ନଭେମ୍ବର ୧୩ରୁ ବିଧାନସଭାର ଶୀତ ଅଧିବେଶନ, ବଜେଟର ଆକାରକୁ ନେଇ ଚର୍ଚ୍ଚା ଆରମ୍ଭ

ନଭେମ୍ବର ୧୩ରୁ ବିଧାନସଭାର ଶୀତ ଅଧିବେଶନ, ବଜେଟର ଆକାରକୁ ନେଇ ଚର୍ଚ୍ଚା ଆରମ୍ଭ

 ପ୍ରାୟ ୮୩୦୦ କୋଟି ଟଙ୍କା ହୋଇପାରେ ଅତିରିକ୍ତ ବଜେଟର ଅଟକଳ!

ନଭେମ୍ବର ୧୩ରୁ ବିଧାନସଭାର ଶୀତ ଅଧିବେଶନ, ବଜେଟର ଆକାରକୁ ନେଇ ଚର୍ଚ୍ଚା ଆରମ୍ଭ

ଯଯାତି ମହାନ୍ତି, ଭୁବନେଶ୍ୱର: ନଭେମ୍ବର ୧୩ ତାରିଖରୁ ଆରମ୍ଭ ହେବ ବିଧାନସଭାର ଶୀତ ଅଧିବେଶନ । ପ୍ରଥମ ଦିନରେ ଅର୍ଥ ମନ୍ତ୍ରୀ ନିରଞ୍ଜନ ପୂଜାରୀ ୨୦୧୯-୨୦ ଆର୍ଥିକ ବର୍ଷର ଅତିରିକ୍ତ ବଜେଟ ଉପସ୍ଥାପନ କରିବେ । ଅତିରିକ୍ତ ବଜେଟକୁ ମନ୍ତ୍ରୀ ପରିଷଦ ପକ୍ଷରୁ ଅନୁମୋଦନ ମିଳିଛି । ହେଲେ ଅତିରିକ୍ତ ବଜେଟର ଆକାରକୁ ନେଇ ଆରମ୍ଭ ହୋଇଛି ଚର୍ଚ୍ଚା । ପ୍ରାୟ ୮୩୦୦ କୋଟି ଟଙ୍କା ହୋଇପାରେ ଅତିରିକ୍ତ ବଜେଟର ଅଟକଳ । ଗତବର୍ଷ ଅପେକ୍ଷା ଏଥର ଅଟକଳ କମ୍ ଥିବାରୁ ସମୀକ୍ଷକମାନେ ଏହାକୁ ତର୍ଜମା ଆରମ୍ଭ କରିଛନ୍ତି । ସ୍ୱାସ୍ଥ୍ୟ କ୍ଷେତ୍ରକୁ ଅଧିକ ଅନୁଦାନ ମିଳିବାକୁ ଥିବା ବେଳେ କାଳିଆ ଯୋଜନା ପାଇଁ ବି ବ୍ୟୟ ବରାଦ ହେବ ଅତିରିକ୍ତ ବଜେଟରେ । ହେଲେ ସପ୍ତମ ବେତନ କମିଶନ ଅନୁସାରେ ବକେୟା ଦରମା ପାଇବାକୁ ସରକାରୀ କର୍ମଚାରୀ ଚାହିଁ ବସିଥିବା ବେଳେ ଏଥର ଅତିରିକ୍ତ ବଜେଟରେ ଏହାର ସମ୍ଭାବନା କମ୍ ରହିଛି ବୋଲି ସୀମକ୍ଷକ ମତ ଦେଇଛନ୍ତି ।

୨୦୧୯-୨୦ରେ ରାଜ୍ୟ ସରକାରଙ୍କ ମୂଳ ବଜେଟର ପରିମାଣ ଥିଲା ୧ଲକ୍ଷ ୩୯ହଜାର କୋଟି ଟଙ୍କା । ଏବେ ଆସିବ ଅତିରିକ୍ତ ବଜେଟ । ୨୦୧୮-୧୯ରେ ମୂଳ ବଜେଟ ୧ଲକ୍ଷ ୨୦ହଜାର କୋଟି ଟଙ୍କା ଥିବା ବେଳେ ଅତିରିକ୍ତ ବଜେଟର ପରିମାଣ ଥିଲା ୧୨ ହଜାର ୭୯୦ କୋଟି । ହେଲେ ଏଥର ଅତିରିକ୍ତ ବଜେଟର ପରିମାଣ ପ୍ରାୟ ୮ହଜାର  ୩୦୦କୋଟି ଟଙ୍କା ହେବ ବୋଲି ଜଣାପଡ଼ିଛି । ଗତବର୍ଷ ଅପେକ୍ଷା ଏଥର ଅତିରିକ୍ତ ବଜେଟ ପରିମାଣ କମ୍ ଥିବାରୁ ଏହାକୁ ନେଇ ଚର୍ଚ୍ଚା ଆରମ୍ଭ ହୋଇଛି । ରାଜ୍ୟ ରାଜକୋଷରେ ଅର୍ଥ ନଥିବାରୁ ବଜେଟ ପରିମାଣ କମିଛି ବୋଲି ଆଲୋଚନା ହେଉଛି । ତାସାଙ୍ଗକୁ ସାରା ଦେଶରେ ମାନ୍ଦା ଅର୍ଥନୀତି ମଧ୍ୟ ଆଉ ଏକ ସମସ୍ୟା ହୋଇଛି । କେନ୍ଦ୍ରୀୟ ପ୍ରବର୍ତିତ ଯୋଜନାରୁ ରାଜ୍ୟ ସରକାର ଆହୁରି ୭୫୪୪କୋଟି ଟଙ୍କା ପାଇବାକୁ ବାକି ଅଛି । ଏହାର ପ୍ରଭାବ ଦେଖିବାକୁ ମିଳିଛି ରାଜ୍ୟର ଅତିରିକ୍ତ ବଜେଟରେ ।

ପଞ୍ଚମ ପାଳି ସରକାରକୁ ଆସିବା ପରେ ରାଜ୍ୟରେ ଲାଗୁ ହୋଇଛି ୫-ଟି ଏବଂ ମୋ ସରକାର ଯୋଜନା । ସଚିବଙ୍କ ସମେତ ବରିଷ୍ଠ ଅଧିକାରୀମାନେ ଜିଲ୍ଲା ଗସ୍ତ କରୁଛନ୍ତି । ଲୋକଙ୍କ ସମସ୍ୟା ମୁଖ୍ୟମନ୍ତ୍ରୀଙ୍କ ପାଖରେ ପହଂଚାଉଛନ୍ତି । ସେହି ଅନୁସାରେ ମୁଖ୍ୟମନ୍ତ୍ରୀ ମଧ୍ୟ ସ୍ୱାସ୍ଥ୍ୟ କ୍ଷେତ୍ରରେ ଉନ୍ନତି ପାଇଁ ଅନେକ ଜିଲ୍ଲାରେ ବିଭିନ୍ନ ପ୍ୟାକେଜ୍ ଘୋଷଣା କରିଛନ୍ତି । ଅତିରିକ୍ତ ବଜେଟରେ ଏହାର ଝଲକ ଦେଖିବାକୁ ମିଳିବ । ସେହପିରି କାଳିଆ ଯୋଜନାରେ ଦ୍ୱିତୀୟ କିସ୍ତି ଦେବାକୁ ସରକାର ଘୋଷଣା କରିଥିବାରୁ ଅତିରିକ୍ତ ବଜେଟରେ ମଧ୍ୟ ଏଥିପାଇଁ ବ୍ୟବସ୍ଥା ରହିବ । ହେଲେ ସପ୍ତମ ବେତନ କମିଶନ ସୁପାରିଶ ଅନୁସାରେ ବକେୟା ଦରମା ପାଇବାକୁ ଅପେକ୍ଷା କରିଥିବା ସରକାରୀ କର୍ମଚାରୀଙ୍କ ପାଇଁ ଏଥର ଅତିରିକ୍ତ ବଜେଟରେ ବ୍ୟବସ୍ଥା ନାହିଁ ବୋଲି ସମୀକ୍ଷକ ମତ ଦେଇଛନ୍ତି । ଏଥିପାଇଁ ଆର୍ଥୀକ ମାନ୍ଦାବସ୍ଥା ଦାୟୀ । ଅତିରିକ୍ତ ବଜେଟରେ ପକାଘର ପାଇଁ ମଧ୍ୟ ବ୍ୟୟ ବରାଦର ସମ୍ଭାବନା ରହିଛି ।
ମୂଳ ବଜେଟରେ ସ୍ୱାସ୍ଥ୍ୟ ବିଭାଗ ପାଇଁ ୬ହଜାର ୭୦୭କୋଟି ଟଙ୍କା ବ୍ୟୟବରାଦ ହୋଇଥିବା ବେଳେ ପଞ୍ଚାୟତିରାଜ ବିଭାଗ ପାଇଁ ୧୫ହଜାର ୮୯୯କୋଟି ଟଙ୍କାର ବ୍ୟବସ୍ଥା ହୋଇଥିଲା । ମୂଳ ବଜେଟରେ ହୋଇଥିବା ବ୍ୟୟ ଅଟଳଳକୁ ଯେଉଁ ବିଭାଗ ଅଧିକ ଖର୍ଚ୍ଚ କରିଥିବେ, ସେହି ବିଭାଗକୁ ଅତିରିକ୍ତ ବଜେଟରେ ଅଧିକ ଅର୍ଥ ମିଳିବ ବୋଲି ଜଣାପଡ଼ିଛି ।

Trending news