ଏନସିପି ସହ ମିଶି ସରକାର ଗଢିବ ଶିବସେନା? ଏମିତି କିଛି କହିଲେ ସଞ୍ଜୟ ରାଉତ

ମହାରାଷ୍ଟ୍ର ବିଧାନସଭା ନିର୍ବାଚନର ଅପ୍ରତ୍ୟାଶିତ ଫଳାଫଳ ସମସ୍ତଙ୍କ ଚକିତ କରିଦେଇଥିଲା । ଏଠାରେ ବିଜେପି-ଶିବସେନା ମେଣ୍ଟକୁ ସଂଖ୍ୟା ଗରିଷ୍ଠତା ମିଳିଛି ସତ କିନ୍ତୁ ଗତଥର ଅପେକ୍ଷା ବିଜେପିର ଆସନ ସଂଖ୍ୟା କମ ହୋଇଛି । ଯାହାର ଫାଇଦା ସହଯୋଗୀ ଶିବସେନା ଉଠାଇବାକୁ ଚାହୁଁଛି ।  ବର୍ତ୍ତମାନ ଶିବସେନାର ଆଖି ରାଜ୍ୟର ମୁଖ୍ୟମନ୍ତ୍ରୀ ପଦ ଉପରେ ରହିଛି । ଅନ୍ୟପକ୍ଷେ କଂଗ୍ରେସ ଓ ଏନସିପି ମଧ୍ୟ ଶିବସେନାକୁ ସମର୍ଥନ ଦେଇ ପାରନ୍ତି ବୋଲି ଖବର ସାମ୍ନାକୁ ଆସୁଛି ।

ଏନସିପି ସହ ମିଶି ସରକାର ଗଢିବ ଶିବସେନା? ଏମିତି କିଛି କହିଲେ ସଞ୍ଜୟ ରାଉତ
ଏନସିପି ସହ ମିଶି ସରକାର ଗଢିବ ଶିବସେନା?

ନୂଆଦିଲ୍ଲୀ: ମହାରାଷ୍ଟ୍ର ବିଧାନସଭା ନିର୍ବାଚନର ଅପ୍ରତ୍ୟାଶିତ ଫଳାଫଳ ସମସ୍ତଙ୍କ ଚକିତ କରିଦେଇଥିଲା । ଏଠାରେ ବିଜେପି-ଶିବସେନା ମେଣ୍ଟକୁ ସଂଖ୍ୟା ଗରିଷ୍ଠତା ମିଳିଛି ସତ କିନ୍ତୁ ଗତଥର ଅପେକ୍ଷା ବିଜେପିର ଆସନ ସଂଖ୍ୟା କମ ହୋଇଛି । ଯାହାର ଫାଇଦା ସହଯୋଗୀ ଶିବସେନା ଉଠାଇବାକୁ ଚାହୁଁଛି ।  ବର୍ତ୍ତମାନ ଶିବସେନାର ଆଖି ରାଜ୍ୟର ମୁଖ୍ୟମନ୍ତ୍ରୀ ପଦ ଉପରେ ରହିଛି । ଅନ୍ୟପକ୍ଷେ କଂଗ୍ରେସ ଓ ଏନସିପି ମଧ୍ୟ ଶିବସେନାକୁ ସମର୍ଥନ ଦେଇ ପାରନ୍ତି ବୋଲି ଖବର ସାମ୍ନାକୁ ଆସୁଛି ।

ଏହି କ୍ରମରେ ଶିବସେନାର ବରିଷ୍ଠ ନେତା ସଞ୍ଜୟ ରାଉତ ପୁଣିଥରେ ବିଜେପିକୁ ମେଣ୍ଟର ଧର୍ମ ପାଳନ କରିବାକୁ କହିଛନ୍ତି । ସେ କହିଛନ୍ତି ଯେ ବିଜେପିକୁ ୫୦-୫୦ ଫର୍ମୁଲାକୁ ପାଳନ କରିବା ଆବଶ୍ୟକ । ଏହି ଫର୍ମୁଲା ଅନ୍ତର୍ଗତ ଦୁଇ ଦଳରୁ ସମାନ କ୍ୟାବିନେଟ ସଦସ୍ୟ ହେବା ଆବଶ୍ୟକ । ସେ ଏନସିପି ସହ ମିଶି ସରକାର ଗଢିବାର ପ୍ରଶ୍ନ ଉପରେ କହିଛନ୍ତି ଯେ ରାଜନୀତିରେ ବିକଳ୍ପ ଖୋଲା ରହିଥାଏ ।

ସେ ଆହୁରି କହିଛନ୍ତି ଯେ ହରିୟାଣାରେ ବିଜେପି ବିନା ସଂଖ୍ୟା ଗରିଷ୍ଠତାରେ ସରକାର ଗଢି ନେଇଛି । ସେ ଏପରି ଏକ ଦଳ ସହିତ ହାତ ମିଶାଇଛି, ଯିଏ ତାଙ୍କ ବିରୋଧୀ ଭାବେ ଜଣାଶୁଣା । ଯଦି ସରକାର ଗଢିବାରେ ବିଲମ୍ୱ ହେଉଛି, ସେଥିରେ ଆମର କୌଣସି ଭୁଲ ନାହିଁ ବୋଲି ରାଉତ କହିଛନ୍ତି ।

ଅନ୍ୟପକ୍ଷେ ବିଗତ ଦିନରେ କଂଗ୍ରେସ ସଙ୍କେତ ଦେଇଥିଲା ଯେ ସେ ଶିବସେନା ନେତୃତ୍ୱାଧୀନ ସରକାରକୁ ସମର୍ଥନ ଦେଇପାରେ । ରାଜ୍ୟ କଂଗ୍ରେସର ଅଧ୍ୟକ୍ଷ ବାଲାସାହେବ ଥୋରାଟ କହିଥିଲେ ଯେ, ଆମେ ଏହା ଉପରେ ଶିବସେନା ସହ କୌଣସି ଆଲୋଚନା କରିନାହୁଁ । ଯଦି ଏପରି କିଛି ସ୍ଥିତି ଆସୁଛି, ତେବେ ହାଇକମାଣ୍ଡ ଏହାର ନିଷ୍ପତ୍ତି ନେବେ । 

ଗତ ଶୁକ୍ରବାର ଏନସିପିର ବରିଷ୍ଠ ନେତା ଛଗନ ଭୁଜବଲ କହିଥିଲେ ଯେ, ଶିବସେନାକୁ ଖୋଲା ଅଫର ଦେଉଛି, ସେମାନେ ମୁଖ୍ୟମନ୍ତ୍ରୀ ପଦ ନେଇ ଆମ ସହ ମିଶି ସରକାର ଗଢନ୍ତୁ । ବିଜେପି ସହ ସରକାର ଗଢିଲେ ଶିବସେନାକୁ ଉପମୁଖ୍ୟମନ୍ତ୍ରୀ ପଦ ମିଳିବ କିନ୍ତୁ ଆମ ସହ ଆସିଲେ ମୁଖ୍ୟମନ୍ତ୍ରୀ ପଦ ମିଳିବ । ବର୍ତ୍ତମାନ ଶିବସେନା ସ୍ଥିର କରୁ ସେ କଣ କରିବ ।

ଅନ୍ୟପକ୍ଷେ କଂଗ୍ରେସର ବରିଷ୍ଠ ନେତା ତଥା ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ପୃଥ୍ୱୀରାଜ ଚୌହ୍ୱାନଙ୍କ ଏକ ମନ୍ତବ୍ୟ ମଧ୍ୟ ସମସ୍ତଙ୍କୁ ଚକିତ କରିଦେଇଥିଲା ।  ବିଜେପିକୁ ରାଜ୍ୟ କ୍ଷମତାରୁ ଦୂରେଇ ରଖିବା ପାଇଁ ଶିବସେନା ସହ ହାତ ମିଶାଇ ପାରନ୍ତି ଏନସିପି ଓ କଂଗ୍ରେସ । ଚୌହ୍ୱାନ କହିଛନ୍ତି ଯେ, ନିର୍ବାଚନୀ ଫଳାଫଳ ଆସିବା ସହ ମହାରାଷ୍ଟ୍ରରେ ଆଗାମୀ ସରକାର ଗଢିବାର ରୋଚକ ସମ୍ଭାବନା ମଧ୍ୟ ଦେଖା ଦେଇଛି । 

ଚଳିତ ନିର୍ବାଚନରେ ମହାରାଷ୍ଟ୍ରର ୨୮୮ଟି ଆସନରୁ ବିଜେପିକୁ ୧୦୫, ଶିବସେନାକୁ ୫୬, ଏନସିପିକୁ ୫୪, କଂଗ୍ରେସକୁ ୪୪ ଓ ଅନ୍ୟାନ୍ୟକୁ ୨୯ଟି ଆସନ ମିଳିଛି । ୨୦୧୪ ବିଧାନସଭା ନିର୍ବାଚନରେ ଫଳାଫଳ ଅନୁସାରେ ବିଜେପିକୁ ୧୨୨, ଶିବସେନା ୬୩, କଂଗ୍ରେସ ୪୨ ଓ ଏନସିପିକୁ ୪୧ଟି ଆସନ ମିଳିଥିଲା । ଯଦି ଶିବସେନା, କଂଗ୍ରେସ ଓ ଏନସିପି ଏକାଠି ଆସିବେ ତେବେ ୧୬୦ଟି ଆସନ ହୋଇଯିବ । ଯାହା ସରକାର ଗଢିବା ପାଇଁ ଯଥେଷ୍ଟ ।