Odisha News: ତାଳସାରୀ IICଙ୍କୁ ଦୋକାନ ଘରେ ବନ୍ଦ କରି ରଖିବା ଘଟଣା, ୧୫ ଜଣଙ୍କୁ...

Odisha News: ଥାନା ଆଇଆଇସିଙ୍କୁ ଦୋକାନ ଘରେ ବନ୍ଦ କରି ନିର୍ଯ୍ୟାତନା। ଏଭଳି ସଙ୍ଗୀନ୍ ଅଭିଯୋଗ ଆସିଛି ବାଲେଶ୍ବର ଜିଲ୍ଲା ଭୋଗରାଇର ତାଳସାରୀ ଥାନା ଅଞ୍ଚଳରୁ । ଯାହା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ସବୁଠୁ ବଡ଼ କଥା ହେଉଛି  ଦୋକାନ ଘରେ ବନ୍ଦ ହୋଇଥିବା ଥାନା ଆଇଆଇସି ଜଣେ ପୁରୁଷ ଅଧିକାରୀ ନୁହେଁ ଜଣେ ମହିଳା ଅଧିକାରିଣୀ । ସେ ହେଉଛନ୍ତି ସାମୁଦ୍ରିକ ଥାନା ଅଧୀକାରିଣୀ ଚମ୍ପାବତୀ ସୋରେନ୍। ଥାନା ଅଧୀକାରିଣୀ ଦୋକାନ ଘରେ ବନ୍ଦ ଥିବା ଖବର ପାଇ  ଘଟଣାସ୍ଥଳରେ ପୋଲିସ୍ ପହଞ୍ଚି ତାଙ୍କୁ ଉଦ୍ଧାର କରିଛି । କିଭଳି ପରିସ୍ଥିତିରେ ଏହି ଘଟଣା ଘଟିଲା ସେନେଇ ପୋଲିସ୍ ଛାନଭିନ୍ ଆରମ୍ଭ କରିଛି।

ସୂଚନା ଅନୁଯାୟୀ, ଗତକାଲି ରାତିରେ ଉଦୟପୁର ଗାଁରେ ଥିବା ଏକ ଦୋକାନରେ ଜୁଆ ଖେଳ ଚାଲିଥିବା ତାଳସାରୀ ସାମୁଦ୍ରିକ ଥାନା ଆଇଆଇସି ଚମ୍ପାବତୀ ସୋରେନ କୌଣସି ସୂତ୍ରରୁ ଖବର ପାଇଥିଲେ। ପରେ ଡ୍ରାଇଭରକୁ ନେଇ ଘଟଣାସ୍ଥଳରେ ପହଞ୍ଚିଥିଲେ। ଏତେ ରାତିରେ ଏଠି କ’ଣ ହେଉଛି, ଶୀଘ୍ର ଦୋକାନ ବନ୍ଦ କର ବୋଲି ଜୁଆଡ଼ି ମାନଙ୍କୁ କହିଥିଲେ। ଏହି କଥାକୁ ନେଇ ଆଇଆଇସି ଓ ଜୁଆଡିଙ୍କ ମଧ୍ୟରେ ବଚସା ହେବା ସହ ଠେଲାପେଲା ହୋଇଥିଲା। ପରେ ଜୁଆଡ଼ିମାନେ ଆଇଆଇସିଙ୍କୁ ଦୋକାନ ଭିତରେ ପୂରାଇ ବନ୍ଦ କରିଦେଇଥିଲେ।

କିନ୍ତୁ ସେମାନଙ୍କୁ ଥାନାର ଗାଡି ଚାଳକ ସୁଧାଂଶୁ ମହାନ୍ତି ବିରୋଧ କରିଥିଲେ । କିନ୍ତୁ  ଦୁବୃର୍ତ୍ତମାନେ ତାଙ୍କୁ ମାଡ ମାରିବା ସହ ଗାଳି ବି ଦେଇଥିଲେ। ପରେ ଉପାୟଶୂନ୍ୟ ହୋଇପଡିଥିଲେ ଚମ୍ପାବତୀ।  ପରେ ଖବର ପାଇ ଚନ୍ଦନେଶ୍ବର ଫାଣ୍ଡି ଓ ଭୋଗରାଇ ଥାନାର ପୋଲିସ ପହଞ୍ଚି ଥିଲେ। ଏବଂ ତାଙ୍କୁ ଦୋକାନ ଘରୁ ଉଦ୍ଧାର କରିଥିଲେ। ପୋଲିସ୍ ଏହି ଘଟଣାରେ ୧୫ ଜଣଙ୍କୁ ଥାନାରେ ଅଟକ ରଖିବା ସହ ତଦନ୍ତ ଚଳାଇଛି। ଏବଂ ବିଶୃଙ୍ଖଳା ପରିସ୍ଥିତି ନ ଘଟିବା ପାଇଁ ଗାଁରେ ପୋଲିସ୍ ଫୋର୍ସ ମୃତୟନ କରାଯାଇଛି।  ପୋଲିସ୍ ଭୟରେ କିଛି ଲୋକ ଗାଁ ଛାଡି ଦେଇଛନ୍ତି। ତେବେ, ଏଠି ପ୍ରଶ୍ନ ଉଠୁଛି , ଯଦି ମହିଳା ଥାନା ଅଧିକାରିଣୀ ଏଠାରେ ସୁରକ୍ଷିତ ନୁହେଁ, ତେବେ, କିଭଳି ଜଣେ ସାଧାରଣ ଝିଅ ବା ମହିଳା ରାତିରେ ବାହାରକୁ ଯିବା କେତେ ସୁରକ୍ଷିତ?