କେନ୍ଦ୍ରୀୟ କର୍ମଚାରୀଙ୍କ ଦରମା କାଟ ନେଇ କୌଣସି ପ୍ରସ୍ତାବ ନାହିଁ: ଜିତେନ୍ଦ୍ର ସିଂହ

ନୂଆଦିଲ୍ଲୀ: କେନ୍ଦ୍ରୀୟ କର୍ମଚାରୀଙ୍କ ଦରମା କାଟ ନେଇ କୌଣସି ପ୍ରସ୍ତାବ ନାହିଁ। ଏନେଇ ଚାଲିଥିବା ଚର୍ଚ୍ଚା ଉପରେ ପୂର୍ଣ୍ଣଚ୍ଛେଦ ଟାଣିଛନ୍ତି ପ୍ରଧାନମନ୍ତ୍ରୀ କାର୍ଯ୍ୟାଳୟ ଦାୟିତ୍ୱରେ ଥିବା ମନ୍ତ୍ରୀ ଜିତେନ୍ଦ୍ର ସିଂହ। ଏଭଳି ମିଛ ଖବର ଉପରେ  ଧ୍ୟାନ ନଦେବାକୁ ସେ ଜଣାଇଛନ୍ତି। 

ଏନେଇ ପ୍ରତିକ୍ରିୟା ରଖି କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂହ କହିଛନ୍ତି ଏଭଳି ଖବର ସୋସିଆଲ ମିଡିଆର ବହୁଳ ଭାବେ ଭାଇରାଲ ହେଉଛି। କେନ୍ଦ୍ର ସରକାରଙ୍କ ଅଧିନରେ କାର୍ଯ୍ୟରତ କର୍ମଚାରୀଙ୍କ ଦରମା କାଟ ନେଇ କୌଣସି ପ୍ରସ୍ତାବ ନାହିଁ କିମ୍ବା ଏନେଇ କୌଣସି ପଦକ୍ଷେପ ନିଆଯାଇନାହିଁ। 

ପୂର୍ବରୁ ଅର୍ଥ ମନ୍ତ୍ରଣାଳୟ ପକ୍ଷରୁ କେନ୍ଦ୍ରୀୟ କର୍ମଚାରୀଙ୍କ ମହଙ୍ଗା ଭତ୍ତା ଏବଂ ପେନସନଧାରୀଙ୍କ ଡିଅରନେସ ରିଲିଫ ଆସନ୍ତାବର୍ଷ ଜୁଲାଇ ପର୍ଯ୍ୟନ୍ତ ବଢାଯିବ ନାହିଁ ନିଷ୍ପତ୍ତି ହୋଇଥିଲା । କୋରୋନା ମହାମାରୀକୁ ଦୃଷ୍ଟିରେ ରଖି ଏପରି ନିଷ୍ପତ୍ତି ନିଆଯାଇଥିଲା। ଚଳିତ ବର୍ଷ ଜାନୁଆରୀ ପହିଲାରୁ ଆସନ୍ତାବର୍ଷ ଜୁନ ୩୦ ତାରିଖ ପର୍ଯ୍ୟନ୍ତ କୌଣସି ବକେୟା ପ୍ରଦାନ କରାଯାଇ ପାରିବ ନାହିଁ ବୋଲି ମନ୍ତ୍ରଣାଳୟ ପକ୍ଷରୁ ଜାରି ହୋଇଥିବା ନିର୍ଦ୍ଦେଶନାମାରେ କୁହାଯାଇଥିଲା।