close

खास खबरें सिर्फ आपके लिए...हम खासतौर से आपके लिए कुछ चुनिंदा खबरें लाए हैं. इन्हें सीधे अपने मेलबाक्स में प्राप्त करें.

ଅପରାଧୀଙ୍କ ଚରାଭୂଇଁ ପାଲଟିଛି ଧାମନଗର

ସପ୍ତାହେ ଭିତରେ ଦୁଇ ଦୁଇଟି ଅଘଟଣ ଧାମନଗର ମଥାରେ କଳଙ୍କ ବୋଳିଛି

ଅପରାଧୀଙ୍କ ଚରାଭୂଇଁ ପାଲଟିଛି ଧାମନଗର
ଫଟୋ ସୌଜନ୍ୟ: ସୋସିଆଲ ମିଡିଆ

ଧାମନଗର: ସପ୍ତାହେ ଭିତରେ ଦୁଇ ଦୁଇଟି ଅଘଟଣ ଧାମନଗର ମଥାରେ କଳଙ୍କ ବୋଳିଛି । ଖୁଲମଖୁଲା ଚାଲିଛି ଅପରାଧ । ଆଉ ପୋଲିସର ବି ସେମିତି କିଛି ଖାସ୍ କାର୍ଯ୍ୟାନୁଷ୍ଠାନ ଦେଖିବାକୁ ମିଳୁନି । ଅଞ୍ଚଳରେ ନାରୀଙ୍କ ପ୍ରତି ଅପରାଧ ବଢ଼ି ବଢ଼ି ଚାଲିଛି । କଅଁଳ କିଶୋରୀଙ୍କ ଜୀବନ ସହ ଖେଳ ଖେଳୁଛନ୍ତି ଅସାମାଜିକ ଯୁବକ । 

ଶନିବାର ନଭେମ୍ବର ୨ ତାରିଖ, ଅପରାହ୍ଣ ସମୟ । ଧାମନଗର ଅର୍ଜୁନପୁର ନିକଟ କୋଚିଳା ନଦୀ ପୋଲ ପାଖରୁ ଜଣେ ନବମ ଶ୍ରେଣୀ ଛାତ୍ରୀଙ୍କୁ ମୁମୂର୍ଷୁ ଅବସ୍ଥାରେ ଉଦ୍ଧାର କରାଗଲା । ୨ ଯୁବକ ତାଙ୍କୁ ଉଦ୍ଧାର କରି ୧୦ କିଲୋମିଟର ଦୂର ଧାମନଗର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କଲେ । ହେଲେ ଡାକ୍ତରଖାନାର ବେଡ୍ ଉପରେ ଝିଅଟି ପଡ଼ିଥିବାବେଳେ ୨ ଯୁବକ ଫେରାର ହୋଇଗଲେ । ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ଡାକ୍ତର ତୁରନ୍ତ ଝିଅକୁ ଭଦ୍ରକ ପଠାଇ ଦେଲେ। ଭଦ୍ରକରେ ସ୍ଥିତି ସଂଗିନ ହେବାରୁ ତାକୁ କଟକ ସ୍ଥାନାନ୍ତର କରାଗଲା । ଆଉ ଚିକିତ୍ସାବେଳେ ୩ ତାରିଖ ସକାଳେ ଝିଅଟିର ମୃତ୍ୟୁ ହୋଇଗଲା ।

ଝିଅର ମୃତ୍ୟୁ ପରେ ଯାଜପୁର ଅହିୟାସ ଅଞ୍ଚଳର ପରିବାର ଲୋକେ ମଙ୍ଗଳପୁର ଥାନାରେ ରେପ୍ ଆଣ୍ଡ ମର୍ଡର ଅଭିଯୋଗ କଲେ । ଅଭିଯୋଗ ଅନୁସାରେ, ଧାମନଗର ଅଞ୍ଚଳର ଜଣେ ଯୁବକ ତାଙ୍କ ଝିଅକୁ ଅପହରଣ କରି ନେଇ ଦୁଷ୍କର୍ମ କରିବା ପରେ ପିଟି ପିଟି ହତ୍ୟା କରିଛି । ଏଥିରେ ସଂପୃକ୍ତ ଯୁବକଙ୍କୁ ତା'ର ସାଙ୍ଗ ସହଯୋଗ କରିଛି ବୋଲି ମୃତ ଝିଅର ବାପା ଏତଲାରେ ଦର୍ଶାଇଛନ୍ତି । ପରିବାର ଲୋକଙ୍କ ଏତଲା ଆଧାରରେ ଯାଜପୁର ମଙ୍ଗଳପୁର ଥାନା ପୋଲିସ ତଦନ୍ତ କରୁଛି ।  ଧାମନଗର ପୋଲିସ ଜଣକୁ ଗିରଫ କରି ମଙ୍ଗଳପୁର ପୋଲିସକୁ ହସ୍ତାନ୍ତର କରିଛି । ମୋଟ ୨ ଜଣକୁ ପୋଲିସ ଗିରଫ କରିଥିଵାବେଳେ ମୁଖ୍ୟ ଅଭିଯୁକ୍ତ ଫେରାର ଅଛି ।
ଏଇ ଘଟଣାକୁ ନେଇ ଧାମନଗରରେ ଉଦବେଗ ପ୍ରକାଶ ପାଇଥିଲା। କିଛି ସାମାଜିକ କର୍ମୀ ଘଟଣାର ନିରପେକ୍ଷ ତଦନ୍ତ ପାଇଁ ଦାବି କରି ଭଦ୍ରକ ଏସପି ଓ ପୂର୍ବାଞ୍ଚଳ ଆଇଜିଙ୍କୁ ଟ୍ୱିଟ କରିଥିଲେ । ଆଇଜିଙ୍କୁ ଟ୍ୱିଟ୍ ପରେ ଭଦ୍ରକ ପୋଲିସ ହଡବଡ଼େଇ ଯାଇ ନିଜ ମୁଣ୍ଡରୁ ଦାୟିତ୍ୱ ଖସାଇବାକୁ ଚେଷ୍ଟା ବି କଲା । ଘନା ସହ ଭଦ୍ରକ ଜିଲ୍ଲାର ସଂପର୍କ ନାହିଁ କହି ଚୁପ୍ ବସିଗଲେ ଏସପି । ପରେ ସାମାଜିକ କର୍ମୀ ପୁଣି ଆଇଜିଙ୍କୁ ଗୁହାରି କରିବାରୁ, ଆଇଜି ଏନେଇ କଡ଼ା ନିର୍ଦ୍ଦେଶ ଦେଲେ । ୨୪ ଘଣ୍ଟା ଭିତରେ ତଦନ୍ତ କରି ରିପୋର୍ଟ ଦେବାକୁ ଆସିଲା ନିର୍ଦ୍ଦେଶ । ତତ୍ପର ହୋଇ ଉଠିଲା ଧାମନଗର ପୋଲିସ । ସେପଟେ ମଙ୍ଗଳପୁର ପୋଲିସ ବି ଆସି ଡେରା ପକାଇଲା । ଦୁଇ ଦିନରେ ଅଭିଯୁକ୍ତଙ୍କୁ ଧରି ପୋଲିସ କୋର୍ଟ ଚାଲାଣ କରାଗଲା। କିନ୍ତୁ ଏବେବି ଏହି ମାମଲାର ମୁଖ୍ୟ ଅଭିଯୁକ୍ତ ଫେରାର ଅଛି ।
 
ଆଶ୍ଚର୍ଯ୍ୟ କଲା ଭଳି କଥା ହେଉଛି, ଏ ଘଟଣାକୁ ୨୪ ଘଣ୍ଟା ହୋଇନି, ଧାମନଗରରେ ଆଉ ଜଣେ ଯୁବତୀଙ୍କୁ ଅଚେତ ଅବସ୍ଥାରେ ଧାମନଗର ମେଡିକାଲରେ ଭର୍ତ୍ତି କରାଗଲା । ଏ ଘଟଣା ବି ପୂର୍ବ ଘଟଣା ସହ ପାଖାପାଖି ସମାନ । ୫ ଯୁବକ ଅଚେତ ଅବସ୍ଥାରେ ଆଣି ମେଡିକାଲରେ ଭର୍ତ୍ତି କରି ଫେରାର୍ ହୋଇଗଲେ । କିନ୍ତୁ ସେମାନଙ୍କ ମଧ୍ୟରୁ ଜଣେ, ଦୁଇ ଜଣ ସାମ୍ବାଦିକଙ୍କ ହାତରେ ଧରାପଡିଗଲେ । ସ୍ଥାନୀୟ ଲୋକଙ୍କ ସହାୟତାରେ ସଂପୃକ୍ତ ଯୁବକଙ୍କୁ ପୋଲିସର ଜିମା ଦେବା ପରେ ଆରମ୍ଭ ହେଲା ଖୋଳତାଡ଼ । ଚିକିତ୍ସା ପରେ ସୁସ୍ଥ ହୋଇ ଯୁବତୀ ଜଣକ ପୋଲିସକୁ ବୟାନ କଲେ ପୂରା ଘଟଣା । ଏକପାଖିଆ ପ୍ରେମରୁ ତାଙ୍କୁ ଏଭଳି ଘଟଣାର ଶିକାର ହେବାକୁ ପଡ଼ିଛି ବୋଲି ପୀଡ଼ିତା କହିଛନ୍ତି । ଭଦ୍ରକର ଏକ ଘରୋଇ କଲେଜରେ ଯୁକ୍ତ ୨ ପଢୁଥିବାବେଳେ ଚାକିରୀ କରିବାକୁ ଧାମନଗର ସେ ଆସିଥିଲେ । ଧାମନଗର କଲେଜ ପାଖରେ ଛିଡ଼ା ହୋଇଥିବାବେଳେ ତାଙ୍କରି ଗାଁର ଯୁବକ ବାବୁଆ ଜୋର୍ ଜବରଦସ୍ତି ପ୍ରେମ ନିବେଦନ କରିବା ସହ ବାଇକରେ ଆଉ ୨ ଜଣ ସହଯୋଗୀ ଯୁବକଙ୍କ ସହ ସେ ଉଠାଇ ନେଇଥିଲା । ଖଡ଼ିପଦା ହୋଇ ଷଣ୍ଢପୁର ଯିବା ପରେ ନଦୀ ପାର ହୋଇ କଟିକଟା ଯାଇଥିଲେ । ସେଠାରେ ତାଙ୍କୁ ଅସଦାଚରଣ କରିବା ସହ ନିର୍ଧୁମ ମାରିବାରୁ ସେ ଚେତା ହରାଇଥିଲେ । ଆଉ ଶେଷରେ ଅନ୍ୟ ୨ ଯୁବକଙ୍କ ସହଯୋଗରେ ଆଣି ଧାମନଗର ଡାକ୍ତରଖାନାରେ ଭର୍ତ୍ତି କରି ଫେରାର ହୋଇଯାଇଥିଲେ ।

 ୩ ଦିନରେ ସମାନ ଧରଣର ୨ଟି ଘଟଣା ଏବେ ଧାମନଗର ଚେହେରାରେ କଳଙ୍କ ବୋଳିଛି । ଧାମନଗରରେ କାହିଁକି ଏଭଳି ଘଟଣା ଘଟୁଛି ତାକୁ ନେଇ ଏବେ ପ୍ରଶ୍ନ ଉଠିଛି । ଗୋଟିଏ ପଟେ ପୋଲିସର ଅଧିକାରୀଙ୍କ ମଧ୍ୟରେ ଟ୍ୱିଟର ଝଡ଼ ଚାଲିଥିବାବେଳେ ଏପରେ ଆଉ ଗୋଟେ ଘଟଣା ପୋଲିସ ପାଇଁ ଚ୍ୟାଲେଞ୍ଜ ହୋଇଛି । କଲେଜ ଛାତ୍ରୀଙ୍କୁ ଅପହରଣ ଘଟଣାରେ ୩ ଜଣକୁ ପୋଲିସ ଗିରଫ କରି ତଦନ୍ତ ଆରମ୍ଭ କରିଛି । ଏହି ଘଟଣାରେ ନିଜେ ଧାମନଗରେ ଏସଡିପିଓ ମନୋରଞ୍ଜନ ସାମଲ ତଦନ୍ତ ଭାର ନେଇଛନ୍ତି।