ଗୁଜବ ହେଲା କାଳ, ଏକାଠି ହେଲେ ଶତାଧିକ ଶ୍ରମିକ

ମୁମ୍ବାଇ: ଦେଶରେ କୋରୋନା ସ୍ଥିତି ସଂକଟମୟ ପରିସ୍ଥିତି ସୃଷ୍ଟି କରିଛି। କୋରୋନାକୁ ପ୍ରତିହତ କରିବା ପାଇଁ ଦେଶରେ ଲକଡାଉନ ସ୍ଥିତି ଜାରି ରହିଛି। ମଙ୍ଗଳବାର ପ୍ରଥମ ପର୍ଯ୍ୟାୟ ଲକଡାଉନ ଶେଷ ହୋଇଥିବା ବେଳେ ପ୍ରଧାନମନ୍ତ୍ରୀ ମୋଦି ଏହାକୁ ଆସନ୍ତ ମେ ୩ ତାରିଖକୁ ବୃଦ୍ଧି କରିଛନ୍ତି। ତେବେ ଏହାରି ମଧ୍ୟରେ ଛାତିଥରା ଦୃଶ୍ୟ ମହାରାଷ୍ଟ୍ରର ବାନ୍ଦ୍ରାରୁ ଆସିଛି।  

ଆଜି ହଜାର ହଜାର ପ୍ରବାସୀ ଶ୍ରମିକମାନେ ଲକଡାଉନ ନିୟମ ଭାଙ୍ଗି ବାନ୍ଦ୍ରା ଷ୍ଟେସନରେ ପହଞ୍ଚିଥିଲେ। କିଛି ମୂହୁର୍ତ୍ତ ମଧ୍ୟରେ ବାନ୍ଦ୍ରା ଷ୍ଟେସନ ଓ ଏହାର ଆଖପାଖ ଅଞ୍ଚଳରେ ଶ୍ରମିକମାନେ ପହଞ୍ଚିଥିଲେ। ଫଳରେ ସେମାନଙ୍କ ଭିଡ଼ ମହାରାଷ୍ଟ୍ରରେ କୋରୋନା ଭୟକୁ ଦ୍ୱିଗୁଣିତ କରିଛି। ତେବେ ଶ୍ରମିକମାନଙ୍କ କହିବା ମୁତାବକ ଆଜିଠୁ ଟ୍ରେନ ଚଳାଚଳ ତଥା ସେମାନଙ୍କୁ ଖାଦ୍ୟ ଯୋଗାଇ ଦିଆଯିବା ନେଇ ସୂଚନା ମିଳିଥିଲା। ଫଳରେ ନିଜ ଘରକୁ ଫେରିବା ପାଇଁ ବାନ୍ଦ୍ରା ଷ୍ଟେସନର ଭିଡ଼ ଲଗାଇଥିଲେ।  

ତେବେ ଭିଡ଼ ଲଗାଇଥିବା ଶ୍ରମିକଙ୍କ ମଧ୍ୟରୁ ଅଧିକାଂଶ ଅନ୍ୟ ରାଜ୍ୟର। ସେମାନେ ରୋଜଗାର ଆଶାରେ ଏଠାକୁ ଚାଲି ଆସିଥିଲେ। ଏହି ପ୍ରବାସୀ ଶ୍ରମିକଙ୍କ କହିବା ମୁତାବକ, ଲକଡାଉନ ସମୟରେ ଖାଇବା ପିଇବା ତଥା ରହିବା ପାଇଁ ଅନେକ ସମସ୍ୟା ସୃଷ୍ଟି ହେଉଛି। ତାଙ୍କୁ ସୂଚନା ଦିଆଯାଇଥିଲା ଯେ ୧୪ ତାରିଖ ଠାରୁ ଟ୍ରେନ ଚଳାଚଳ କରିବ। ଫଳରେ ସେମାନେ ନିଜ ଘରକୁ ଫେରିବା ପାଇଁ ଆସିଥିଲେ।

ସେପଟେ ଶ୍ରମିକମାନଙ୍କ ଏହି ଭିଡ଼କୁ ନିୟନ୍ତ୍ରଣ କରିବା ପାଇଁ ପୋଲିସକୁ ନାକେଦମ ହେବାକୁ ପଡ଼ିଛି। ଏପରିକି ସେମାନଙ୍କୁ ଘଉଡ଼ାଇବା ପାଇଁ ପୋଲିସକୁ ଲାଠିମାଡ଼ ମଧ୍ୟ କରିବାକୁ ପଡ଼ିଛି। ସୂଚନା ଯୋଗ୍ୟ ମହାରାଷ୍ଟ୍ରରେ ସର୍ବାଧିକ କୋରୋନା ଆକ୍ରାନ୍ତଙ୍କ ମାମଲା ସାମ୍ନାକୁ ଆସିଛି। ଏପରିକି ମହାରାଷ୍ଟ୍ରରେ ହିଁ କୋରୋନା ମୃତ୍ୟୁ ସଂଖ୍ୟା ସର୍ବାଧିକ ରହିଛି। ବର୍ତ୍ତମାନ ସୁଦ୍ଧା କୋରୋନାରେ ୧୬୦ ଜଣଙ୍କ ମୃତ୍ୟୁ ହୋଇଥିବା ବେଲେ ୨୩୩୪ ଜଣ ଆକ୍ରାନ୍ତ ଥିବା ଜଣାପଡ଼ିଛି।