ଚାଲିଚାଲି ମହାରାଷ୍ଟ୍ରରୁ ମଧ୍ୟପ୍ରଦେଶ ଫେରୁଥିଲେ ଶ୍ରମିକ, ଟ୍ରେନ ମାଡ଼ିଯାଇ ୧୬ ଜଣଙ୍କ ମୃତ୍ୟୁ

ଔରଙ୍ଗାବାଦ: କୋରୋନାର ଭୟାବହତ ଭିତରେ ମହାରାଷ୍ଟ୍ରରୁ ଆସିଲା ଅତି ଦୁଃଖଦ ଖବର । ପ୍ରବାସୀ ଶ୍ରମିକମାନେ ରେଳ ଟ୍ରାକରେ ଚାଲି ଚାଲି ଘରକୁ ଫେରୁଥିବା ବେଳେ ଟ୍ରେନ ମାଡ଼ିଯାଇଛି । ଫଳରେ ୧୬ ଜଣ ଶ୍ରମିକଙ୍କ ମୃତ୍ୟୁ ହୋଇଛି । ସେହିପରି ୪ ଜଣ ଗୁରୁତର ଆହତ ମଧ୍ୟ ହୋଇଛନ୍ତି । ଲକଡାଉନ ଯୋଗୁ ମହାରାଷ୍ଟ୍ରରେ ଫସି ରହିଥିବା ଏ ଶ୍ରମିକମାନେ ରାତି ସାରା ଚାଲିଚାଲି ନିଜ ରାଜ୍ୟ ମଧ୍ୟପ୍ରଦେଶ ଅଭିମୁଖେ ଯାଉଥିଲେ । ତେବେ ବଦନାପୁର ଏବଂ କରମାଡ ଷ୍ଟେସନ ମଧ୍ୟରେ ଏହି ଦୁର୍ଘଟଣା ଘଟିଛି । 

ଯାହା କୁହାଯାଉଛି,  ଏହି ଘଟଣା ଆଜି ଭୋରରୁ ଘଟିଛି । ୨୦ ପ୍ରବାସୀ ଶ୍ରମିକ ମହାରାଷ୍ଟ୍ର ଔରଙ୍ଗାବାଦରୁ ନିଜ ରାଜ୍ୟ ମଧ୍ୟପ୍ରଦେଶ ଅଭିମୁଖେ ବାହାରିଥିଲେ । ଏମାନେ ସମସ୍ତ ଜାଲନା ଅଞ୍ଚଳରେ ଏକ ଫ୍ୟାକ୍ଟ୍ରିରେ କାମ କରୁଥିଲେ । ତେବେ ଲକଡାଉନ୍ କାରଣରୁ ରେଳ ଟ୍ରାକରେ ଚାଲିଚାଲି ଘରକୁ ଫେରୁଥିଲେ । ତେବେ ଏକ ମାଲବାହୀ ଟ୍ରେନ ମାଡ଼ି ଯିବାରୁ ୧୬ ଜଣଙ୍କ ଘଟଣା ସ୍ଥଳରେ ହିଁ ମୃତ୍ୟୁ ହୋଇଛି । ୪ ଜଣ ଗୁରୁତର ଆହତ ହୋଇଛନ୍ତି । ସମସ୍ତ ଆହତଙ୍କୁ ଉଦ୍ଧାର କରିବା ସହ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇଛି । ଘଟଣାସ୍ଥଳର ଦୃଶ୍ୟ ଅତି ଲୋମଟାଙ୍କୁରା । ପ୍ରବାସୀ ଶ୍ରମିକମାନେ ନିଜ ସାଥିରେ ନେଇ ଆସିଥିବା ଖାଦ୍ୟ ପଦାର୍ଥ ମଧ୍ୟ ଛିଟିକି ପଡ଼ିଛି । ଘଟଣାର ତଦନ୍ତ ଆରମ୍ଭ ହୋଇଛି । 

ତେବେ ଏ ସମସ୍ତ ଶ୍ରମିକ ମଧ୍ୟପ୍ରଦେଶର ସଡୋଲ ଓ ଉମରିଆ ଜିଲ୍ଲାର ବୋଲି ପ୍ରାଥମିତ ତଦନ୍ତରୁ ଜଣାପଡ଼ିଛି । ଏମାନେ ସମସ୍ତ ଜାଲନା ଏସଆରସି ଷ୍ଟିଲ କମ୍ପାନୀରେ କାମ କରୁଥିଲେ । ଗତକାଲି ସନ୍ଧ୍ୟା ୭ଟାରେ କମ୍ପାନୀରୁ ଏମାନେ ବାହାରିଥିଲେ । ଏକଥା ମଧ୍ୟ କୁହାଯାଉଛି, ପ୍ରବାସୀ ଶ୍ରମିକମାନେ ରାତି ସାରା ଚାଲିବା ପୁରେ କ୍ଳାନ୍ତ ହୋଇ ରେଳ ଟ୍ରାକରେ ଶୋଇ ପଡ଼ିଥିଲେ । ଫଳରେ ଟ୍ରେନ ଆସିବା ନେଇ ଜାଣିପାରି ନ ଥିଲେ । ତେବେ ଆଜି ଭୋର ୫.୨୨ରେ ଏହି ଦୁର୍ଘଟଣା ଘଟିଥିବା ଜଣାପଡ଼ିଛି । 

Extremely anguished by the loss of lives due to the rail accident in Aurangabad, Maharashtra. Have spoken to Railway Minister Shri Piyush Goyal and he is closely monitoring the situation. All possible assistance required is being provided.

— Narendra Modi (@narendramodi) May 8, 2020

ତେବେ ଏହି ଘଟଣାକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦୁଃଖପ୍ରକାଶ କରିଛନ୍ତି । ଔରଙ୍ଗାବାଦ ଘଟଣାକୁ ନେଇ ମୁଁ ବହୁତ ଦୁଖିତ ହୋଲି କହିଛନ୍ତି ପ୍ରଧାନମନ୍ତ୍ରୀ । ଏହି ଘଟଣାକୁ ନେଇ ରେଳ ମନ୍ତ୍ରୀ ପୀୟୁଷ ଗୋୟଏଙ୍କ ସହ କଥା ହୋଇଥିବା ପ୍ରଧାନମନ୍ତ୍ରୀ ଟ୍ୱିଟ କରି ଜଣାଇଛନ୍ତି । ସହାୟତା ପାଇଁ ମଧ୍ୟ ପ୍ରତିଶ୍ରୁତି ଦେଇଛନ୍ତି ।