ପଛପଟୁ ଧକ୍କା ଦେଲା ଟ୍ରକ, ସାଇକେଲ ଆରୋହୀ ମୃତ

ଅଜୟ କୁମାର ନାଥ, ସମ୍ବଲପୁର: ସାଇକେଲ ଚାଳକଙ୍କୁ ଧକ୍କା ଦେଲା ଟ୍ରକ । ଘଟଣା ସ୍ଥଳରେ ହିଁ ସାଇକେଲ ଚାଳକଙ୍କ ମୃତ୍ୟୁ । ମୃତକ ଜଣକ ହେଉଛନ୍ତି ଖୁଣ୍ଟିଚକୁଳି ଗାଁର ପୂର୍ଣ୍ଣଚନ୍ଦ୍ର ପଣ୍ଡା । ଘଟଣା ସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । 

ମିଳିଥିବା ସୂଚନା ମୁତାବକ, ଆଜି ସକାଳୁ ସମ୍ବଲପୁର-ସୋନପୁର ୧୫ ନମ୍ବର ରାଜ୍ୟ ରାଜପଥ   ପାଟୁଆପାଲି ଛକ ନିକଟରେ ଏହି ଦୁର୍ଘଟଣା ଘଟିଛି । ଖବର ଅନୁଯାୟୀ, ମୃତକ ପୂର୍ଣଚନ୍ଦ୍ର ବତେମୁରା ସାପ୍ତାହିକ ହାଟକୁ ନିଜ ସାଇକେଲରେ ପରିବା କିଣିବା ପାଇଁ ଯାଉଥିଲେ । ତେବେ  ସୁବର୍ଣ୍ଣପୁର ପାର୍ଶ୍ୱରୁ ଆସୁଥିବା ଏକ ଟ୍ରକ ପଛପଟୁ ଧକ୍କା ଦେବାରୁ ଘଟଣା ସ୍ଥଳରେ ହିଁ ତାଙ୍କର ମୃତ୍ୟୁ ହୋଇଛି । 

ସେପଟେ ଘଟଣା ପରେ କିଛି ସମୟ ପାଇଁ ସେଠାରେ ଉତ୍ତେଜନା ଦେଖାଯାଇଥିଲା । ତେବେ ଧମା ପୋଲିସ  ପହଞ୍ଚି ଲୋକଙ୍କୁ ବୁଝାସୁଝା କରିବା ପରେ ସ୍ଥିତି ଶାନ୍ତ ପଡ଼ିଥିଲା । ଏବେ ମୃତଦେହ ବ୍ୟବଚ୍ଛେଦ ପାଇଁ ବୁର୍ଲା ପଠାଯାଇଛି । ପୋଲିସ ତଦନ୍ତ କରୁଛି ।