'ଖୁବ ଶୀଘ୍ର ଆରମ୍ଭ ହେବ ପରିବହନ ବ୍ୟବସ୍ଥା'

ନୂଆଦିଲ୍ଲୀ: ଖୁବ ଶୀଘ୍ର ଆରମ୍ଭ ହେବ ସର୍ବସାଧାରଣ ପରିବହନ ବ୍ୟବସ୍ଥା। ଏନେଇ କେନ୍ଦ୍ର ସଡ଼କ ଓ ପରିବହନ ମନ୍ତ୍ରୀ ନୀତିନ ଗଡ଼କରୀ ସଂକେତ ଦେଇଛନ୍ତି। ମନ୍ତ୍ରୀ ଶ୍ରୀ ଗଡକରୀ କହିଥିଲେ କି, ଗତ ମେ ୨୪ ତାରିଖରୁ ବନ୍ଦ ପଡ଼ିଥିବା ସାଧାରଣ ପରିବହନକୁ ସରକାର ଖୁବ ଶୀଘ୍ର ଆରମ୍ଭ କରିବାକୁ ଯାଉଛନ୍ତି। 

ସେ ଆହୁରି ମଧ୍ୟ କହିଥିଲେ କି, ସରକାର ଏହି ସାଧାରଣ ପରିବହନ କାର୍ଯ୍ୟକ୍ଷମ କରିବା ପୂର୍ବରୁ କିଛି କଡ଼ା ଗାଇଡ଼ଲାଇନକୁ ମଧ୍ୟ ଲାଗୁ କରିବାକୁ ଯାଉଛନ୍ତି। ଏହା ପୂର୍ବରୁ ମନ୍ତ୍ରୀ ବସ ଓ କାର ଅପରେଟରମାନଙ୍କ ସହିତ ଆଲୋଚନା ମଧ୍ୟ କରି ସାରିଛନ୍ତି। ତେବେ ଏହି ସେବାକୁ ଆରମ୍ଭ କରିବା ପୂର୍ବରୁ ଗାଡ଼ିରେ ବସ ଓ କାରରେ ସାନିଟାଇଜର ଓ ମାସ୍କ ରଖିବାକୁ ପ୍ରସ୍ତାବ ଦେଇଥିଲେ, ଯାହାକୁ ସ୍ୱିକାର କରିଛନ୍ତି ବସ ଓ କାର ଅପରେଟରମାନେ। 

କୋରୋନା ଭାଇରସ ମହାମାରୀ ପାଇଁ ଗତ ମାର୍ଚ୍ଚ ମାସ ୨୪ ତାରିଖ ପରଠାରୁ ଦେଶ ସମ୍ପୂର୍ଣ୍ଣ ଭାବେ ଠପ ହୋଇ ପଡ଼ିଛି। ବର୍ତ୍ତମାନ ଦେଶରେ ତୃତୀୟ ପର୍ଯ୍ୟାୟ ଲକଡାଉନ ଜାରି ରହିଛି। ଏପରିକି ରେଳବାଇ ଓ ବିମାନ ସେବା ମଧ୍ୟ ବନ୍ଦ ରହିଛି। ପ୍ରବାସୀ ଶ୍ରମିକମାନଙ୍କୁ ସେମାନଙ୍କ ରାଜ୍ୟକୁ ଫେରାଇ ନେବା ପାଇଁ ପାଖାପାଖି ୧୦୦ଟି ଟ୍ରେନକୁ ଅନୁମତି ପ୍ରଦାନ କରାଯାଇଛି। ମାତ୍ର ସର୍ବସାଧାରଣଙ୍କ ପାଇଁ ଟ୍ରେନ ଚଳାଚଳ ବନ୍ଦ ରହିଛି। 

ଗଡକରୀ ଆହୁରି ମଧ୍ୟ କହିଥିଲେ କି, ଦେଶ ଏବଂ ଶିଳ୍ପାନୁଷ୍ଠାନ ଏକ ସଙ୍ଗେ ଏହି ଲଢେଇକୁ ଜିତିବେ। ପ୍ରଥମେ ଏହି କୋରୋନା ଭାଇରସ ବିପକ୍ଷରେ ବିଜୟ ହାସଲ କରିବା ପରେ ଆର୍ଥିକ ମାନ୍ଦାବସ୍ଥାରୁ ମଧ୍ୟ ଦେଶ ସହଜରେ ବିଜୟ ଲାଭ କରିବ ବୋଲି ସେ କହିଥିଲେ।