 "Odisha News: ଗାଧୋଇବା ବେଳେ ଅଘଟଣ , ବିଦ୍ୟୁତ୍ ତାର ସଂସ୍ପର୍ଶରେ ଆସି ପୁତୁରା ମୃତ, ମାଉସୀ ଗୁରୁତର")
Odisha News: ଗାଧୋଇବା ବେଳେ ଘଟିଲା ବଡ଼ ଅଘଟଣ ! ବିଦ୍ୟୁତ୍ ତାର ସଂସ୍ପର୍ଶରେ ଆସି ପୁତୁରାର ମୃତ୍ୟୁ ହୋଇଥିବା ବେଳେ ମାଉସୀ ଗୁରୁତର ହୋଇଛି । ଏଭଳି ଅଭାବନୀୟ ଘଟଣା ଘଟିଛି ଗଜପତି ଜିଲ୍ଲା ଆର୍ ଉଦୟଗିରି ବ୍ଳକ କାଟମପଡ଼ା ଗାଁରେ । ମୃତକ ହେଲେ ରଣ୍ଡିବା ଗ୍ରାମ ପଞ୍ଚାୟତ ଅନ୍ତର୍ଗତ ବାମନପଡା ଗ୍ରାମର ତ୍ରିଲୋଚନ ବେହେର ଦଳାଇ (୨୩) ।
ମିଳିଥିବା ସୂଚନା ଅନୁଯାୟୀ ତ୍ରିଲୋଚନ ନିଜ ମାମୁଁ ଘର ଗ୍ରାମ କାଟମପଡା ଗ୍ରାମରେ ରହି ପାଠ ପଢ଼ୁଥିଲେ । ତେବେ ଆଜି ଅପରାହ୍ନ ସମୟରେ ଗ୍ରାମ ନିକଟସ୍ଥ ଏକ ନାଳ କୁ ତ୍ରିଲୋଚନ ବେହେର୍ଦଳାଇ ଗାଧୋଇବାକୁ ଯାଇଥିଲେ । ହେଲେ ଦୁର୍ଭାଗ୍ୟବଶତଃ ନାଳ ନିକଟରେ ଗଢ଼ିଉଠିଥିବା ଇଟାଭାଟିକୁ ପାଇପ ଯୋଗେ ଯୋଗାଣ କରାଯାଉଥିବା ବିଦ୍ୟୁତ୍ ତାର ସଂସ୍ପର୍ଶରେ ଆସିଯାଇଥିଲେ ତ୍ରିଲୋଚନ। ଫଳରେ ଘଟଣାସ୍ଥଳରେ ସେ ଅଚେତ ଅବସ୍ତାରେ ପଡିରହିଥିଲେ । ତେବେ ତ୍ରିଲୋଚନ ଘରକୁ ଫେରିବାରେ ଡେରି ହେବାରୁ ନାଳକୁ ଯାଇ ଦେଖିଥିଲେ ମାଉସୀ ଯମୁନା କାର୍ଯୀ ।
ସେଠାରେ ସେ ଅଚେତ ଅବସ୍ତାରେ ପଡ଼ିଥିବା ଦେଖି ମାଉସୀ ତାଙ୍କୁ ଉଠାଇବାକୁ ଚେଷ୍ଟା କରିବାରୁ ସେ ମଧ୍ୟ ବିଦ୍ୟୁତ୍ ଆଘାତ ପାଇ ଆହତ ହୋଇଥିଲେ । ପରେ ଘଟଣାସ୍ଥଳରେ ଗ୍ରାମବାସୀ ପହଞ୍ଚି ଉଭୟଙ୍କୁ ଉଦ୍ଧାର କରି ଚନ୍ଦ୍ରଗିରି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର କୁ ଚିକିତ୍ସା ପାଇଁ ଆଣିଥିଲେ । ହେଲେ ତ୍ରିଲୋଚନଙ୍କୁ ଡାକ୍ତର ମୃତ ଘୋଷଣା କରିଥିବା ବେଳେ ଆହତ ମାଉସି ଯମୁନାର ଚିକିତ୍ସା ଜାରି ରହିଥିବା କହିଛନ୍ତି ଡାକ୍ତର ଜୟ ପ୍ରକାଶ । ଚନ୍ଦ୍ରଗିରି ମେଡିକାଲରେ ଆର୍ ଉଦୟଗିରି ପୋଲିସ୍ ପହଞ୍ଚି ମୃତଦେହକୁ ଜବତ କରିବା ସହ ଅଧିକା ତଦନ୍ତ ଚଳାଇଥିବା ଜଣାପଡ଼ିଛି ।
)