close

खास खबरें सिर्फ आपके लिए...हम खासतौर से आपके लिए कुछ चुनिंदा खबरें लाए हैं. इन्हें सीधे अपने मेलबाक्स में प्राप्त करें.

ଅଯୋଧ୍ୟାରେ 'ନୂଆ ସକାଳ'

ବିବାଦମୁକ୍ତ ବିବାଦ

ଅଯୋଧ୍ୟାରେ 'ନୂଆ ସକାଳ'
ସୌଜନ୍ୟ: ସୋସିଆଲ ମିଡିଆ

ଚାରୁ ଚନ୍ଦନ ଦାଶ, ଭୁବନେଶ୍ୱର: ୧୯୮୯ ମସିହା ଆଜିର ଦିନରେ ବର୍ଲିନର ପ୍ରସିଦ୍ଧ ପ୍ରାଚୀର ଭାଙ୍ଗି ଦୁଇଟି ଚିନ୍ତାଧାରା ପରସ୍ପର ସହ ଯୋଡ଼ି ହୋଇଥିଲା । ୧୯୪୫ରେ ଜର୍ମାନ ଆତ୍ମ ସମର୍ପଣ କରିବା ପରେ ବିଶ୍ୱଯୁଦ୍ଧ ସମାପ୍ତ ହୋଇଥିଲା । ସେତିକିବେଳେ ଜର୍ମାନର ପୂର୍ବ ଅଞ୍ଚଳରେ ରାଜଧାନୀ ବର୍ଲିନ ସହର ଥିଲା । ସେଠାରେ ରୁଷୀୟ ଲୋକ ତଥା କମ୍ୟୁନିଷ୍ଟ ସପକ୍ଷବାଦୀମାନେ ଦୃଢ଼ ଭାବେ ଆସ୍ଥାନ ଜମେଇଥିଲେ । ଏହାପରେ ସମଗ୍ର ଜର୍ମାନକୁ ୪ ଭାଗରେ ବିଭକ୍ତ କରାଯାଇଥିଲା । ପୂର୍ବ ଜର୍ମାନର କମ୍ୟୁନିଷ୍ଟ ଅଧ୍ୟୁଷିତ ଅଞ୍ଚଳକୁ ସୋଭିଏତ ରୁଷକୁ ଦେଇ ବାକି ପଶ୍ଚିମାଞ୍ଚଳକୁ ଆମେରିକା, ବ୍ରିଟେନ ଓ ଫ୍ରାନ୍ସ ଅଧୀନରେ ରଖାଯାଇଥିଲା । ଫଳରେ ପଶ୍ଚିମ ବର୍ଲିନର ଅର୍ଥନୀତିରେ ଧୀରେ ଧୀରେ ସୁଧାର ହେବାରେ ଲାଗିଲା ଏବଂ ଶକ୍ତିଶାଳୀ ମଧ୍ୟ ହେଲା । କିନ୍ତୁ କମ୍ୟୁନିଷ୍ଟ ଅଧ୍ୟୁଷିତ ଅଞ୍ଚଳ ପୂର୍ବ ବର୍ଲିନରେ ଉତ୍କଟ ଦରିଦ୍ର ସମସ୍ୟା ଦେଖା ଦେବାରେ ଲାଗିଲା । ସେଥିପାଇଁ ପୂର୍ବ ଜର୍ମାନୀରୁ ଶହ ଶହ ଶରଣାର୍ଥୀ ପଶ୍ଚିମ ଜର୍ମାନୀକୁ ବର୍ଲିନ ବାଟ ଦେଇ ଯିବାରେ ଲାଗିଲେ । ଏହାପରେ ପଶ୍ଚିମ ଜର୍ମାନରେ ମୁକ୍ତ ଅର୍ଥନୀତି, ଉଦାରବାଦୀ ଶାସନର ପ୍ରଚଳନ ହେତୁ ଉନ୍ନତିର ସୋପାନ ଉଠି ଚାଲିଥିବା ସମୟରେ ପୂର୍ବ ଜର୍ମାନ କିନ୍ତୁ ରକ୍ଷଣଶୀଳ ଶାସନ ଅଧୀନରେ ରହି ରୁଷିଆ ଦ୍ୱାରା ଶୋଷିତ ହେବାରେ ଲାଗିଲା । ଏହାପରେ ରୁଷିଆ, ପୂର୍ବ ଜର୍ମାନର ଏକଛତ୍ରବାଦ ଶାସକଙ୍କୁ ତାଙ୍କ ଦେଶରୁ ଲୋକଙ୍କ ଦେଶାନ୍ତର ରୋକିବାକୁ ବର୍ଲିନ ସହର ଦେଇ ଏକ ପ୍ରାଚୀର ନିର୍ମାଣ କରିବାକୁ ସ୍ଥିର କଲା । ପ୍ରାଚୀର ନିର୍ମାଣ ମଧ୍ୟ ହେଲା । କିନ୍ତୁ ପଶ୍ଚିମ ଜର୍ମାନର ଅର୍ଥନୈତିକ ବିକାଶ ତୀବ୍ର ମାତ୍ରାରେ ବଢ଼ି ଚାଲିଥିବାବେଳେ ପୂର୍ବ ଜର୍ମାନ ରୁଷ ଉପରେ ଅଧିକ ନିର୍ଭରଶୀଳ ହେବାରେ ଲାଗିଲା । ଫଳରେ ପୂର୍ବ ଜର୍ମାନର ଅର୍ଥନୀତି ନିମ୍ନଗାମୀ ହେବାରେ ଲାଗିଲେ । ରୁଷର କଠୋରପନ୍ଥୀ ଶାସନ ଯୋଗୁ ଲୋକମାନେ ଅତିଷ୍ଠ ହୋଇପଡ଼ିଲେ । ଏହାପରେ ସୋଭିଏତ ରାଷ୍ଟ୍ର ସଂଘର ପ୍ରବଳ ବିଦ୍ରୋହ ଯୋଗୁ ରୁଷ ଆଉ ପୂର୍ବ ଜର୍ମାନ ଉପରେ ସେତେଟା ଦୃଷ୍ଟି ଦେଇ ପାରିଲାନି । ଏହାପରେ ପୂର୍ବ ଜର୍ମାନରେ ଥିବା ଲୋକମାନେ ପୁଣି ଥରେ ପଶ୍ଚିମ ଜର୍ମାନ ସହ ମିଶିବାକୁ ସ୍ଥିର କଲେ । ପଶ୍ଚିମ ଜର୍ମାନ ମଧ୍ୟ ପୂର୍ବ ଜର୍ମାନ ସହ ମିଶିବାକୁ ଚାହିୁଁଥିଲା । ଏହାପରେ ଜାତିସଂଘ ମଧ୍ୟସ୍ଥତା କରିବା ପରେ ଦୁଇ ରାଷ୍ଟ୍ର ପୁଣି ଥରେ ଏକାଠି ହୋଇଥିଲେ ଏବଂ ୧୯୮୯ ମସିହା ନଭେମ୍ୱର ୯ ତାରିଖରେ ପ୍ରସିଦ୍ଧ ବର୍ଲିନ ପ୍ରାଚୀର ଭଙ୍ଗା ଯାଇଥିଲା । ଦୁଇଟି ବୀପରିତ ଚିନ୍ତାଧାରା ପୁଣି ଥରେ ଏକାଠି ହୋଇ ଏକ ନୂଆ ସଂକଳ୍ପ କରିଥିଲେ ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶବାସୀଙ୍କୁ ସମ୍ୱୋଧିତ କରି ସେହି ଘଟଣାକୁ ମନେ ପକାଇଛନ୍ତି । ଅଯୋଧ୍ୟା ମାମଲାରେ ସୁପ୍ରିମକୋର୍ଟ ଐତିହାସିକ ରାୟ ଶୁଣାଇବା ପରେ ପ୍ରଧାନମନ୍ତ୍ରୀ ସନ୍ଧ୍ୟାରେ ଦେଶବାସୀଙ୍କୁ ସମ୍ୱୋଧିତ କରିଥିଲେ । ଏହାସହ ସୁପ୍ରିମକୋର୍ଟଙ୍କ ରାୟକୁ ସ୍ୱାଗତ ମଧ୍ୟ କରିଥିଲେ । ତେବେ ଦୀର୍ଘ ୭୦ ବର୍ଷର ଅଯୋଧ୍ୟା ବିବାଦ ଆଜି ବିବାଦ ମୁକ୍ତ ହୋଇଛି । ଅଧ ଘଣ୍ଟିଆ ଫଇସଲା ଶୁଣାଇ ସୁପ୍ରିମକୋର୍ଟ ପବିତ୍ର ରାମ ଜନ୍ମଭୂମିକୁ ବିବାଦମୁକ୍ତ କରିଛନ୍ତି । ଚାଳିଶ ଦିନର ମାରାଥନ ଶୁଣାଣି ପରେ ଶେଷରେ ସମାଧାନ କରି ସର୍ବୋଚ୍ଚ ନ୍ୟାୟାଳୟ ୧୩୦ କୋଟି ଜନତାଙ୍କ ମନରୁ ଦ୍ୱନ୍ଦ୍ୱର ପରଦା ହଟାଇ ଦେଇଛନ୍ତି । ତେବେ ଅଯୋଧ୍ୟା ପ୍ରସଙ୍ଗରେ ସୁପ୍ରିମକୋର୍ଟ ରାୟ ଶୁଣାଇ ବିବାଦୀୟ ଜମିରେ ରାମ ମନ୍ଦିର ନିର୍ମାଣ ନେଇ ଫଇସଲା ଶୁଣାଇଛନ୍ତି । ସେହିପରି ମୁସଲମାନ ପକ୍ଷକୁ ବିକଳ୍ପ ଭାବେ ୫ ଏକର ଜମି ଯୋଗାଇ ଦେବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି । ସେହିପରି ଅଯୋଧ୍ୟାରେ ମସଜିଦ୍ ନିର୍ମାଣ କରିବାରେ ସହାୟତା କରିବାକୁ କୋର୍ଟ କେନ୍ଦ୍ର ଓ ଉତ୍ତର ପ୍ରଦେଶ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି । ତିନି ଜଣ ମଧ୍ୟସ୍ଥିଙ୍କୁ କୋର୍ଟ ପ୍ରଶଂସା କରିବା ସହ ଟ୍ରଷ୍ଟ ଗଠନ କରିବାକୁ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେଇଛନ୍ତି ।
ତେବେ ରାମ ମନ୍ଦିର ଏଠାରେ ନିର୍ମାଣ ହେବା ନେଇ ବାଟ ଫିଟିଯିବା ପରେ ଏହାର ସ୍ୱରୁପ ଭବ୍ୟ ହେବା ନେଇ ଖସଡ଼ା ପ୍ରସ୍ତୁତ ହୋଇସାରିଛି । ଦୁଇ ମହଲା ବିଶିଷ୍ଟ ଏହି ମନ୍ଦିରର ଲମ୍ୱ ୨୬୮ ଫୁଟ, ଚଉଡ଼ା ୧୪୦ ଫୁଟ୍ ଏବଂ ଉଚ୍ଚତା ୧୨୮ ଫୁଟ୍ ହେବ । ଏହି ମନ୍ଦିରରେ ମୋଟ ୨୧୨ଟି ସ୍ତମ୍ଭ ରହିବ । ପ୍ରଥମ ମହଲାରେ ରହିବ ୧୦୬ଟି ସ୍ତମ୍ଭ ପ୍ରତ୍ୟେକ ସ୍ତମ୍ଭରେ ୧୬ଟି ଲେଖାଏଁ ମୂର୍ତ୍ତି ରହିବ । ସେହିପରି ସିଂହ ଦ୍ୱାର, ନୃତ୍ୟ ମଣ୍ଡପ, ରଙ୍ଗ ମଣ୍ଡପ, କୋଲି, ଗର୍ଭଗୃହ ଆଦି ମନ୍ଦିରରେ ରହିବ ।  ଏଥିସହ ଗର୍ଭଗୃହର ଚାରିପଟେ ହେବାକୁ ଥିବା ପରିକ୍ରମା ମାର୍ଗର ଚଉଡ଼ା ୧୦ ଫୁଟ୍ ରହିବ । ଅଯୋଧ୍ୟାରେ ଏବେ ମହଜୁଦ ପ୍ରସ୍ତାବିତ ରାମ ମନ୍ଦିରର ମଡେଲକୁ ଆପଣ ଦେଖିପାରିବେ.. 

ବର୍ତ୍ତମାନ ସୁଦ୍ଧା ରାମ ମନ୍ଦିରର ତଳଭାଗରେ ଲାଗିବାକୁ ଥିବା ପଥରର ଖୋଦେଇ କାମ ସମ୍ପୂର୍ଣ୍ଣ ହୋଇସାରିଛି । ଜାତିର ବିସ୍ତାର ପାଇଁ ମୋଗଲ ସମ୍ରାଟ ବାବର ମସଜିଦ ନିର୍ମାଣ କରିବାକୁ ମନ୍ଦିର ଭାଙ୍ଗିଥିବା ଇତିହାସ କୁହେ । ବାବରଙ୍କ ସମୟରେ ଏଠାରେ ମସଜିଦ ନିର୍ମାଣ କରାଯାଇଥିବାରୁ ଏହାକୁ ବାବ୍ରି ମସଜିଦ ବୋଲି କୁହାଯାଏ । ଏହାପରେ ଧୀରେ ଧୀରେ ବିବାଦ ଘେରକୁ ଟାଣି ହୋଇଥିଲା ଏହି ପବିତ୍ର ସ୍ଥାନ । ସାମ୍ପ୍ରଦାୟିକ ଦଙ୍ଗା ଭିତରେ ବାରମ୍ୱାର ପେଶି ହେଉଥିଲା ଅଯୋଧ୍ୟା ମାଟି । ବ୍ରିଟିଶ ଶାସନ ସମୟରେ ୧୮୫୩ରେ ଏହି ସ୍ଥାନରେ ସାମ୍ପ୍ରଦାୟିକ ଦଙ୍ଗା ହେବା ପରେ ୧୮୫୯ରେ ବ୍ରିଟିଶ ଶାସକ ଏହି ସ୍ଥାନରେ ବାଡ଼ ପକାଇ ଦେଇଥିଲେ । ଏହାପରେ ସେହି ପ୍ରାଙ୍ଗଣ ଭିତର ଭାଗରେ ମୁସଲମାନଙ୍କୁ ଓ ବାହାରେ ହିନ୍ଦୁଙ୍କୁ ପ୍ରାର୍ଥନା କରିବାକୁ ଅନୁମତି ମିଳିଥିଲା । ଏହାପରେ ଏହି ପବିତ୍ର ମାଟି ପାଲଟିଗଲା ବିବାଦୀୟ ସ୍ଥାନ ।

୧୯୯୦ ଦଶକରେ ଏହି ମାମଲା ଚେର ଧରିବାରେ ଲାଗିଥିଲା । ଏହାକୁ ନେଇ ସାରା ଦେଶରେ ଚର୍ଚ୍ଚା ଜୋର ଧରିଥିଲା ଆଉ ବିବାଦ ଉତ୍ତରପ୍ରଦେଶ ସୀମାକୁ ଲଙ୍ଘି ଦେଶର ଅନ୍ୟ ରାଜ୍ୟକୁ ବ୍ୟାପିଲା । ଏହି ସମୟରେ ହିଁ ରାଜନୀତିରେ ଲଗାତାର ନୂଆ ପ୍ରୟୋଗମାନ ହେବାରେ ଲାଗିଲା । କେବେ ସମୀକରଣ ବନୁଥିଲା ତ ଆଉ କେବେ ବିଗିଡ଼ୁଥିଲା ।  ଶେଷରେ ଫଳ ଏହା ହୋଇଥିଲା, ରାଜନୈତିକ ଦଳଗୁଡ଼ିକ ଏ ବିବାଦକୁ ରାଜନୀତିର ଜରିଆ ବନାଇଦେଲେ । ଆଉ ପରବର୍ତ୍ତୀ ସମୟରେ ଏହା ଆଜେଣ୍ଡାରେ ସାମିଲ ହୋଇଗଲା ।
ସୁପ୍ରିମକୋର୍ଟଙ୍କ ରାୟ ପରେ କିନ୍ତୁ ଏବେ ଆଉ ଏସବୁ ଦେଖାଦେବନି । ଏଣିକି ବଦଳିଯିବ ଅଯୋଧ୍ୟାର ଭବିଷ୍ୟତ । ଦୁନିଆ ଦେଖିବ ରାମ ଜନ୍ମଭୂମିର ଚିତ୍ର ଆଉ ଲେଖାଯିବ ଏଠି ସଦଭାବନାର ନୂଆ ଅଧ୍ୟାୟ । ଆସନ୍ତାକାଲି ଅଯୋଧ୍ୟା ଦେଖିବ ଏକ ନୂଆ ସକାଳ । ଅଯୋଧ୍ୟାର ମାଟି, ପାଣି, ପବନ ସବୁଥିରେ ଶାନ୍ତି, ମୈତ୍ରୀର ମହକ ଥିବ । ଦୀର୍ଘ ତିରିଶ ବର୍ଷ ତଳେ ଜର୍ମାନରେ ଲେଖାଯାଇଥିବା ସେହି ଇତିହାସର ପୁନରାବୃତ୍ତି ଅଯୋଧ୍ୟାରେ ଦେଖାଯିବ । ଦୁଇଟି ବୀପରିତ ଚିନ୍ତାଧାରା ପୁଣି ଥରେ ଏକାଠି ହାତ ମିଳାଇ ନୂଆ ସଦଭାବନା ପ୍ରତିଷ୍ଠା କରିବେ । ବିବାଦଯୁକ୍ତ ଅଯୋଧ୍ୟାରେ ବିବାଦମୁକ୍ତର ହସ ଫୁଟି ଉଠିବ ।