ଜାତିଆଣକୁ ଆକ୍ଷେପ କରି କ୍ୱାରେଣ୍ଟାଇନ ସେଣ୍ଟରରେ ହଙ୍ଗାମା, ଅଭିଯୋଗ ଆଣିଲେ ସରପଞ୍ଚ

ବାଙ୍କୀ: ଜାତିଆଣକୁ ଆକ୍ଷେପ କରି ବାଙ୍କୀ ଡମପଡା ବ୍ଲକ ଢଁସର ପଞ୍ଚାୟତର କ୍ୱାରେଣ୍ଟାଇନ ସେଣ୍ଟରରେ ଦୁଇ ଯୁବକଙ୍କ ଉନ୍ମତ୍ତ କାଣ୍ଡ । ଦାୟିତ୍ୱରେ ଥିବା ସିକ୍ୟୁରୁଟି ଗାର୍ଡକୁ ଧମକ ଦେବା ସହିତ କ୍ଵାରେଣ୍ଟାଇନ କେନ୍ଦ୍ରରେ ଲାଗିଥିବା ଆକ୍ୱାଗାର୍ଡ ମେସିନ  ମଧ୍ୟ ଭାଙ୍ଗି ଦେଇଛନ୍ତି । ଏପରିକି ଚେୟାର ଟେବୁଲ ମଧ୍ୟ ଭଙ୍ଗାରୁଜା କରିଥିଲେ । ଏନେଇ ଅଭିଯୋଗ ଆଣିଛନ୍ତି ଦାୟିତ୍ୱରେ ଥିବା ସରପଞ୍ଚ ସଞ୍ଜୁ ନାୟକ ଓ ସିକ୍ୟୁରିଟି ଗାର୍ଡ । 

ଯାହା ଜଣାପଡ଼ିଛି, ଗତକାଲି କେରଳରୁ ଜଣେ ପ୍ରବାସୀ ଓଡିଆ ଢଁସର କ୍ୱାରେଣ୍ଟାଇନ ସେଣ୍ଟରରେ ରହିବା ନେଇ ଆସିଥିଲେ । ତେବେ ଅଚାନକ ସେହି ଗ୍ରାମର ଦୁଇ ଅସାମାଜିକ ଯୁବକ ପହଞ୍ଚି ଯାତିଆଣ ଆକ୍ଷେପ କରିଥିଲେ । ଉକ୍ତ ଆଦିବାସୀ ଯୁବକଙ୍କୁ କ୍ୱାରେଣ୍ଟାଇନ ସେଣ୍ଟରରେ ରହି ପାରିବେ ନାହିଁ ବୋଲି ଧମକ ମଧ୍ୟ ଦେଇଥିଲେ । କ୍ୱାରେଣ୍ଟାଇନ ସେଣ୍ଟରଥିବା ସିକ୍ୟୁରୁଟି ଗାର୍ଡ ଏହାକୁ ବିରୋଧ କରିବାରୁ ଧମକ ମଧ୍ୟ ଦେଇଥିଲେ ଉକ୍ତ ୨ ଯୁବକ । 

କେବଳ ଏତିକି ନୁହେଁ, ଠେଲାପେଲା କରି କ୍ୱାରେଣ୍ଟାଇନ ସେଣ୍ଟରରେ ଜବରଦସ୍ତି ପଶି ପ୍ରବାସୀ ଓଡିଆଙ୍କ ବ୍ୟବହାର ପାଇଁ ଥିବା ଆକ୍ୱାଗାର୍ଡ, ଚେୟାର ଟେବୁଲ ଇତ୍ୟାଦି ଭଙ୍ଗାରୁଜା କରିଥିଲେ । ତେବେ ଉକ୍ତ ଅସାମାଜିକ ଯୁବକଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ସରପଞ୍ଚ ଦାବି କରିଛନ୍ତି ।