Odisha News: କନ୍ଧମାଳରେ ପୁଣି ଜଣେ ମାଓବାଦୀ ନିହତ

Odisha News: କନ୍ଧମାଳ ପୋଲିସକୁ ବଡ଼ ସଫଳତା।  କନ୍ଧମାଳ ଜିଲ୍ଲାରେ ପୋଲିସ ଓ ମାଓବାଦୀ ମଧ୍ୟରେ ଗୁଳି ବିନିମୟ ହୋଇଛି। ଏହି ଗୁଳିବିନିମୟରେ ଜଣେ ମାଓବାଦୀ ନିହତ ହୋଇଥିବା (Maoist killed in Kandhamal) ଜଣାପଡିଛି। ଏନେଇ ଜିଲ୍ଲା ଏସପି ସୂଚାନ ଦେଇଛନ୍ତି ।ସୂଚନା ଅନୁଯାୟୀ,  ଗତକାଲି(ରବିବାର) ପୋଲିସ ଓ ମାଓବାଦୀ ମଧ୍ୟରେ ଗୁଳି ବିନିମୟ ହୋଇଥିଲା।  ଏପରିକି, ମାଓବାଦୀଙ୍କ ପକ୍ଷରୁ ପ୍ରଥମେ ପୋଲିସ୍ ଉପରକୁ ଗୁଳି ଚାଳନା କରାଯାଇଥି୍ଲା।  ଗୁଳିଚାଳନା ବେଳେ ଏଥିରେ ଜଣେ ଡିଭିଏଫ୍ ଯବାନ୍ ଗୁରୁତର ଆହତ ହୋଇଛନ୍ତି। ଆହତ ଯବାନଙ୍କ ନାମ ଜିତେନ୍ଦ୍ର ନାୟକ। ଏବଂ ତାଙ୍କ ବାମ ହାତରେ ଗୁଳି ବାଜିଛି। ତାଙ୍କୁ ପ୍ରଥମେ ବାଲିଗୁଡ଼ା ମେଡିକାଲରେ ଭର୍ତ୍ତି କରାଯାଇଥିଲା କିନ୍ତୁ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ପରେ ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଛି।

 ଅନ୍ୟପଟେ ପୋଲିସର ପାଲଟା ଗୁଳି ବର୍ଷାରେ ମାଓବାଦୀଙ୍କ ମୃତ୍ୟୁ ହୋଇଥିଲା। ତେବେ, ଏଠି ଆମେ ଆପଣଙ୍କୁ ସୂଚନା ଦେବାକୁ ଚାହିଁବୁ ଯେ, ରବିବାର ସକାଳେ କନ୍ଧମାଳ ଏସ୍‌ପିଙ୍କୁ କମ୍ବେରିକିଆ ଜଙ୍ଗଲରେ କେକେବିଏନ୍‌ ମାଓବାଦୀଙ୍କ ଏକ କ୍ୟାମ୍ପ ଚାଲୁଥିବା ସୂଚନା ମିଳିବା ପରେ ସମ୍ପୃକ୍ତ ଅଞ୍ଚଳରେ ତଲାସି ଅଭିଯାନ ଆରମ୍ଭ ହୋଇଥିଲା। ଅଭିଯାନ ପରେ ମାଓବାଦୀ ଛତ୍ରଭଙ୍ଗ ଦେଇଥିବା ବେଳେ ସେମାନଙ୍କ ଆକ୍ରମଣରେ ଯବାନ ଜଣକ ଆହତ ହୋଇଥିଲେ।ବାଲିଗୁଡ଼ା ଥାନା ଅନ୍ତର୍ଗତ ବାରଖମା ନିକଟସ୍ଥ କାମ୍ବେରିକିଆ ଜଙ୍ଗଲରେ ସୁରକ୍ଷା କର୍ମୀ ଓ ମାଓବାଦୀ ମୁହାଁମୁହିଁ ହେବା ପରେ ଜଣେ ମାଓବାଦୀ ନିହତ ହୋଇଥିବାର ଖବର ମିଳିଛି। ଏଠାରେ ମାଓ ଶିବିର ଧ୍ବଂସ ହୋଇଛି ବୋଲି  କନ୍ଧମାଳ ଏସପି ଶୁଭେନ୍ଦୁ କୁମାର ପାତ୍ର କହିଛନ୍ତି।