ମଧ୍ୟପ୍ରଦେଶରେ ନେତୃତ୍ୱ ପରିବର୍ତ୍ତନକୁ ନେଇ ଏପରି କିଛି କହିଲେ ଜ୍ୟୋତିରାଦିତ୍ୟ ସିନ୍ଧିଆ

ନୂଆଦିଲ୍ଲୀ: ବିଜେପି ରାଜ୍ୟସଭା ସାଂସଦ ଜ୍ୟୋତିରାଦିତ୍ୟ ସିନ୍ଧିଆ (BJP Rajya Sabha MP Jyotiraditya Scindia) କହିଛନ୍ତି ଯେ ମଧ୍ୟପ୍ରଦେଶରେ ନେତୃତ୍ୱ ପରିବର୍ତ୍ତନ ଭଳି କିଛି ବିଷୟ ନାହିଁ । ସରକାରଙ୍କୁ ପ୍ରଶଂସା କରି ସେ କହିଛନ୍ତି ଯେ ୧୬ ମାସ ମଧ୍ୟରେ ଶିବରାଜ ସିଂ ଚୌହାନ (Shivraj Singh Chouhan) କଠିନ ପରିସ୍ଥିତିରେ ବିକାଶମୂଳକ କାର୍ଯ୍ୟକୁ ଆଗେଇ ନେବାରେ ଏକ ଉଲ୍ଲେଖନୀୟ କାର୍ଯ୍ୟ କରିଛନ୍ତି । ସରକାର ସଠିକ୍ ଦିଗରେ କାର୍ଯ୍ୟ କରୁଥିବାରୁ ଦ୍ୱିତୀୟ ଲହରକୁ ନିୟନ୍ତ୍ରଣ କରାଯାଇଛି । ସରକାରଙ୍କ ଉପରେ ଲୋକଙ୍କ ଆତ୍ମବିଶ୍ୱାସ ବୃଦ୍ଧି ପାଇଛି ।

ଅଧିକ ପଢ଼ନ୍ତୁ:-ବିଜେପିରେ ଯୋଗଦେବା ମାତ୍ରେ ଜିତିନ ପ୍ରସାଦଙ୍କୁ ମିଳିବାକୁ ଯାଉଛି ଏହି ବଡ଼ ଉପହାର!

ବିଗତ କିଛି ଦନ ଧରି ଚାଲୁଥିବା ରାଜନୈତିକ କଳ୍ପନାଜଳ୍ପନା ଓ ଗୋଟିଏ ଦିନର ଭୋପାଳ ଗସ୍ତ ପରେ ଗୁରୁବାର ଗ୍ୱାଲିଅରରେ ପହଞ୍ଚିଥିବା ସିନ୍ଧିଆ ଗଣମାଧ୍ୟମ ସହ ଚର୍ଚ୍ଚା କରିଥିଲେ । ପୂର୍ବତନ ସାଂସଦ ଜିତିନ ପ୍ରସାଦ (Jitin Prasada) ଙ୍କ ସହ ଜଡିତ ପ୍ରଶ୍ନ ଉପରେ ସେ କହିଛନ୍ତି ଯେ କଂଗ୍ରେସ (Congress) ଛାଡି ବିଜେପି (BJP) ରେ ଯୋଗଦେବା ତାଙ୍କର ନିଷ୍ପତ୍ତି ଯଥାର୍ଥ । ଜିତିନ ମୋ ସହ ଛୋଟ ଭାଇ ଭଳି କାମ କରିଛନ୍ତି, ତାଙ୍କ ସହ ମୋର ପାରିବାରିକ ସମ୍ପର୍କ ଅଛି । କିଛି ସମୟ ପାଇଁ ରାଜନୈତିକ ସମ୍ପର୍କ ଭାଙ୍ଗିଥିଲା, ଯାହା ବର୍ତ୍ତମାନ ପୁଣି ଜଡ଼ି ଯାଇଛି ।

ସିନ୍ଧିଆ ଆଗକୁ କହିଛନ୍ତି ଯେ, ଆମେ କୋରୋନା ସଂକ୍ରମଣକୁ ନିୟନ୍ତ୍ରଣ କରିଛୁ, ଏପର୍ଯ୍ୟନ୍ତ ବିଜୟ ହାସଲ କରିନାହୁଁ । ସଂକ୍ରମଣର ମୁକାବିଲା ପାଇଁ କେନ୍ଦ୍ର ଓ ରାଜ୍ୟ ସରକାର ଯୁଦ୍ଧକାଳୀନ ଭିତ୍ତିରେ ପ୍ରସ୍ତୁତି ଆରମ୍ଭ କରିଛନ୍ତି । ଏହା ବିରୁଦ୍ଧରେ ଆମର ସବୁଠାରୁ ବଡ ଅସ୍ତ୍ର ହେଉଛି ଟିକା, ତେଣୁ ଟିକାକରଣ ବୃଦ୍ଧି ପାଇଁ ଯୁଦ୍ଧକାଳୀନ ଭିତ୍ତିରେ ପ୍ରୟାସ କରାଯାଉଛି ।

ଅଧିକ ପଢ଼ନ୍ତୁ:-କୋରୋନାର ମୃତ୍ୟୁ ସଂଖ୍ୟାରେ ଖେଳ! ମାନିଲେ ବିହାର ସରକାର ୫୪୨୪ ନୁହେଁ ବରଂ ୯୩୭୫ ଲୋକଙ୍କ ଯାଇଛି ଜୀବନ

ସୂଚନାଯୋଗ୍ୟ, ଜ୍ୟୋତିରାଦିତ୍ୟଙ୍କ ପରି ଜିତିନ ପ୍ରସାଦଙ୍କ ପିତା ମଧ୍ୟ ଜଣେ ବଡ କଂଗ୍ରେସ ନେତା ତଥା କେନ୍ଦ୍ର ମନ୍ତ୍ରୀ ଥିଲେ । ଜିତିନ ପ୍ରସାଦ ଓ ଜ୍ୟୋତିରାଦିତ୍ୟ ମଧ୍ୟ ମନମୋହନ ସିଂଙ୍କ ସରକାରରେ କେନ୍ଦ୍ର ମନ୍ତ୍ରୀ ରହିଥିଲେ । ଜିତିନ ପ୍ରସାଦ ୨୦୦୪ ଓ ୨୦୦୯ରେ ଉତ୍ତରପ୍ରଦେଶରୁ କଂଗ୍ରେସ ସାଂସଦ ଥିଲେ । ୨୦୧୯ ଲୋକସଭା ନିର୍ବାଚନ ପୂର୍ବରୁ ମଧ୍ୟ ଜିତିନ ପ୍ରସାଦ ବିଜେପିରେ ଯୋଗ ଦେଇପାରନ୍ତି ବୋଲି କଳ୍ପନାଜଳ୍ପନା ଜୋର ଧରିଥିଲା । କଂଗ୍ରେସ ହାଇକମାଣ୍ଡର ହସ୍ତକ୍ଷେପ ଯୋଗୁଁ ଜିତିନ ପ୍ରସାଦ ନିଜ ନିଷ୍ପତ୍ତି ବଦଳାଇଥିଲେ ।