କୋଟାକୁ ନେଇ ତେଜୁଛି ରାଜନୀତି

କୋଟା: ରାଜସ୍ଥାନର ଶିକ୍ଷା ସହର କୋଟା ସହରରେ ଦିନକୁ ଦିନ କୋରୋନା ବ୍ୟାପିବାରେ ଲାଗିଛି। ବର୍ତ୍ତମାନ ସୁଦ୍ଧା କୋଟା ସହରରୁ ବର୍ତ୍ତମାନ ସୁଦ୍ଧା ପ୍ରାୟ ୯୭ ଜଣ କୋରୋନା ଆକ୍ରାନ୍ତ ବାହାରିଥିବା ସୂଚନା ରହିଛି। ଏପରିକି ବିଗତ ୨୪ ଘଣ୍ଟା ମଧ୍ୟରେ ଜଣେ ଛାତ୍ରଙ୍କ ସହିତ ୧୨ଟି ନୂଆ ମାମଲା ସାମ୍ନାକୁ ଆସିଛି। ଏହାକୁ ନେଇ ଅଭିଭାବକ ମହଲରେ ବେଶ ଚିନ୍ତା ପ୍ରକାଶ ପାଇଛି। ସେପଟେ କିନ୍ତୁ ଏହି କୋଟା ସହରକୁ ନେଇ ରାଜନୀତି ଧିରେଧିରେ ଘନେଇବାରେ ଲାଗିଛି। ପାଖାପାଖି ୩୫ ହଜାର ଛାତ୍ରଛାତ୍ରୀଙ୍କୁ ଘରକୁ ଫେରିବା ନେଇ ରାଜନୀତି ତେଜୁଛି। ଏହି ଘଟଣାକୁ ନେଇ ବିହାର ମୁଖ୍ୟମନ୍ତ୍ରୀ ନୀତିଶ କୁମାର, ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଆଦିତ୍ୟନାଥ ଓ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲୋତଙ୍କ ମଧ୍ୟରେ ମତମତାନ୍ତର ଦେଖାଦେଇଛି।  

ମିଳିଥିବା ସୂଚନା ମୁତାବକ ଗେହଲୋତ, ଯୋଗୀ ଆଦିତ୍ୟନାଥଙ୍କ ମଧ୍ୟରେ ଆଲୋଚନା ହୋଇଥିଲା। ଏହି ଆଲୋଚନାରେ ଯୋଗୀ ଛାତ୍ରଛାତ୍ରୀଙ୍କୁ ଘରକୁ ଫେରାଇ ଆଣିବାକୁ ଉତ୍ତରପ୍ରଦେଶ ସରକାର ୨୦୦ ବସ ପଠାଇବାକୁ ମଧ୍ୟ ଯୋଜନା କରିଥିବା ଜଣାପଡ଼ିଛି। ସେହିକ୍ରମରେ ନୀତିଶ ମଧ୍ୟ ବିହାରର ପିଲାମାନଙ୍କୁ ଫେରାଇ ଆଣିବାର ପାଇଁ ରାଜସ୍ଥାନ ସରକାରଙ୍କୁ ପ୍ରସ୍ତାବ ଦେଇଥିଲେ। ଯାହାକୁ ସିଧାସଳଖ ମନା କରିଦେଇଥିଲେ ଅଶୋକ ଗେହଲୋତ।  

ମୁଖ୍ୟମନ୍ତ୍ରୀ ଗେହଲୋତ କହିଥିଲେ କି, କୋଟାରେ ରହୁଥିବା ନିଜ ନିଜ ରାଜ୍ୟର ଛାତ୍ରଛାତ୍ରୀଙ୍କୁ ନେବା ପାଇଁ ରାଜ୍ୟ ଗୁଡ଼ିକ ପ୍ରସ୍ତାବକୁ ଗୃହ ବିଭାଗକୁ ପଠାଯିବ। ସେଠାରେ ନିଷ୍ପତ୍ତି ନିଆଯିବା ପରେ ହିଁ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଥିଲେ। ଯେଉଁଭଳି ଭାବରେ ଉତ୍ତରପ୍ରଦେଶ ସରକାରଙ୍କୁ ଅନୁମତି ପ୍ରଦାନ କରାଯାଇଛି ସେହିଭଳି ଭାବରେ ଅନ୍ୟ ରାଜ୍ୟକୁ ମଧ୍ୟ ପ୍ରସ୍ତାବ ଦିଆଯିବ ବୋଲି ସେ କହିଥିଲେ।  

ସୂଚନାଯୋଗ୍ୟ କୋଟାରେ ଉତ୍ତରପ୍ରଦେଶରୁ ସର୍ବାଧିକ ଛାତ୍ରଛାତ୍ରୀମାନେ ରହୁଛନ୍ତି। କୋଟାରେ ପ୍ରଥମ କୋରୋନା ମାମଲା ଚଳିତ ମାସ ୬ ତାରିଖରେ ଦେଖିବାକୁ ମିଳିଥିଲା। ତେବେ ସେଠାରେ କୋରୋନା ସଂକ୍ରମଣଙ୍କ ସଂଖ୍ୟା ଦ୍ରୁତ ବେଗରେ ବୃଦ୍ଧି ପାଇଁ ଦୁଇ ଜଣଙ୍କର ମୃତ୍ୟୁ ହୋଇଥିବା ସୂଚନା ମଧ୍ୟ ମିଳିଛି। ତେବେ କୋଟରେ ଜଣେ ଆମ୍ବୁଲାନ୍ସ ଡ୍ରାଇଭର ଓ ଜଣେ ଛାତ୍ର କୋରୋନା ଆକ୍ରାନ୍ତ ହୋଇଥିବା ଖବର ବର୍ତ୍ତମାନ ଚିନ୍ତାକୁ ବଢାଇ ଦେଇଛି। କୋରୋନା ଆକ୍ରାନ୍ତ ଛାତ୍ର ଜଣକ ଗତ ୧୩ ତାରିଖରେ ଘରେ ପହଞ୍ଚିଥିବା ଜଣାପଡ଼ିଛି। ସେପଟେ ଉକ୍ତ ଛାତ୍ରଙ୍କ ରିପୋର୍ଟ ପଜିଟିଭି ଆସିବା ପରେ ତାଙ୍କ ହଷ୍ଟେଲକୁ ସିଲ କରି ଦିଆଯାଇଛି।  

କୋଟାରେ ପ୍ରାୟ ୩୫ ହଜାର ଛାତ୍ର ରହୁଥିବା ସୂଚନା ରହିଛି। ଏମାନଙ୍କ ମଧ୍ୟରୁ ୭୫୦୦ ଛାତ୍ର ବର୍ତ୍ତମାନ କୋଟାରେ ରହୁଛନ୍ତି। ସେହିପରି ବିହାରରୁ ସାଢେ ୬ ହଜାର ଛାତ୍ର ରହୁଥିବା ବେଳେ ମଧ୍ୟପ୍ରଦେଶର ୪ ହଜାର, ଝାଡ଼ଖଣ୍ଡର ୩ ହଜାର, ହରିଆଣାର ୨ ହଜାର, ମହାରାଷ୍ଟ୍ରର ୨ ହଜାର,  ନର୍ଥ ଇଷ୍ଟ ଓ ପଶ୍ଚିମବଙ୍ଗର ଏକ ହଜାର ଲେଖାଏଁ ଛାତ୍ରଛାତ୍ରୀ ଏଠାରେ ରହୁଥିବା ଦେଖିବାକୁ ମିଳିଛି। ଏହି ରାଜ୍ୟମାନଙ୍କର ଛାତ୍ରଛାତ୍ରୀଙ୍କ ଅଭିଭାବକ ଚିନ୍ତାରେ ରହିଥିବା ସୂଚନା ରହିଛି।