୍ଷିତ ହୋଇଥାନ୍ତି । ସେଥିରୁ ୯୯ ପ୍ରତିଶତ ପୃଥିବୀ ପୃଷ୍ଠରେ ପଡିବା ପୂର୍ବରୁ ବାୟୁମଣ୍ଡଳରେ ପୋଡି ପାଉଁଶ ହୋଇଯାଇଥାଏ । ତେବେ ବଡ ଗ୍ରହାଣ ପୃଥିବୀରେ ପଡିଲେ ବିପୁଳ କ୍ଷୟକ୍ଷତି ଘଟାଇବାର ସମ୍ଭାବନା ରହିଛି । ତେବେ ଆସନ୍ତା ୨୯ ତାରିଖରେ ଯେଉଁ ଗ୍ରହାଣୁ ଆସୁଛି ତାହା ପୃଥିବୀ ମଧ୍ୟରେ ଧକ୍କା ହେବାର ସମ୍ଭାବନା ନଥିବା ଏକ ପ୍ରକାର ଆକଳନ କରାଯାଇଛି ।

ଗ୍ରହାଣୁ ଧକ୍କାରେ ଧ୍ବଂସ ହୋଇଯିବ କି ପୃଥିବୀ ? ଲୋପ ପାଇଯିବ କି ଜୀବଜଗତ ? କଣ ସତରେ ଉଲକା ପିଣ୍ଡ ପୃଥିବୀକୁ ଭସ୍ମ କରିଦେବ ? ଆସନ୍ତା ୨୯ ତାରିଖରେ ପୃଥିବା ଆଡକୁ ମାଡି ଆସୁଥିବା ବିରାଟ ଗ୍ରହାଣୁକୁ ନେଇ ଆକଳନ ହେବା ପରେ ଲୋକ ମାନଙ୍କ ମନରେ ଏପରି ଅନେକ ପ୍ରଶ୍ନ ଉଙ୍କି ମାରୁଥିଲା । ଯାହାକୁ ନେଇ ଏବେ ଚିତ୍ର ସ୍ପଷ୍ଟ ହୋଇଯାଇଛି । ବାସ୍ତବରେ ଏକ ବିଶାଳକାୟ ଗ୍ରହାଣୁ ଏପ୍ରିଲ ମାସ ଶେଷ ଆଡକୁ ପୃଥିବୀର ନିକଟତର ହେବ । ଯାହାର ନାମ କରଣ କରାଯାଇଛି ‘ଗ୍ରହାଣୁ ୫୨୭୬୮ ୧୯୯୮ ଓଆର୦୨’। 

ଏପ୍ରିଲ ୨୯ ତାରିଖ ଭାରତୀୟ ସମୟ ଅପରାହ୍ନ ୪ଟା ୨୮ ମିନିଟରେ ଏହା ପୃଥିବୀର ସର୍ବନିମ୍ନ ନିକଟତର ହେବାର ସମ୍ଭାବନା ରହିଛି । ସେତେବେଳେ ଏହାର ଦୂରତା ପ୍ରାୟ ୬ ନିୟୁତ କିଲୋମିଟର ଅର୍ଥାତ ପୃଥିବୀ ଓ ଚନ୍ଦ୍ର ମଧ୍ୟରେ ଦୂରତାର ପ୍ରାୟ ୧୬ ଗୁଣା । ଏହାର ହାରାହାରି ବେଗ ଘଣ୍ଟା ପ୍ରତି ୩୧ ହଜାର ୩୨୦ କିଲୋମିଟର ରହିଛି । ଆକଳନ ଅନୁଯାୟୀ ଏହା ୧୮ଶହ ମିଟର ଚଉଡା ଏବଂ ୪ କିଲୋମିଟର ଲମ୍ବା ଯାହା ହିମାଳୟ ପର୍ବତ ଠାରୁ ୧୦ ଗୁଣା ବଡ ।

୨୦୨୦ ମସିହା ମାର୍ଚ୍ଚ ୫ ତାରିଖ ସୁଦ୍ଧା ଜ୍ୟୋତିର୍ବିଜ୍ଞାନୀ ଓ ବୈଜ୍ଞାନୀକ ମାନଙ୍କ ଦ୍ବାର ପୃଥିବୀ ନିକଟରେ ୨୦ କୋଟିରୁ ଅଧିକ ଏପରି ପିଣ୍ଡମାନ ଠାବ କରାଯାଇ ତାର ଆକାର, ଗଠନ, ତଥା କକ୍ଷପଥ ଗଣନା କରାଯାଇ ଧକ୍କା ନେଇ ଆକଳନ କରି ତାଲିକା ପ୍ରସ୍ତୁତ କରାଯାଉଛି । ବର୍ତ୍ତମାନ ସୁଦ୍ଧା ୨ ହଜାରଟି ଏପରି ପିଣ୍ଡ ଠାବ କରାଯାଇଛି ଯ଼ାହା ଭବିଷ୍ୟତରେ ପୃଥିବୀ ସହ ଧକ୍କା ହେବାର ସମ୍ଭାବନା ରହିଛି ସେସବୁର ଗତିବିଧି ଉପରେ କଡା ନଜର ରଖାଯାଇଛି । ତେବେ ଆସନ୍ତା ୨୯ରେ ଆସିବାକୁ ଥିବା ଗ୍ରହାଣୁ ଏବଂ ପୃଥିବୀ ମଧ୍ୟରେ ଧକ୍କା ହେବାର କୌଣସି ସମ୍ଭାବନା ନଥିବା ସ୍ପଷ୍ଟ ବୋଲି ଉପ ନିର୍ଦ୍ଦେଶକ କହିଛନ୍ତି ।