Election 2024: ଆସୁଛି ନିର୍ବାଚନ, ଜଗତସିଂହପୁରରେ ମାହୋଲ ସରଗରମ୍

(ପାରାଦୀପ ,ନାରାୟଣ ବେହେରା) Odisha News: ନିର୍ବାଚନ ଯେତିକି ଯେତିକି ପାଖେଇ ଆସୁଛି ନିର୍ବାଚନ ମଣ୍ଡଳୀରେ ସେତିକି ସେତିକି ରାଜନୈତିକ ଉଷ୍ମତା ବୃଦ୍ଧି ପାଇବାରେ ଲାଗିଛି । ଜଗତସିଂହପୁର ଜିଲ୍ଲା ନିର୍ବାଚନ ମଣ୍ଡଳୀ ''ବାଲିକୁଦା -ଏରସମା'' ରେ ବିଜେଡି ବ୍ୟାନର ରେ ଏକ ବିଶାଳ ସମାବେଶ ଦେଖିବାକୁ ମିଳିଛି। ''ବିଶାଳ ଏକତା ସମାବେଶ'' ନାମରେ ଏହି ନିର୍ବାଚନମଣ୍ଡଳୀ ର ଯୁବନେତା ସଂଜୀବ ବିଶ୍ଵାଳ ନିଜର ଶକ୍ତି ପ୍ରଦର୍ଶିତ କରିଥିବା ଦେଖିବାକୁ ମିଳିଛି। ବର୍ତ୍ତମାନର ଜଗତସିଂହପୁର ବିଧାୟକ ତଥା ବିଧାନସଭା ମୁଖ୍ୟ ସଚେତକ ପ୍ରଶାନ୍ତ ମୁଦୁଲି ପୂର୍ବରୁ ଏଠାରେ ବିଧାୟକ ଥିବାବେଳେ ବିଜେପିରୁ ଆସି ରଘୁନନ୍ଦନ ଦାସ ବିଜେଡି ପ୍ରାର୍ଥୀ ହୋଇ ଜିତିଲେ ଏବଂ ମନ୍ତ୍ରୀ ମଧ୍ଯ ହେଲେ । 

ହେଲେ ମନ୍ତ୍ରୀ ମଣ୍ଡଳରୁ ବାଦ ପଡିଥିବା ରଘୁନନ୍ଦନଙ୍କ ପୁତ୍ର ଆଦିତ୍ୟ ନନ୍ଦନ ଦାସ ଏବେ ନିର୍ବାଚନମଣ୍ଡଳୀ ରେ ଯୁବନେତା ହିସାବରେ ଉଭା ହୋଇଥିବା ବେଳେ ମୁଖ୍ୟମନ୍ତ୍ରୀ , ପାଣ୍ଡିଆନ ଓ ବିଜେଡି ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସ ଙ୍କ ସହ ଶଙ୍ଖ ଚିହ୍ନ ଥିବା ଏକ ବ୍ୟାନର ମାରି ସଭା କରିଛନ୍ତି ନବାଗତ ସଂଜୀବ ବିଶ୍ଵାଳ। ଯାହାକି ସ୍ଥାନୀୟ ଆମ୍ବଶାଳ ପଡିଆରେ ବାଲିକୁଦା ଓ ଏରସମା ବ୍ଳକ ର ପ୍ରାୟ ହଜାର ହଜାର ଲୋକ ଙ୍କୁ ଧରି ସେ ଏହି ସମାବେଶ କରି ନିଜର ଶକ୍ତି ଦେଖାଇବା ସହ ନବୀନ ଙ୍କ ହାତ ମୁଠାକୁ ଟାଣ କରିବା ପାଇଁ ସାଧାରଣ ଭୋଟର ମାନଙ୍କୁ ଆହ୍ଵାନ ଦେଇଛନ୍ତି। ସେହିପରି ଶାସକ ଦଳ ଏହି ନିର୍ବାଚନ ମଣ୍ଡଳୀରେ କ୍ଷମତା ରେ ଥିଲେ ମଧ୍ଯ ଯୋଜନା ସାଧାରଣ ଲୋକଙ୍କ ପାଖରେ ପହଁଚି ପାରିନାହିଁ ବୋଲି ସେ ଅଭିଯୋଗ କରିଛନ୍ତି । ତାଙ୍କୁ ସୁଯୋଗ ମିଳିଲେ ସେ ସମସ୍ତଙ୍କ ସେବା କରିବେ ବୋଲି ପ୍ରକାଶ କରିଛନ୍ତି।