ଲକଡାଉନ୍ ବେଳେ ଚକାଚକ୍ ହେଉଛି ଶ୍ରୀକ୍ଷେତ୍ର

ସଞ୍ଜୟ କୁମାର ମହାପାତ୍ର, ପୁରୀ: ଲକଡାଉନ୍ ଯୋଗୁଁ ବଦଳି ଯାଇଛି ସହରର ପରିମଳ ଅବସ୍ଥା  । ସହରରୁ ପ୍ରାୟ ୬୦ ପ୍ରତିଶତ ଆବର୍ଜନା କମି ଯାଇଛି  । ଦୋକାନ ବଜାର ବନ୍ଦ ଯୋଗୁଁ ରାସ୍ତା ଘାଟ ବି ବେଶ ସଫା ସୁତୁରା ହୋଇଛି  । ଗଳିକନ୍ଦିରୁ ଆରମ୍ଭ କରି ବଡଦାଣ୍ଡ ସବୁଠି ଏବେ ସ୍ୱଛତା । ସେପଟେ ଜୁନ୍ ୨୩ରେ କାଳିଆ ସାଆନ୍ତଙ୍କ ବିଶ୍ୱ ପ୍ରସିଦ୍ଧ ଘୋଷଯାତ୍ରା । ଦିନ ଗଣିଲେ ଆଉ ମାତ୍ର ୬୫ଦିନ । କୋରୋନାକୁ ନେଇ ଚାଲିଛି ବେଶ୍ କଟକଣା । କିନ୍ତୁ ଏଇ ଭିତରେ ରଥଯାତ୍ରା ପ୍ରସ୍ତୁତି ମଧ୍ୟ ଦ୍ରୁତ ଗତିରେ ଆଗେଇ ଚାଲିଛି ।

ପୁରୀ ସହରରେ ସ୍ୱଚ୍ଛ ଓ ପରିମଳ ବ୍ୟବସ୍ଥା ଉପରେ ବିଶେଷ ଭାବେ ଗୁରୁତ୍ୱ ଦିଆଯାଇଛି । ତଥାପି ସହରରେ ରହିଥିବା ସମସ୍ତ ନାଳ ନର୍ଦ୍ଦମାକୁ ପରିଷ୍କାର କରାଯିବା ସହ ଗଙ୍ଗା ଓ ଯମୁନା ମୁଖ୍ୟ ନଳାକୁ ଆବର୍ଜନା ମୁକ୍ତ କରାଯାଉଛି । ସେପଟେ ଶ୍ରୀମନ୍ଦିର ଠାରୁ ଶ୍ରୀଗୁଣ୍ଡିଚା ପର୍ଯ୍ୟନ୍ତ ନଳା ସଫେଇ କାର୍ଯ୍ୟରେ ଲାଗିପଡିଛନ୍ତି ଶହଶହ ପରିମଳ କର୍ମଚାରୀ । ମହାପ୍ରଭୁଙ୍କ ରଥଯାତ୍ରା ଶୃଙ୍ଖଳିତ ଓ ସୁସଙ୍ଗଠିତ କରିବା ପାଇଁ  ଜାରି ରହିଛି ସମସ୍ତଙ୍କର ପ୍ରୟାସ।

ଶ୍ରୀକ୍ଷେତ୍ରରେ ନାଳ ନର୍ଦ୍ଦମା ସମସ୍ୟା ହେଉଛି ସବୁଠୁ ଗୁରୁତ୍ୱପୂର୍ଣ୍ଣ  । ବର୍ଷା ହେଲେ ନାଳ ନର୍ଦ୍ଦମାର ଜଳ ବଡ଼ଦାଣ୍ଡରେ ଜଳାର୍ଣ୍ଣବ ହୋଇପଡ଼େ । ରଥଯାତ୍ରା ପାଇଁ ନାଳ ସଫେଇ କାମ ଆରମ୍ଭ ହୋଇଥିବା ବେଳେ ଲକଡାଉନ୍ ହଟିବା ଦିନ ଯାଏଁ ଟାର୍ଗେଟ ଭିତରେ ସଫା ଶେଷ ହେବ ବୋଲି କହଛି ପୌରସଂସ୍ଥା  । ଆଉ ଲକଡାଉନ ବି ସହର ପାଇଁ ଆଶିର୍ବାଦ ସାବ୍ୟସ୍ତ ହୋଇଛି  । ଦୈନନ୍ଦିନ ଅଳିଆ ଆବର୍ଜନା ଯାହା ବାହାରୁଥିଲା, ୬୦ ଭାଗ ଆବର୍ଜନା କମିଯାଇଛି । ପୁଣି ବଡଦାଣ୍ଡରେ ସ୍ୱଚ୍ଛତା କର୍ମୀମାନେ ମଧ୍ୟ ଅଳିଆ କମ ଆସୁଥିବା କହିଛନ୍ତି  । ବଡଦାଣ୍ଡର ଉଭୟ ପାର୍ଶ୍ଵରେ ରହିଥିବା ନଳାକୁ ଆବର୍ଜନା ମୁକ୍ତ କରାଯାଉଛି । ଜେସିପି ମେସିନରେ ସମ୍ଭବ ନ ହେବାରୁ ହାତରେ କୋଦାଳ ଧରି ନଳାରୁ ବାହାର କରାଯାଉଛି ଆବର୍ଜନା ।  ଆଉ ଟ୍ରଲି ସାହାଯ୍ୟରେ ଆବର୍ଜନାକୁ ସିପ୍ଟିଂ କରାଯାଉଛି । 

Add Zee News as a Preferred Source

ବିଭିନ୍ନ ସମୟରେ ମହାପ୍ରଭୁଙ୍କ ରଥ ମଧ୍ୟ ନଳାପାଣିରେ ଗଡିଥିବା ନଜିର ରହିଥିବାରୁ ଏଥର ନଳା ସଫେଇ ଉପରେ ଅଧିକ ଗୁରୁତ୍ୱ ଦିଆଯାଇଛି। ତେବେ ସହରରେ ସମସ୍ତ ଦୋକାନ ବଜାର ବନ୍ଦ ରହିଥିବାରୁ ନାଳ ନର୍ଦ୍ଧମା ଠାରୁ ଆରମ୍ଭ କରି ବଡ଼ଦାଣ୍ଡ ଓ ଗଳି କନ୍ଦି ସବୁ ଏବେ ପରିଷ୍କାର ରହିଛି  । ପୁଣି ଅତି ନିର୍ମଳ ଓ ସ୍ୱଚ୍ଛ ପରିମଳ ରହିଥିବାରୁ ସହରରେ ଏକ ସ୍ୱାସ୍ଥ୍ୟକର ପରିବେଶ ଅନୁଭବ ହେଉଛି । 

ସେହିପରି ପୌରସଂସ୍ଥାର ସମସ୍ତ ୩୨ଟି ୱାର୍ଡରେ ଏକକାଳୀନ ଚାଲିଛି ନଳା ସଫେଇ । ଶହଶହ ପରିମଳ କର୍ମଚାରୀ କୋଡି କୋଦାଳ ଧରି ଲାଗିପଡିଛନ୍ତି । ବଡ଼ ବଡ଼ ନଳାକୁ ଜେସିପି ମେସିନ ସାହାଯ୍ୟରେ ସଫେଇ କରାଯାଉଛି । ଆବଶ୍ୟକ ପଡିଲେ ମରାମତି ମଧ୍ୟ କରାଯାଉଛି ।  ଗୋଟିଏ ପଟେ ମହାପ୍ରଭୁଙ୍କ ନୀତିକାନ୍ତି, ସେବାପୂଜା ଓ ବିଧି ପରମ୍ପରା ଚାଲିଥିବା ବେଳେ ଘୋଷଯାତ୍ରା ପାଇଁ ପ୍ରଶାସନିକ କାର୍ଯ୍ୟ ମଧ୍ୟ ଅନୁରୂପ ଢଙ୍ଗରେ ଆଗେଇ ଚାଲିଛି । ସମସ୍ତଙ୍କର ଲକ୍ଷ୍ୟ ୬୫ଦିନ ମଧ୍ୟରେ ସବୁ କାର୍ଯ୍ୟ ସମ୍ପୂର୍ଣ୍ଣ କରାଯିବ । 

ତେବେ ଆସନ୍ତା ୨୬ରେ ମହାପ୍ରଭୁଙ୍କ ଚନ୍ଦନ ଯାତ୍ରା ସହ ରଥନିର୍ମାଣର ଶୁଭାରମ୍ଭ ଆଉ ତାପରେ ସ୍ନାନଯାତ୍ରା ଓ ପ୍ରସିଦ୍ଧ ଘୋଷଯାତ୍ରା । ପ୍ରଶାସନ ପାଇଁ ରହିଛି ସବୁଠୁ ବଡ ଚ୍ୟାଲେଞ୍ଜ ।