ସମ୍ବଲପୁରର ଆକ୍ରାନ୍ତ ଗୁଜୁରାଟ ଫେରନ୍ତା

ଅଜୟ କୁମାର ନାଥ, ସମ୍ବଲପୁର: ଜିଲ୍ଲାକୁ ପଶିଛି କୋରୋନା । ଆଜି ପ୍ରଥମ ଥର ପାଇଁ ସମ୍ବଲପୁରରେ ଜଣେ କୋରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଆକ୍ରାନ୍ତଙ୍କ ବୟସ ୧୮ ବର୍ଷ । ସେ ଅହମ୍ମଦାବାଦ ଫେରନ୍ତା । ତାଙ୍କ ଘର ରେଢ଼ାଖୋଲ ଅଞ୍ଚଳରେ । ତେବେ କ୍ୱାରେଣ୍ଟାଇନ ସେଣ୍ଟରରୁ ହିଁ ଆକ୍ରାନ୍ତ ଜଣକ ଚିହ୍ନଟ ହୋଇଥିବାରୁ ଗୋଷ୍ଠୀ ସଂକ୍ରମଣର ଆଶଙ୍କା ନାହିଁ । ଯାହାକି ଜିଲ୍ଲାବାସୀଙ୍କ ପାଇଁ ଆଶ୍ୱସ୍ତିକର ଖବର । 

ଯାହା ଜଣପଡ଼ିଛି, ଯୁବକ ଜଣକ ନିକଟ ଅତୀତରେ ହିଁ ଗୁଜୁରାଟ ଅହମ୍ମଦାବାଦରୁ ଫେରିଥିଲେ । ଏକ ବସ୍ ମାଧ୍ୟମରେ ପାଖାପାଖି ୨୦ ଜଣ ବ୍ୟକ୍ତି ଅହମ୍ମଦାଦରୁ ସମ୍ବଲପୁରକୁ ଫେରିଥିଲେ । ତେବେ ସମସ୍ତଙ୍କୁ ଜିଲ୍ଲା ପ୍ରଶାସନ ପକ୍ଷରୁ କ୍ୱାରେଣ୍ଟାଇନ ସେଣ୍ଟରରେ ରଖାଯାଇଥିଲା । ତେବେ ସେମାନଙ୍କ ମଧ୍ୟରୁ ଜଣେ କୋରୋନା ପଜିଟିଭ ବୋଲି ସ୍ପଷ୍ଟ ହୋଇଛି ।  ଏନେଇ ସମ୍ବଲପୁର ଜିଲ୍ଲାପାଳ ଶୁଭମ୍ ସକସେନା କହିଛନ୍ତି ଯେ, କୋରୋନା ପଜିଟିଭଙ୍କ ଟ୍ରାଭେଲ ହିଷ୍ଟ୍ରି ନେଇ ଅନୁସନ୍ଧାନ କରାଯାଇଛି । ସେ ଗତ ୧୧ ତାରିଖରେ ଗ୍ରାମକୁ ଫେରିଥିଲେ । ତୁରନ୍ତ ତାଙ୍କୁ ଲୁହାପଙ୍କ କ୍ୟୁରେଣ୍ଟାଇନ ସେଣ୍ଟରରେ ରଖାଯାଇଥିଲା । ବର୍ତ୍ତମାନ ଜିଲ୍ଲା ପ୍ରଶାସନ ପକ୍ଷରୁ ଆକ୍ରାନ୍ତଙ୍କ କଣ୍ଟାକ୍ଟ ଟ୍ରେସିଂ କରାଯାଉଥିବା ଜିଲ୍ଲାପାଳ ।  କେବଳ ଏତିକି ନୁହେଁ, ଜିଲ୍ଲାରେ ସମସ୍ତ ପ୍ରକାର ସତର୍କତାମୂଳକ ପଦକ୍ଷେପ ଗ୍ରହଣ କରାଯାଉଥିବା ସେ ସୂଚନା ଦେଇଛନ୍ତି । 

ନଜର ପକାନ୍ତୁ ରାଜ୍ୟ ଡ୍ୟାସବୋର୍ଡ ଉପରେ । ରାଜ୍ୟରେ ସର୍ବାଧିକ ପ୍ରଭାବିତ ହୋଇଛି ଗଞ୍ଜାମ । ଜିଲ୍ଲାରେ କୋରୋନା ଆକ୍ରାନ୍ତଙ୍କ ସଂଖ୍ୟା ୨୯୨ ରହିଛି । ଏମାନଙ୍କ ମଧ୍ୟରୁ ୩୦ ଜଣ ସୁସ୍ଥ ହୋଇସାରିଛନ୍ତି । ସେହିପରି ୩ ଜଣଙ୍କ ମୃତ୍ୟୁ ମଧ୍ୟ ହେଲାଣି । ଅନ୍ୟ ୨୫୯ ଜଣଙ୍କ ଚିକିତ୍ସା ଚାଲିଛି । ଅନ୍ୟପଟେ ବାଲେଶ୍ୱରରେ ୧୧୯, ଯାଜପୁରରେ ୧୨୧, ଖୋର୍ଦ୍ଧାରେ ୫୯, ଭଦ୍ରକରେ ୭୪, ସୁନ୍ଦରଗଡ଼ରେ ୨୭, ଅନୁଗୋଳରେ ୧୫, କେନ୍ଦ୍ରାପଡ଼ାରେ ୨୭ ଓ ମୟୂରଭଞ୍ଜରେ ୧୧ ଜଣ ଆକ୍ରାନ୍ତ ଚିହ୍ନଟ ହେଲେଣି । ଅନ୍ୟପଟେ ଜଗତସିଂହପୁର(୫), ପୁରୀ(୧୮), ବୌଦ୍ଧ(୪), କେନ୍ଦୁଝର(୮), କଟକ(୨୨), କଳାହାଣ୍ଡି(୨), ବଲାଙ୍ଗୀର(୪), ଝାରସୁଗୁଡ଼ା(୨), ନୟାଗଡ଼(୬), ଦେବଗଡ଼(୨), କୋରାପୁଟ(୧), ଢେଙ୍କାନାଳ(୧) ଓ ସମ୍ବଲପୁର(୧)ରୁ ମଧ୍ୟ କୋରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି ।