୨ ବର୍ଷ ପାଇଁ ସରକାରୀ ନିଯୁକ୍ତି ବନ୍ଦ, ପ୍ରତିବାଦ କଲା ଯୁବ କଂଗ୍ରେସ

ମଳୟ ରଞ୍ଜନ ମହାନ୍ତି, ଭୁବନେଶ୍ୱର: ଆସନ୍ତା ଦୁଇ ବର୍ଷ ପାଇଁ ସ୍ୱାସ୍ଥ୍ୟ ବିଭାଗର ନିଯୁକ୍ତିକୁ ବାଦ ଦେଲେ ଅନ୍ୟ କୌଣସି ସରକାରୀ ବିଭାଗରେ ନିଯୁକ୍ତି ଦିଆଯିବନାହିଁ । କୋଭିଡ ୧୯ ଯୋଗୁ ଓଡ଼ିଶାର ଅର୍ଥନୀତି ଦୋହଲି ଯାଇଥିବା ବେଳେ ଗତକାଲି ରାଜ୍ୟ ସରକାର ଏଭଳି କିଛି ନିଷ୍ପତ୍ତି ନେଇଥିଲେ । ଯାହାକୁ ନେଇ ଆଜି ପ୍ରତିବାଦ କରିଛି ଓଡ଼ିଶା ଯୁବ କଂଗ୍ରେସ । କଂଗ୍ରେସ ଭବନ ସାମ୍ନାରେ ଜୋତା ପଲିସ କରି ନିଆରା ଢଙ୍ଗରେ ରାଜ୍ୟ ସରକାରଙ୍କ ନିଷ୍ପତ୍ତିକୁ ବିରୋଧ କରିଛନ୍ତି ଯୁବ କଂଗ୍ରେସ କର୍ମକର୍ତ୍ତା । 

ଗତ ୨୦ ବର୍ଷ ଭିତରେ ନବୀନ ସରକାର କେତେ ନିଯୁକ୍ତି ଦେଇଛନ୍ତି, ତାହା ସ୍ପଷ୍ଟ କରନ୍ତୁ ବୋଲି କହିଛନ୍ତି ଓଡ଼ିଶା ଯୁବ କଂଗ୍ରେସ ସଭାପତି ସ୍ମୃତି ଲେଙ୍କା । ରାଜ୍ୟରେ ପ୍ରବସୀ ଫେରୁଛନ୍ତି । ବେକାରୀ ସମସ୍ୟା ବୃଦ୍ଧି ପାଉଛି । ତେଣୁ ଏଭଳି ସମୟରେ ସରକାରଙ୍କ ଏହି ନିଷ୍ପତ୍ତି ଆହୁରି ବେକାରୀ ସୃଷ୍ଟି କରିବ ବୋଲି ସେ କହିଛନ୍ତି । 

ଯୁବ କଂଗ୍ରେସର କହିବା କଥା ଏହା ଯେ, ରାଜ୍ୟ ସରକାର ଏହାର ପୁନର୍ବିଚାର କରନ୍ତୁ । ନହେଲେ କଂଗ୍ରେସ ରାଜରାସ୍ତାକୁ ଓହ୍ଲାଇବ ବୋଲି ଧମକ ଦେଇଛି । 

ସୂଚନାଯୋଗ୍ୟ, କୋରୋନା କାରଣରୁ ଓଡ଼ିଶାର ଅର୍ଥନୀତି ଦୋହଲିପଡ଼ିଥିବା ବେଳେ ରାଜ୍ୟ ସରକାର ବଡ଼ ଧରଣର କଟକଣା ଜାରି କରିଛନ୍ତି । ଏହି କଟକଣା ଅନୁସାରେ, ଆସନ୍ତା ୨ ବର୍ଷ ପର୍ଯ୍ୟନ୍ତ ସରକାରୀସ୍ତରରେ କୌଣସି ନୂଆ ଗାଡ଼ି କିଣାଯାଇପାରିବନି । ମେଡିକାଲ ସାମଗ୍ରୀ ଓ ସଭାସମିତି ପାଇଁ ଆବଶ୍ୟକ ଡିଜିଟାଲ ଯନ୍ତ୍ରାଂଶକୁ ବାଦ ଦେଲେ ଅନ୍ୟ କୌଣସି ଜିନିଷ ମଧ୍ୟ କିଣାବା ଉପରେ ରୋକ୍ ଲଗାଯାଇଛି । ସେହିପରି ସ୍ୱାସ୍ଥ୍ୟ ବିଭାଗ ବ୍ୟତୀତ ଅନ୍ୟ କୌଣସି ସରକାରୀ ବିଭାଗରେ ନିଯୁକ୍ତି ମଧ୍ୟ ଦିଆଯିବନାହିଁ । ଅର୍ଥାତ ୨ ବର୍ଷ ପର୍ଯ୍ୟନ୍ତ ସରକାରୀ ନିଯୁକ୍ତି ମିଳିବନି । ଅର୍ଥବିଭାଗ ପକ୍ଷରୁ ପ୍ରମୁଖ ଶାସନ ସଚିବ ଅଶୋକ କୁମାର ମୀନା ଏନେଇ ସମସ୍ତ ବିଭାଗୀୟ ଅତିରିକ୍ତ ମୁଖ୍ୟ ଶାସନ ସଚିବ, ପ୍ରମୁଖ ଶାସନ ସଚିବ, ଶାସନ ସଚିବ ଓ ବିଭାଗୀୟ ମୁଖ୍ୟଙ୍କୁ ଚିଠି ଲେଖି ଜଣାଇଦେଇଛନ୍ତି । ୧୯୯୯ ପରେ ଏହାକୁ ସବୁଠୁ ବଡ଼ କଟକଣା ବୋଲି କୁହାଯାଉଛି ।