ବର୍ଷକରେ କୋଟିଏ ଟଙ୍କା ଦରମା ନେଇଥିବା ଚର୍ଚ୍ଚିତ ଶିକ୍ଷୟତ୍ରୀ ଗିରଫ

ବର୍ଷକରେ କୋଟିଏ ଟଙ୍କା ଦରମା ନେଇଥିବା ଜଣେ ଚର୍ଚ୍ଚିତ ଶିକ୍ଷୟତ୍ରୀଙ୍କୁ ଉତ୍ତର ପ୍ରଦେଶର କାସଗଞ୍ଜରୁ ଗିରଫ କରାଯାଇଛି |

ଲକ୍ଷ୍ନୌ: ଉତ୍ତର ପ୍ରଦେଶରେ ବିଭିନ୍ନ ଜିଲ୍ଲାରେ ନକଲି ଉପାୟରେ ଚାକିରୀ କରିଥିବା ଚର୍ଚ୍ଚିତ ଶିକ୍ଷୟତ୍ରୀ ଅନାମିକା ଶୁକ୍ଳାଙ୍କୁ ଶନିବାର କାସଗଞ୍ଜର ସୋରୋଁ ଅଞ୍ଚଳରୁ ଗିରଫ କରାଯାଇଛି | ପୋଲିସ ହାତରେ ଧରାପଡିଥିବା ଏହି ଶିକ୍ଷୟତ୍ରୀ ସ୍ଥାନୀୟ ଫରିଦପୁର ଅଞ୍ଚଳରେ ଥିବା କସ୍ତୁରବା ବିଦ୍ୟାଳୟରେ ପୂର୍ଣ୍ଣକାଳୀନ ବିଜ୍ଞାନ ଶିକ୍ଷକ ରୂପେ କାର୍ଯ୍ୟ କରୁଥିଲେ | ସେ ଏକକାଳୀନ ୧୦ଟି ଜିଲ୍ଲାରେ ପାଠ ପଢାଇବା ସହ  ଗୋଟିଏ ବର୍ଷରେ କୋଟିଏରୁ ଅଧିକ ଟଙ୍କା ଦରମା ବାବଦରେ ପାଇଥିଲେ |   

ଏ ଘଟଣା ସମ୍ପର୍କରେ ଜଣାପଡିବା ପରେ ଶିକ୍ଷା ବିଭାଗ ପକ୍ଷରୁ ଏହି ଚର୍ଚ୍ଚିତ ଶିକ୍ଷୟତ୍ରୀଙ୍କୁ ଖୋଜି ବାହାର କରିବା ପାଇଁ ନିର୍ଦ୍ଦେଶ ଦିଆଯାଇଥିଲା | ଏହି ଚର୍ଚ୍ଚିତ ଶିକ୍ଷୟତ୍ରୀ କାସଗଞ୍ଜ ଜିଲ୍ଲାର ଏକ କସ୍ତୁରବା ବିଦ୍ୟାଳୟରେ ବିଦ୍ୟାଳୟରେ ବିଜ୍ଞାନ ଶିକ୍ଷକ ରୂପେ କାର୍ଯ୍ୟ କରୁଥିବା ନେଇ ଜଣା ପଡିଥିଲା | 

ଗତ ଶୁକ୍ରବାର ଶିକ୍ଷା ବିଭାଗ ପକ୍ଷରୁ ଏହି ଶିକ୍ଷୟତ୍ରୀଙ୍କୁ ଦରମା ପ୍ରଦାନ କରିବା ଉପରେ ରୋକ ଲଗାଯିବା ପାଇଁ ନୋଟିସ ଜାରି ହୋଇଥିଲା | ଏହାକୁ ହ୍ୱାଟ୍ସଆପରେ ପଠାଯାଇଥିଲା | ଶନିବାର ନୋଟିସ ପାଇବା ପରେ ସେ ଇସ୍ତଫା ଦେବା ପାଇଁ  ବିଭାଦଗୀୟ କାର୍ଯ୍ୟାଳୟକୁ ଆସିଥିଲେ | ତାଙ୍କ ସାଥିରେ ଆସିଥିବା ଜଣେ ଯୁବକ ହାତରେ ଇସ୍ତଫା ପତ୍ର ପଠାଇଥିଲେ ସେ | ସମ୍ପୃକ୍ତ ଯୁବକଙ୍କୁ ଏହି ଚର୍ଚ୍ଚିତ ଶିକ୍ଷୟତ୍ରୀ ବାବଦରେ ପଚରାଯିବାରୁ, ଅନାମିକା ଶୁକ୍ଳା ବାହାରେ ଛିଡା ହୋଇଥିବା ନେଇ ଜଣାଇଥିଲା | 

ଏହା ପରେ  ଶିକ୍ଷା ବିଭାଗ ଅଧିକାରୀ ଅଞ୍ଜଳି ଅଗ୍ରୱାଲ ଘଟଣା ବାବଦରେ ନିକଟସ୍ଥ ଥାନାକୁ ଜଣାଇବା ସହ ବିଭାଗୀୟ କର୍ମଚାରୀଙ୍କ ସହାୟତାରେ ତାଙ୍କୁ ଘେରି ଯାଇଥିଲେ | ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତାଙ୍କୁ ଗିରଫ କରିବା ସହ ପଚରାଉଚରା କରୁଛି | ଶିକ୍ଷା ବିଭାଗ ପକ୍ଷରୁ ମିଳିଥିବା ଖବର ଅନୁସାରେ ଗିରଫ ଶିକ୍ଷୟତ୍ରୀ ଅନାମିକା ଶୁକ୍ଳା ଅମେଠିରେ ପୂର୍ଣ୍ଣକାଳୀନ ବିଜ୍ଞାନ ଶିକ୍ଷକ ରୂପେ ନିଯୁକ୍ତି ପାଇଥିଲେ | ସେ ନକଲି ଉପାୟରେ ଏକକାଳୀନ ୧୦ଟି ଜିଲ୍ଲାରେ ପାଠ ପଢଉଥିବାର ଖବର ମିଳିବା ପରେ ବିଭାଗୀୟ ମନ୍ତ୍ରୀଙ୍କ ପକ୍ଷରୁ ଏ ଘଟଣାର ତଦନ୍ତ କରିବାକୁ ନିର୍ଦ୍ଦେଶ ଦିଆଯିବା ସହ ସମ୍ପୃକ୍ତ ଶିକ୍ଷୟତ୍ରୀଙ୍କ ବିରୁଦ୍ଧରେ ଏଫଆଇଆର ରୁଜ୍ଜୁ କରିବାକୁ ନିର୍ଦ୍ଦେଶ ଦିଆଯାଇଥିଲା |   

Add Zee News as a Preferred Source