close

खास खबरें सिर्फ आपके लिए...हम खासतौर से आपके लिए कुछ चुनिंदा खबरें लाए हैं. इन्हें सीधे अपने मेलबाक्स में प्राप्त करें.

ହଁ, ଆମେ ଆଦିବାସୀ, ଜିଇଁବାକୁ ଚାହୁଁଛୁ...ହକ୍ ଦିଅ

ଦୀର୍ଘ ୧୦ ବର୍ଷ ହେଲାଣି ଜାରି ରହିଛି ସେମାନଙ୍କ ଆନ୍ଦୋଳନ 

ହଁ, ଆମେ ଆଦିବାସୀ, ଜିଇଁବାକୁ ଚାହୁଁଛୁ...ହକ୍ ଦିଅ
ହଁ, ଆମେ ଆଦିବାସୀ, ଜିଇଁବାକୁ ଚାହୁଁଛୁ...ହକ୍ ଦିଅ

ହିମାଂଶୁ ଶେଖର ସାମଲ, ଭୁବନେଶ୍ୱର: ଦୀର୍ଘ ୧୦ ବର୍ଷ ହେଲାଣି ସେମାନେ ଆନ୍ଦୋଳନ ଜାରି ରଖିଛନ୍ତି । ଦୁଇ ଦୁଇ ଥର ସାଧାରଣ ନିର୍ବାଚନ ସରିଗଲାଣି, ତଥାପି ସେମାନଙ୍କ ଦାବି ପୂରଣ ହୋଇ ପାରିନି । ଆମେ କହୁଛୁ କୋରାପୁଟ ଜିଲ୍ଲାରେ ରହୁଥିବା ଦୋରା ସମ୍ପ୍ରଦାୟଙ୍କ କଥା । ପଡୋଶୀ ଆନ୍ଧ୍ର ପ୍ରଦେଶରେ ଏମାନେ ଆଦିବାସୀ,  କିନ୍ତୁ ଓଡ଼ିଶାରେ ଓବିସି । ଆଦିବାସୀଙ୍କ ଭଳି ଜୀବନ ଯାପନ କରୁଥିବା ଦୋରା ସମ୍ପ୍ରଦାୟ ଆଦିବାସୀ ମାନ୍ୟତା ପାଇବା ପାଇଁ ଲଢେଇ ଜାରି ରଖିଛି। ଚାଲନ୍ତୁ ଓଲଟାଇବା ଖବର ଡାଏରୀର ପରବର୍ତ୍ତୀ ପୃଷ୍ଠା ଆଉ ଦେଖିବା ଏହି ରିପୋର୍ଟ ।
ଏ ହେଉଛି ପଟାଙ୍ଗି ବ୍ଲକ ରାଲେଗାଡା ପଞ୍ଚାୟତର ମାଡାବାଲସା ଗାଁ । ଏଠାରେ ରହୁଛନ୍ତି ଦୋରା ସମ୍ପ୍ରଦାୟର ଲୋକ ।  ମୁଣ୍ଡ ଗୁଞ୍ଜିବାକୁ ନାହିଁ ଘର । ବିପଦସଙ୍କୁଳ ଅବସ୍ଥାରେ ରହୁଛନ୍ତି ଲୋକେ  । କେତେକ ଲୋକ କାଠ ଭରା ଦେଇ ଘର କାନ୍ଥକୁ ମଜଭୁତ ରଖିଛନ୍ତି । କେତେକ ଲୋକେ ନିଜ ରୋଜଗାର ଅର୍ଥରେ ଆଜବେଷ୍ଟସ ପକାଇଥିବା ବେଳେ, ପବନରେ ଉଡିଯିବା ଭୟରେ ଏହା ଉପରେ ଓଜନିଆ ଜିନିଷ ରଖିଛନ୍ତି । ଲୋକେ ରହୁଥିବା ଦୟନୀୟ ଅବସ୍ଥା ସମ୍ପର୍କରେ ବାରମ୍ବାର ପ୍ରଶାସନ ଓ ଲୋକ ପ୍ରତିନିଧିଙ୍କୁ ଜଣାଇଥିଲେ ମଧ୍ୟ କିଛି ସୁଫଳ ମିଳୁନାହିଁ । ଆଦିବାସୀ ହୋଇ ନ ଥିବା ଯୋଗୁଁ ସେମାନଙ୍କ କଥା କେହି ଶୁଣୁନଥିବା ଗ୍ରାମବାସୀ ଅଭିଯୋଗ କରିଛନ୍ତି  ।

ଆଦିବାସୀଙ୍କ ଭଳି ଜୀବନ ଯାପନ କରୁଥିବା ଦୋରା ସମ୍ପ୍ରଦାୟର ଲୋକେ ଆନ୍ଧ୍ରରେ ଆଦିବାସୀ ମାନ୍ୟତା ପାଇଛନ୍ତି । କିନ୍ତୁ ଓଡ଼ିଶାରେ ଏମାନେ ଓବିସି ଶ୍ରେଣୀର ହୋଇଥିବାରୁ ସରକାରୀ ସୁବିଧା ସୁଯୋଗରୁ ବଞ୍ଚିତ ହେଉଥିବା ଅଭିଯୋଗ କରିଛନ୍ତି ।  କୋଟିଆ ପଞ୍ଚାୟତର ଆନ୍ଧ୍ର ସୀମାବର୍ତ୍ତି  ନେରେଡିବାଲସା, ତାଡିବାଲସା ଓ ଆର୍ଜୁବାଲସା ଗାଁରେ ରହୁଥିବା ଦୋରା ସମ୍ପ୍ରଦାୟର ଲୋକେ ଆନ୍ଧ୍ରରେ ଆଦିବାସୀ ମାନ୍ୟତା ପାଇବା ସହିତ ସମସ୍ତ ସୁବିଧା ସୁଯୋଗ ପାଉଛନ୍ତି । ସେଠାକାର ପିଲାମାନେ ଆନ୍ଧ୍ରରେ ପାଠ ପଢୁଛନ୍ତି ଓ ସେମାନଙ୍କୁ ସମସ୍ତ ପ୍ରକାର ସରକାରୀ ସହାୟତା ପ୍ରଦାନ କରାଯାଉଛି । କିନ୍ତୁ ଓଡ଼ିଶା ପକ୍ଷରୁ ସେମାନଙ୍କୁ କିଛି ବି ସୁବିଧା ଯୋଗାଇ ଦିଆ ଯାଉ ନ ଥିବା ଅଭିଯୋଗ କରିଛନ୍ତି ।

୧୯୧୮ ମସିହାରୁ ୧୯୫୦ ପାର୍ଯ୍ୟନ୍ତ ଦୋରା ଲୋକଙ୍କୁ ବନବାସୀ ଆଖ୍ୟା ଦିଆଯାଇଥିଲା । ଏବେ କିପରି ସେମାନେ ଓବିସି  ହେଲେ ?  ତାକୁ ନେଇ ପ୍ରଶ୍ନ କରିଛି ଦୋରା ସମ୍ପ୍ରଦାୟ ।  ଏହାକୁ ବିରୋଧ କିରବା ସହ ହାତରେ ପ୍ଲା କାର୍ଡ ଧରି ଆଦିବାସୀ ମାନ୍ୟତା ଦାବି ନେଇ ଗତ ୨୦୦୮ ମସିହାରୁ ଆନ୍ଦୋଳନ ଚଲାଇ ଆସିଛନ୍ତି ।  ହେଲେ ଆଜି ପର୍ଯ୍ୟନ୍ତ ଦାବି ପୂରଣ ହୋଇପାରୁନି ।  ଏପରିକି, ଗତ ସାଧାରଣ ନିର୍ବାଚନ ପୂର୍ବରୁ ପଟାଙ୍ଗି  ପୂର୍ବତନ  ବିଧାୟକଙ୍କ ବାସ ଭବନ ଆଗରେ ଦୋରା ସମାଜ ପକ୍ଷରୁ ଧାରଣା ଦିଆଯାଇଥିଲା । ଆଗାମୀ ଦିନରେ ଦାବି ପୂରଣ ନହେଲେ ଦୋରା ସମ୍ପ୍ରଦାୟ ସଂଘ ପୁଣି ଥରେ ରାଜରାସ୍ତାକୁ ଓହ୍ଲାଇବବୋଲି ଚେତାବନୀ  ଦେଇଛି ।

ସେପଟେ ଦୋରା ସମ୍ପ୍ରଦାୟ ରହୁଥିବା ଗାଁ ଗୁଡିକ ଏବେ ବି ଅବହେଳିତ । ଗାଁ କୁ ଯିବା ପାଇଁ ଭଲ ରାସ୍ତାଟିଏ ନାହିଁ । ପାନୀୟ ଜଳର ସୁବିଧା ଓ  ସ୍ୱାସ୍ଥ୍ୟ ସେବା କଥା ନ କହିବା ଭଲ ।  ଗାଁରେ ଶୌଚାଳୟ ମଧ୍ୟ ନିର୍ମାଣ କରାଯାଇନାହିଁ  ।  ଅଧିକାଂଶ ଦୋରା ସମ୍ପ୍ରଦାୟର ପିଲାମାନେ ଆନ୍ଧ୍ରରେ ପାଠ ପଢୁଛନ୍ତି । ଦୋରା ସମ୍ପ୍ରଦାୟର ଦାବି ସମ୍ପର୍କରେ ଅବଗତ ଅଛନ୍ତି । ଏ ଦିଗରେ ଅନୁଧ୍ୟାନ କରିବା ପାଇଁ ଏକ ଟିମ ଜିଲ୍ଲାର ବିଭିନ୍ନ ଗାଁ ଗସ୍ତ କରି ଅନୁଧ୍ୟାନ କରି ବା ସହ ଏକ ରିପୋର୍ଟ ପ୍ରଦାନ କରିବା ପରେ ପଦକ୍ଷେପ ନିଆଯିବ ବୋଲି ପଟାଙ୍ଗି ବିଧାୟକ କହିଛନ୍ତି ।

କୋରାପୁଟ ଜିଲ୍ଲାରେ ଯେ, କେବଳ ଦୋରା ସମ୍ପ୍ରଦାୟ ଆଦିବାସୀ ମାନ୍ୟତା ଦାବୀ କରୁଛନ୍ତି ତା ନୁହେଁ, ଏଥିରେ ଏବେ ସାମିଲ ହୋଇଛନ୍ତି ମାଳି, ରଣା, କମାର ଆଦି ସମ୍ପ୍ରଦାୟର ଲୋକେ । ତେବେ ୧୦ ବର୍ଷ ହେଲାଣି ଆଦିବାସୀ ମାନ୍ୟତା  ମିଳୁନି । ତେବେ ରାଜ୍ୟ ସରକାର ଏ ଦିଗରେ କେବେ  ପଦକ୍ଷେପ ନେଉଛନ୍ତି ତାହା ଉପରେ ସମସ୍ତଙ୍କ ନଜର ।