 "Odisha News: ଶ୍ରୀକ୍ଷେତ୍ରରେ ବାଲିମାଫିଆଙ୍କ ରାଜ୍, ସମୟ ମାଗିଲେ ଏସପି")
)
Odisha News: ମାଡ଼ି ଆସିବ ସମୁଦ୍ରର ଉଦ୍ଦାମ ଜୁଆର। ଆଖି ଆଗରେ ବୁଡ଼ିଯିବ ସୁନ୍ଦର ଐତିହ୍ୟ ସଂପନ୍ନ ଶ୍ରୀକ୍ଷେତ୍ର। ନିଶ୍ଚିନ୍ନ ହୋଇଯିବ ଜନବସତି। ଏଭଳି କିଛି ଆଶଙ୍କା ସୃଷ୍ଟି କଲାଣି ମଙ୍ଗଳା ମୁହାଣ। ବାଲିମାଫିଆଙ୍କ ଲୋଲୁପ ଦୃଷ୍ଟି କାରଣରୁ ମଙ୍ଗଳା ମୁହାଣ ଖିନ୍ଭିନ୍ ହେବାରେ ଲାଗିଛି। ସମୁଦ୍ରକୁ ଲାଗି ରହିଥିବା ଏଠାର ବଡ଼ ବଡ଼ ବାଲିବନ୍ତକୁ ସବୁ ବାଲି ମାଫିଆମାନେ ତାଡ଼ିନେବା ପରେ ଏଭଳି ଉଦ୍ବେଗ ପ୍ରକାଶ ପାଇଲାଣି। ତଥାପି ନା ପ୍ରଶାସନର ଏଥିପ୍ରତି ନଜର ପଡ଼ୁଛି, ନା ବେଳାଭୂମିର ସୁରକ୍ଷା ମୁଣ୍ଡାଇଥିବା ତଥାକଥିତ ସ୍ବେଚ୍ଛାସେବୀମାନଙ୍କ। ସେପଟେ ଏଦିଗରେ ପୁଲିସ ଆଉ ପ୍ରଶାସନର ପଦକ୍ଷେପ ଶୂନ୍। ତେବେ ଅପରାଧ ରୋକିବା ଦିଗରେ କଡା ପଦକ୍ଷେପ ନେବାକୁ ସମୟ ମାଗିଲେ ନୂଆ ଏସପି।
ଧିରେଧିରେ ପୁରୀରେ ବଢୁଛି ବାଲିମାଫିଆଙ୍କ ରାଜ। ଖୋଲମ ଖୋଲା ମଙ୍ଗଳାମୁହାଁଣକୁ ଖୋଳି ତାଡି କରୁଛନ୍ତି ବାଲି ଚୋରାଚାଲାଣ। ଫଳରେ ବିପଦାନ୍ମୁଖି ହୋଇପଡୁଛି ମଙ୍ଗଳା ମୁହାଣ। ତେବେ ମଙ୍ଗଳା ମୁହାଣରେ ମଙ୍ଗଳା ନଈ ଓ ସମୁଦ୍ରର ମିଳନ ଘଟିଛି। ବର୍ଷା ଦିନରେ ଶ୍ରୀକ୍ଷେତ୍ର ଓ ଆଖପାଖ ଗ୍ରାମାଞ୍ଚଳର ବନ୍ୟା ଜଳ ଏହି ବାଟ ଦେଇ ସମୁଦ୍ରକୁ ନିଷ୍କାସିତ ହୋଇଥାଏ। ଏହି ମୁହାଣ ଶ୍ରୀକ୍ଷେତ୍ର ଓ ଏହାର ସହରତଳି ଅଞ୍ଚଳ ପାଇଁ ବରଦାନ କହିଲେ ଅତ୍ୟୁକ୍ତି ହେବନି। ଏହି ମୁହାଣ ଦୁଇପାର୍ଶ୍ବରେ ରହିଛି ବଡ଼ ବଡ଼ ବାଲିବନ୍ତ। ଯାହା ସମୁଦ୍ରର ଉଦ୍ଦାମ ଜୁଆରକୁ ଅଟକାଇବା ସହ ପ୍ରଳୟଙ୍କରୀ ବାତ୍ୟା ସମୟରେ ଶ୍ରୀକ୍ଷେତ୍ରକୁ ସୁରକ୍ଷା ଦେଇ ଆସୁଛି। ବାତ୍ୟାର ପ୍ରଖର ପବନ ସିଧାସଳଖ ବାଲିବନ୍ତରେ ମାଡ଼ ହେଉଥିବାରୁ ପବନର ଗତି କମି ଶ୍ରୀକ୍ଷେତ୍ର ଓ ଆଖପାଖ ଅଞ୍ଚଳ ସୁରକ୍ଷିତ ରହୁଛି। କିନ୍ତୁ ମଙ୍ଗଳା ନଈ ଅପରପାର୍ଶ୍ବରେ ଥିବା ସିପସରୁବାଲି ମୌଜାର ଏକ ଶ୍ମଶାନ ଯାହା ପୂର୍ବରୁ କୋଭିଡ୍ ଶ୍ମଶାନ ଭାବେ ବ୍ଯବହାର ହେଉଥିଲା ସେଥିରୁ ଏବେ ଚାଲିଛି ଅବାଧ ବାଲି ଚୋରା ଚାଲାଣ। ମଙ୍ଗଳା ମୁହାଣ ନିକଟରେ ଯେଉଁ ବାଲିବନ୍ତ ସମୁଦ୍ର କୂଳକୁ ଲାଗି ରହିଥିଲା, ସେ ସବୁ ନିଶ୍ଚିହ୍ନ ହେବାରେ ଲାଗିଛି। ଏଠାରେ ବାଲିବନ୍ତକୁ ସବୁ ତାଡ଼ି ଦିଆଯିବା ପରେ ବିରାଟ ବିରାଟ ଗର୍ତ୍ତ ସବୁ ସୃଷ୍ଟି ହେଉଛି।
କେଉଁଠି ୬୦ ଫୁଟ ଗର୍ତ୍ତ ତ’ କେଉଁଠି ୮୦ ଫୁଟ ଗର୍ତ୍ତ। ଆକାର ଦେଖିଲେ କେଉଁଠି ପ୍ରାୟ ଶହେ ଫୁଟ ଚଉଡ଼ାରେ ବାଲିକୁ ତାଡ଼ି ନିଆଯାଇଛି ତ’ କେଉଁଠି ଏହାଠାରୁ ଅଧିକ। ମଙ୍ଗଳା ମୁହାଣଠାରେ ଥିବା ଶ୍ମଶାନଠାରୁ ପ୍ରାୟ ୧ହଜାର ଫୁଟ ଲମ୍ବ ଓ ପ୍ରାୟ ୫୦ ଫୁଟ ଗଭୀରରେ କେହି ବାଲି ତାଡ଼ି ନେଇଛି, ଯାହା ଭୟଙ୍କର ଦୃଶ୍ୟମାନ ହେଉଛି। ସେପଟେ ଶ୍ମଶାନରୁ ଲମ୍ବିଥିବା କଂକ୍ରିଟ୍ ରାସ୍ତା କଡ଼ରେ କେହି ବାଲି ଖୋଳି ନେଇଯିବା ପରେ ଏହା ପୋଖରୀ ବି ପାଲଟିଗଲାଣି। ଏଭଳି ବାଲି ଚୋରି କରି ମଙ୍ଗଳାମୁହାଣ ପାଖ ଅଞ୍ଚଳରୁ ପ୍ରାୟ ୫୦ରୁ ଅଧିକ ବାଲିବନ୍ତକୁ ବାଲିମାଫିଆମାନେ ତାଡ଼ି ବାଲି ଚୋରି କରି ନେଇଗଲେଣି ବୋଲି ଅଭିଯୋଗ କରିଛନ୍ତି। ତେବେ ବାଲିବନ୍ତରୁ ଅବାଧରେ ବାଲି ଚୋରା ଚାଲାଣ ହେଉଥିଲେ ମଧ୍ୟ ପ୍ରଶାସନ ଓ ପୁଲିସ ପ୍ରଶାସନ ପାଲଟିଛି ନିରବ ଦ୍ରଷ୍ଟା। ବାରମ୍ବାର ଅଭିଯୋଗ ହେଉଥିଲେ ବି କାର୍ଯ୍ଯାନୁଷ୍ଠାନ ଶୂନ ବୋଲି ଉଦବେଗ ପ୍ରକାଶ ପାଇଛି। ଫଳରେ ଧିରେଧିରେ ବାଲିବନ୍ତ ଗୁଡିକ ନିଶ୍ଚିନ୍ନ ହୋଇଯିବ।
ତେବେ ଏଥିପ୍ରତି ରାଜସ୍ବ ବିଭାଗ କି ପ୍ରଶାସନର ବଡ଼ ବଡ଼ ଅଧିକାରୀମାନଙ୍କର ନଜର ନ ପଡ଼ିବା ଦୁର୍ଭାଗ୍ୟଜନକ ବୋଲି ସ୍ଥାନୀୟ ଲୋକେ ଅଭିଯୋଗ କରୁଛନ୍ତି। ସେପଟେ ଏଭଳି ଅଭିଯୋଗ ଆଣିଲେ ମାଫିଆଙ୍କ ଦ୍ୱାରା ମୁଣ୍ଡ ଗଡିବାର ଧମକ ରହୁଛି। ପ୍ରତିଦିନ ଏଠାରେ ବଡ଼ ବଡ଼ ଜେସିବି, ଟ୍ରକ, ଟ୍ରାକ୍ଟର ଲାଗି ଅବାଧ ବାଲି ବୁହା ଚାଲିଛି। ରାତିରେ ଖୁଲମଖୁଲା ଲାଇଟ୍ ଲଗାଇ ବାଲି ଚୋରି ଚାଲିଛି। ଏହା ନିଶ୍ଚିତ ପ୍ରଶାସନିକ ଅଧିକାରୀଙ୍କ ଜାଣତରେ ଚାଲିଥିବ ବୋଲି ଅଞ୍ଚଳବାସୀ ଅଭିଯୋଗ କରିଛନ୍ତି। ସେପଟେ ଅପରାଧ ରୋକିବା ଦିଗରେ କଡା ପଦକ୍ଷେପ ନେବାକୁ ସମୟ ମାଗିଲେ ନୂଆ ଏସପି।ସେପଟେ ବାଲି ଚୋରାଚାଲାଣ ରୋକିବା ପାଇଁ ପ୍ରଶାସନ ଓ ପୁଲିସ ପ୍ରଶାସନ ପକ୍ଷରୁ ଏକ ମିଳିତ ସ୍ୱତନ୍ତ୍ର ସ୍କାଡ ଗଠନ କରାଯାଇଛି। ହେଲେ ଏହା କାହିଁକି ସମ୍ପୂର୍ଣ୍ଣ ସ୍ଥାଣୁ ପାଲଟି ଯାଇଛି ତାହା ଉପରେ ଉଠିଛି ପ୍ରଶ୍ନ।
