ରଥ ଅନୁକୁଳ ପର୍ବ ବେଳେ କେମିତି ରହିବ ସାମାଜିକ ଦୂରତ୍ୱ, ଚିନ୍ତାରେ ଶ୍ରୀମନ୍ଦିର ପ୍ରଶାସନ

ସଞ୍ଜୟ କୁମାର ମହାପାତ୍ର, ପୁରୀ: ଏପ୍ରିଲ ୨୬ରେ ହେବ ଶ୍ରୀକ୍ଷେତ୍ରରେ ଅକ୍ଷୟ ତୃତୀୟା ଉତ୍ସବ । ଆଉ ମହାପ୍ରଭୁଙ୍କର ଘୋଷଯାତ୍ରା ପାଇଁ ହେବ ରଥ ନିର୍ମାଣର ଅନୁକୂଳ ପର୍ବ  । ସେନେଇ ଶନିବାର ନୟାଗଡ ବନଖଣ୍ଡରୁ ୪୨ ଖଣ୍ଡ ରଥକାଠ ପଞ୍ଚମ ପର୍ଯ୍ୟାୟ ବଡଦାଣ୍ଡର ମହାରଥ ଖଳାରେ ପହଞ୍ଚିଛି ।  ହେଲେ କୋରୋନାକୁ ନେଇ ଲକ୍ ଡାଉନର ଅବଧି ଏପ୍ରିଲ ୩୦ ପର୍ଯ୍ୟନ୍ତ ରହୁଥିବାରୁ ସାମାଜିକ ଦୂରତ୍ୱ କିଭଳି ରଥକଳାରେ ରହିବ, ସେନେଇ ଚିନ୍ତା ବଢ଼ିଯାଇଛି । ତେବେ ଏହା ଉପରେ ରଥ ନିର୍ମାଣ ସେବାୟତଙ୍କ ସହ ଶ୍ରୀମନ୍ଦିର ପ୍ରଶାସନର ଗୁରୁତ୍ୱପୁର୍ଣ ବୈଠକ ହେବ ବୋଲି ଜଣାପଡ଼ିଛି । ଏନେଇ ଶ୍ରୀମନ୍ଦିର ତତ୍ୱବଧାରକ ସୂଚନା ଦେଇଛନ୍ତି । 

ସେପଟେ ରଥଖଳାରେ ୭୭ଭୋଇ ସେବକଙ୍କ ସହ ୧୮୦ ଜଣ ରଥ ନିର୍ମାଣ ସେବାୟତ ଯୋଗ ଦେବାକୁ ଥିବାରୁ ସେନେଇ ଶ୍ରୀମନ୍ଦିର ପ୍ରଶାସନ ଯାହା ନିର୍ଦ୍ଦେଶ ଦେବ ସେହି ଅନୁସାରେ କାର୍ଯ୍ୟ କରାଯିବ । ପୁଣି ଜୁନ ୨୩ରେ ରଥଯାତ୍ରା ଥିବାରୁ ସେନେଇ ରଥନିର୍ମାଣ, ଅକ୍ଷୟ ତୃତୀୟା ଠାରୁ ଚନ୍ଦନ ଯାତ୍ରା ଆଦିକୁ ନେଇ ଖୁବଶୀଘ୍ର ଉଚ୍ଚସ୍ତରୀୟ ବୈଠକ ବସି ଏସବୁର ସମୀକ୍ଷା କରାଯିବ ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ମିଳିଛି ।

କୋରୋନାକୁ ନେଇ ଲକ୍ ଡାଉନର ପ୍ରଭାବ ସମସ୍ୟା ସୃଷ୍ଟି କରିପାରିନି ମହାପ୍ରଭୁଙ୍କ ରଥଯାତ୍ରାର ପ୍ରସ୍ତୁତିରେ । ଜୁନ ୨୩ରେ ହେବାକୁ ଥିବା ରଥଯାତ୍ରା ପାଇଁ ରଥଖଳାରେ ପର୍ଯ୍ୟାୟ କ୍ରମେ ପହଞ୍ଚିଛି ରଥକାଠ । ଆଉ ଆଜି ନୟାଗଡ ବନଖଣ୍ଡରୁ ପହଞ୍ଚିଛି ପଞ୍ଚମ ପର୍ଯ୍ୟାୟ ରଥକାଠ । କୋରୋନାର ଅନେକ କଟକଣା ଭିତରେ ନୟାଗଡ ବନଖଣ୍ଡରୁ ୪୨ ଖଣ୍ଡ ଅସନ ଓ ଧଉରା କାଠ ପହଞ୍ଚିବା ପରେ ତାକୁ ରଥଖଳାରେ ରଖାଯାଇଛି । ସେପଟେ ରଥନିର୍ମାଣ ପାଇଁ ୮୬୫ଖଣ୍ଡ କାଠ ଆବଶ୍ୟକ। ସେଥିରୁ ୧୯୩ କାଠ ବଳକା ରହିଛି । ମୋଟ ୬୭୨ ଖଣ୍ଡ କାଠରୁ ପୂବରୁ ୧୭୫ ଖଣ୍ଡ କାଠ ଆସିଛି । ନୟାଗଡ ବନଖଣ୍ଡରୁ  ୪୨ ଖଣ୍ଡ କାଠରୁ  ଧଉରା ୧୨ଫୁଟିଆ ୧୧ଟି , ଅସନ ୨୦ଫୁଟିଆ ୫ଟି, ଧଉରା ୨୦ଫୁଟିଆ ୨୬ଟି କାଠ ଆସିଛି । ରାମ ନବମୀ ଦିନ ମଧ୍ୟ କଟକ ଖପୁରିଆସ୍ ମିଲରେ କାଠ ଚିରଟ କରାଯାଇଛି ।  ଏପ୍ରିଲ ୨୬ରେ ଅକ୍ଷୟ ତୃତୀୟା ଦିନ ରଥ ନିର୍ମାଣ କାର୍ଯ୍ୟ ଆରମ୍ଭ ହେବ । ତେଣୁ କରୋନାକୁ ନେଇ ଲକ୍ ଡାଉନ ସ୍ଥିତି ଥିବାରୁ ଏନେଇ ଶ୍ରୀମନ୍ଦିର ପ୍ରଶାସନର ଏକ ଉଚ୍ଚସ୍ତରୀୟ ବୈଠକ ପରେ ରଥଯାତ୍ରା କିଭଳି ହେବ ସେନେଇ ପଦକ୍ଷେପ ନିଆଯିବ ବୋଲି କହିଛନ୍ତି ଶ୍ରୀମନ୍ଦିର ତତ୍ୱବଧାରକ ସୁଦର୍ଶନ ମେକାପ । 

Add Zee News as a Preferred Source

ଅକ୍ଷୟ ତୃତୀୟା ଦିନ ରଥ ନିର୍ମାଣ ଅନୁକୂଳ ପାଇଁ ନିର୍ମାଣ ହେବ ରଥକଳାରେ ଚାଳି । ତାସହ ଚନ୍ଦନଯାତ୍ରା ପାଇଁ ବଡଦାଣ୍ଡରୁ ନରେନ୍ଦ୍ରକୋଣ ପର୍ଯ୍ୟନ୍ତ କରାଯିବ ଛାମୁଣ଼୍ଡିଆ । ଆଉ ସେସବୁକୁ ଭୋଇ ସେବକମାନେ କରିବେ । ସେପଟେ ଚନ୍ଦନଯାତ୍ରା ପାଇଁ ନରେନ୍ଦ୍ର ପୁଷ୍କରିଣୀରେ ଚାପ ଡଙ୍ଗା ପାଇଁ ଅନେକ ନିର୍ମାଣ କାମକୁ ମହାରଣା ସେବକମାନେ କରିବେ । ତେଣୁ ଏସବୁ ସହ ରଥ ନିର୍ମାଣ ପାଇଁ ୭୭ ଜଣ ଭୋଇ ସେବକ ପୁରୀ ଜିଲାର ବିଭିନ୍ନ କୋଣରୁ ଆସିବାକୁ ଥିବାବେଳେ ମୋଟ ୧୮୦ରୁ ଉର୍ଦ୍ଧ ସେବକ ରଥ ନିର୍ମାଣରେ ସାମିଲ ହେବେ । ତେଣୁ ରଥ ନିର୍ମାଣ ସମୟରେ ଲକ୍ ଡାଉନ୍ ରହିଥିବାରୁ ଏତେ ଲୋକେ କିଭଳି ଆସିବେ ପୁଣି ସେମାନଙ୍କ ଭିତରେ କିଭଳି ରହିବ ସାମାଜିକ ଦୂରତ୍ୱ  ତାହା ସବୁଠୁ ଚିନ୍ତାର ବିଷୟ । 

ଚଳିତ ମାସରେ ହେବ ମହାପ୍ରଭୁଙ୍କ ଘୋଷଯାତ୍ରା ପାଇଁ ପ୍ରସ୍ତୁତି ବୈଠକ । ହେଲେ ରଥଯାତ୍ରାକୁ କିଭଳି କରାଯିବ ତାହା ଯେତିକି ଚିନ୍ତାଜନକ ନୁହେଁ, କୋରୋନା ସଂକ୍ରମଣ ଓ ଲକ୍ ଡାଉନ ବେଳେ ସଚେତନତା ଓ ସତର୍କତା ଅବଲମ୍ବନ କରି କିଭଳି ହେବ ତାହା ଏବେ ମୁଖ୍ୟ ଚ୍ୟାଲେଞ୍ଜ ।