Michael Matheson:ଆଇପ୍ୟାଡରେ ଫୁଟବଲ ମ୍ୟାଚ୍ ଦେଖିଲେ ପୁଅ,ଗଲା ମନ୍ତ୍ରୀଙ୍କ ଚାକିରି

Michael Matheson:

ଭାରତରେ ମନ୍ତ୍ରୀ ମାନଙ୍କ ଭିଆଇପି ଜୀବନ କଥା କାହାକୁ ଅଛପା ନୁହେଁ। ମନ୍ତ୍ରୀ ଓ ନେତାଙ୍କ ବିରୋଧରେ ଦୁର୍ନୀତି ମାମଲା କିଛି ନୂଆ ନୁହେଁ। କିନ୍ତୁ ୟୁରୋପୀୟ ଦେଶ ସ୍କଟଲାଣ୍ଡରେ ଜଣେ ମନ୍ତ୍ରୀଙ୍କ ଏହି ବିଳାସପୂର୍ଣ୍ଣ ଜୀବନ ତାଙ୍କ ଚାକିରି ନେଇଛି । ପୁଅମାନଙ୍କର ସରକାରୀ ଫୋନ ଅପବ୍ୟବହାର ପାଇଁ  ବାପାଙ୍କୁ ନିଜ ପଦରୁ ଇସ୍ତଫା ଦେବାକୁ ପଡିଛି।  ମନ୍ତ୍ରୀଙ୍କ ଲମ୍ବାଚୌଡ଼ା ଫୋନବିଲକୁ ନେଇ ବିରୋଧୀ ଦଳ ଏମିତି ହଙ୍ଗାମା କରିଥିଲେ ଯେ, ଶେଷରେ ମନ୍ତ୍ରୀଙ୍କୁ ଇସ୍ତଫା ଦେବାକୁ ପଡିଥିଲା। ସ୍କଟଲାଣ୍ଡର ସ୍ୱାସ୍ଥ୍ୟମନ୍ତ୍ରୀ ମାଇକେଲ ମାଥେସନଙ୍କ ମୋବାଇଲ  ବିଲ୍ ଏତେ ଅଧିକ ଆସିଥିଲା ଯେ ଯିଏ ବିଲ ଦେଖିଲା ସିଏ କହିଲା ମନ୍ତ୍ରୀ ଫୋନରେ କଣ କରୁଥିଲେ ଯେ, ଏତେ ବଡ଼ ଲମ୍ବାଚୌଡ଼ା ବିଲ୍ ଆସିଛି। 0

ସ୍ୱାସ୍ଥ୍ୟ ମନ୍ତ୍ରୀ ମାଇକେଲ ମାଥେସନଙ୍କ ଅଫିସିଆଲ୍ ଆଇପ୍ୟାଡକୁ ପ୍ରାୟ ୧୩,୮୫୫ ଡଲାର ବା ୧୧.୫୦ ଲକ୍ଷ ଟଙ୍କା ବିଲ୍ ଆସିଥିଲା। ଏହି ବିଲ୍ ଡାଟା ରୋମିଂ ଚାର୍ଜ ଆକାରରେ ଆସିଥିଲା । ଯେତେବେଳେ ତାଙ୍କ ବିଲ୍ ର ପରିମାଣ ସାମ୍ନାକୁ ଆସିଲା, ସେତେବେଳେ ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ ଯେ ମନ୍ତ୍ରୀ ଡାଟା ରୋମିଂର ବ୍ୟବହାର ଏପରି କ'ଣ କଲେ ଯେ ବିଲ୍ ଏତେ ଭାରି ହୋଇଗଲା। ଗଣମାଧ୍ୟମରେ ଏହି ଖବର ଆସିବା ପରେ ବିରୋଧୀ ମାନେ ଏହି ପ୍ରସଙ୍ଗରେ ଜୋରଦାର ହୋହଲ୍ଲା କରିଥିଲେ। ୪ ସପ୍ତାହ ଧରି ଚାପର ସମ୍ମୁଖୀନ ହେବା ପରେ ଗୁରୁବାର ମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି।

ଏତେ ମୋଟା ବିଲ୍ ର କାରଣ କ'ଣ?

ଅଧିକ ଡାଟା ରୋମିଂ ବିଲ୍ ସେହି ସମୟର ଅଟେ ଯେତେବେଳେ ପୂର୍ବତନ ମନ୍ତ୍ରୀ ତାଙ୍କ ପରିବାର ସହିତ ଖ୍ରୀଷ୍ଟମାସ ଛୁଟିରେ ମୋରକ୍କୋରେ ଥିଲେ । ଏହି ଖର୍ଚ୍ଚ ଟିକସଦାତାଙ୍କ ଟଙ୍କାରୁ ଦେବାର ଥିଲା। ପରେ ମାଥେସନ୍ ନିଜେ ବିଲ୍ ପୈଠ କରିବେ ବୋଲି କହିଥିଲେ। ହେଲେ ଏହା ଘଟଣାକୁ ଶାନ୍ତ କରିପାରିନଥିଲା। ଏବେ ତାଙ୍କୁ ଏହି ପୂରା ଘଟଣାରେ ଇସ୍ତଫା ଦେବାକୁ ପଡ଼ିଛି। ସ୍କଟିଶ ସଂସଦରେ ଏକ ଭାବପ୍ରବଣ ବୟାନରେ ସେ ସ୍ୱୀକାର କରିଛନ୍ତି ଯେ ତାଙ୍କ କିଶୋର ପୁଅମାନେ ଫୁଟବଲ ମ୍ୟାଚ୍ ଦେଖିବା ପାଇଁ ଏହି ଉପକରଣ ବ୍ୟବହାର କରିଥିଲେ। ଫଳରେ 11 ହଜାର ପାଉଣ୍ଡ ରୁ ପ୍ରାୟ ୭ ହଜାର ପାଉଣ୍ଡର ବିଲ୍ କେବଳ ଜାନୁଆରୀ ୨, ୨୦୨୩ରେ  ଆସିଥିଲା।