Mock Drill: ଯୁଦ୍ଧ ସ୍ଥିତିରେ ସୁରକ୍ଷା ଚିନ୍ତା: ପ୍ରସ୍ତୁତି ବୈଠକ ଶେଷ, ଆସନ୍ତାକାଲି ବାଜିବ ସାଇରନ୍

Mock Drill: ଭୁବନେଶ୍ୱର: ଭାରତ ଓ ପାକିସ୍ତାନ ମଧ୍ୟରେ ଯୁଦ୍ଧକୁ ଆଶଙ୍କା କରି ରାଜ୍ୟମାନଙ୍କରେ ମକ ଡ୍ରିଲ କରିବାକୁ ଗୃହ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଥିଲା। ଏହି କ୍ରମରେ ଆସନ୍ତା କାଲି ଓଡ଼ିଶାରେ ୧୨ଟି ସ୍ଥାନରେ ମକଡ୍ରିଲ କରାଯିବ। ଏନେଇ ଅଗ୍ନିଶମ ଡିଜି ସୁଧାଂଶୁ ଷଡ଼ଙ୍ଗୀ ସୂଚନା ପ୍ରଦାନ କରିଛନ୍ତି। ଆସନ୍ତାକାଲି ବୁଧବାର ମଇ ୭ ତାରିଖ ଅପରାହ୍ଣରେ ଏହି ମକଡ୍ରିଲ କରାଯିବ। ଏହି ମକଡ୍ରିଲ ୧୨ଟି ସ୍ଥାନ ଯଥା ତାଳଚେର, ବାଲେଶ୍ୱର, କୋରାପୁଟ, ରାଜଧାନୀ ଭୁବନେଶ୍ୱର, ଗୋପାଳପୁର, ହିରାକୁତ, ପାରାଦୀପ, ରାଉରକେଲା, ଭଦ୍ରକ, ଢେଙ୍କାନାଳ, ଜଗତସିଂହପୁର, କେନ୍ଦ୍ରାପଡ଼ାରେ ଏହି ମକଡ୍ରିଲ କରାଯିବ ବୋଲି ଶ୍ରୀ ଷଡ଼ଙ୍ଗୀ ସୂଚନା ପ୍ରଦାନ କରିଛନ୍ତି। 

ଗୃହମନ୍ତ୍ରଣାଳୟ ପକ୍ଷରୁ ଜାରି କରାଯାଇଥିବା ସୂଚନା ଅନୁସାରେ ତାଳଚେରକୁ କ୍ୟାଟାଗୋରୀ ଏକରେ ରଖାଯାଇଛି। ସେହିପରି କ୍ୟାଟାଗୋରୀ ୨ରେ ବାଲେଶ୍ୱର, କୋରାପୁଟ, ଭୁବନେଶ୍ୱର, ଗୋପାଳପୁର, ହୀରାକୁଦ, ପାରାଦୀପ ଏବଂ ରାଉରକେଲା ସ୍ଥାନ ପାଇଥିବା ବେଳେ ଅବଶିଷ୍ଟ ସ୍ଥାନ କ୍ୟାଟାଗୋରୀ ୩ରେ ରହିଛନ୍ତି। ଅଗ୍ନିଶମ ଡିଜି ଶ୍ରୀ ଷଡ଼ଙ୍ଗୀ ଦେଇଥିବା ସୂଚନା ଅନୁସାରେ ଏକ ସପ୍ତାହେ ପର୍ଯ୍ୟନ୍ତ ଏହି ମକଡ୍ରିଲ ଚାଲିବ। ଏଥିରେ ସ୍ୱେଚ୍ଛାସେବୀ ସଂଗଠନ, ଆପଦାମିତ୍ର, ଏନସିସି କ୍ୟାଡେଟ ପ୍ରମୁଖ ସାମିଲ ହେବେ। ବୁଧବାର ଦିନ ଠିକ ୪ଟାରେ ସାଇରନ ବାଜିବ। ଉପକୂଳବର୍ତ୍ତୀ ଜିଲ୍ଲା ଓ ସହରାଞ୍ଚଳରେ ମକଡ୍ରିଲ କାର୍ଯ୍ୟକ୍ରମ ଆରମ୍ଭ ହେବ। ଏନେଇ ପ୍ରସ୍ତୁତି ବୈଠକ ମଧ୍ୟ ଶେଷ ହୋଇଥିବା ନେଇ ଶ୍ରୀ ଷଡ଼ଙ୍ଗୀ ସୂଚନା ଦେଇଛନ୍ତି। 

ଏଥିରେ ଭିସିରେ ମୁଖ୍ୟ ଶାସନ ସଚିବ ମନୋଜ ଆହୁଜା ଯୋଡ଼ି ହୋଇଥିଲେ। ଏଣେ ବରିଷ୍ଠ ଅଧିକାରୀ ସୁଧାଂଶୁ ଷଡ଼ଙ୍ଗୀ, ଆରକେ ଶର୍ମା  ଏବଂ ଗୃହ ସଚିବ ପ୍ରମୁଖ ବୈଠକରେ ଉପସ୍ଥିତ ରହିଥିଲେ। ଏମାନେ ମକ ଡ୍ରିଲ ପୂର୍ବରୁ ପ୍ରସ୍ତୁତି ନେଇ ସମୀକ୍ଷା କରିଛନ୍ତି। ତେଣେ ଆସନ୍ତାକାଲି ମକ୍ ଡ୍ରିଲ୍ ନେଇ ଗୃହ ବିଭାଗର ଗୁରୁତ୍ବପୂର୍ଣ୍ଣ ବୈଠକ ଅନୁଷ୍ଠିତ ହେବ। ଗୃହ ବିଭାଗ ସଚିବ, ଗୃହ ବିଭାଗ ଅତିରିକ୍ତ ସଚିବ ଓ ଅଗ୍ନିଶମ ଡିଜିଙ୍କ ଅନ୍ୟ ବରିଷ୍ଠ ଅଧିକାରୀ ଏଥିରେ ଯୋଗ ଦେବେ।