ଟ୍ରମ୍ପ ପିନ୍ଧିବେ ବନାରସୀ ଗାମୁଛା !

ନୂଆଦିଲ୍ଲୀ: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପିନ୍ଧିବେ ବନାରସୀ ଗାମୁଛା। କାରଣ ବନାରସର କିଛି ଡାକ୍ତର ଏହି ବନାରସୀ ଗାମୁଛାକୁ ଟ୍ରମ୍ପଙ୍କ ନିକଟକୁ ପଠାଇଛନ୍ତି। ଆଉ ଡାକ୍ତରମାନେ ଏକ ଚିଠି ମାଧ୍ୟମରେ କହିଛନ୍ତି କି, କୋରୋନାରୁ ବଞ୍ଚିବାକୁ ହେଲେ ଆପଣଙ୍କୁ ଏହି ଗାମୁଛା ପିନ୍ଧିବାକୁ ପଡ଼ିବ। 

ଘଟଣାଟି ଏହିପରି। ବାରଣାସୀ ହେଉଛି ପ୍ରଧାନମନ୍ତ୍ରୀଙ୍କ ସଂସଦୀୟ ନିର୍ବଚନ ମଣ୍ଡଳୀ। ଏହି ନିର୍ବାଚନୀ ମଣ୍ଡଳୀରେ କୋରୋନାରୁ ବର୍ତ୍ତିବା ପାଇଁ ପ୍ରଧାନମନ୍ତ୍ରୀ ମୁହଁରେ ଗାମୁଛା ବାନ୍ଧିବାକୁ ପରାମର୍ଶ ଦେଇଥିଲେ। ଏହି କ୍ରମରେ ବାରଣାଶୀର ଜଣେ ଡାକ୍ତର ଉତ୍ତମ ଓଝା କହିଥିଲେ ଗାମୁଛା ବନାରସର ଏକ ପରମ୍ପରାଗତ ବସ୍ତ୍ର ଅଟେ। ଏହାକୁ ବାରଣାସୀ ଲୋକ ବିଭିନ୍ନ କାର୍ଯ୍ୟ ପାଇଁ ବ୍ୟବହାର କରିଥାନ୍ତି ବୋଲି ସେ କହିଥିଲେ। 

ସେ ଆହୁରି ମଧ୍ୟ କହିଥିଲେ କି, ଆମେରିକାର ରାଷ୍ଟ୍ରପତି ଏହାକୁ ଏକ ସକରାତ୍ମକ ମନୋଭାବ ସହିତ ବ୍ୟବହାର କରନ୍ତୁ। ଡାକ୍ତର ଓଝା ଦିଲ୍ଲୀରେ ଥିବା ଆମେରିକା ଦୂତାବାସ ମାଧ୍ୟମେର ଏହି ଗାମୁଛାକୁ ଟ୍ରମ୍ପଙ୍କ ନିକଟକୁ ପଠାଇଛନ୍ତି। ଏହି ଗାମୁଛାକୁ ପାର୍ସଲ ସ୍ପିଡ଼ ପୋଷ୍ଟ ରେଜିଷ୍ଟ୍ରୀ ମାଧ୍ୟମରେ ବାରଣାସୀରୁ ପଠାଯାଇଥିବା ଜଣାପଡ଼ିଛି। ଦିବ୍ୟାଙ୍ଗ ଡାକ୍ତର ଉତ୍ତମ ଓଝା ଆହୁରି ମଧ୍ୟ କହିଛନ୍ତି କି, ସେ ନିଜେ ମଧ୍ୟ ଏହି ଗାମୁଛାକୁ ବ୍ୟବହାର କରୁଛନ୍ତି। ଏହା ସହିତ ସେ ପ୍ରଧାନମନ୍ତ୍ରୀଙ୍କ ଆହ୍ୱାନ କ୍ରମେ ଅନ୍ୟ ଲୋକମାନଙ୍କୁ ମଧ୍ୟ ଏହାକୁ ବ୍ୟବହାର କରିବାକୁ କହୁଛନ୍ତି। 

ଏଠାରେ କହି ରଖୁଛୁ କି, ବର୍ତ୍ତମାନ କୋରୋନା ଭାଇରସ ଆକ୍ରାନ୍ତଙ୍କ ସଂଖ୍ୟା ଆମେରିକାରେ ଦ୍ରୁତ ବେଗରେ ବଢିବାରେ ଲାଗିଛି। ଆମେରିକାରେ ବର୍ତ୍ତମାନ ସୁଦ୍ଧା ୭ ଲକ୍ଷରୁ ଊର୍ଦ୍ଧ୍ୱ ଲୋକ ଆକ୍ରାନ୍ତ ହୋଇଥିବା ସୂଚନା ରହିଛି। ସେପଟେ ୪୨୪୫୮ ଜଣଙ୍କ ମୃତ୍ୟୁ ମଧ୍ୟ ହୋଇ ସାରିଛି। କୋରୋନା ଭାଇରସ ସଂକ୍ରମଣରେ ସମଗ୍ର ବିଶ୍ୱରେ ୨୫ ଲକ୍ଷରୁ ଊର୍ଦ୍ଧ୍ୱ ଲୋକ ଆକ୍ରାନ୍ତ ଥିବା ଜଣାପଡ଼ିଛି।