 "Crime: ସରପଞ୍ଚଙ୍କ ଜାଲ ଦସ୍ତଖତ କରି ୧ କୋଟି ୩୭ ଲକ୍ଷ ଟଙ୍କା ହେରଫେର କରିଥିବା ପିଇଓ ଗିରଫ...")
)
Crime: (ପ୍ରେମାନନ୍ଦ ପୁଜାରୀ) ଚଞ୍ଚକତା କରି ୧ କୋଟି ୩୭ ଲକ୍ଷ ଟଙ୍କା ହେରଫେର କରିଥିବା ଜଣେ ପଞ୍ଚାୟତ ନିର୍ବାହୀ ଅଧିକାରୀ (ପିଇଓ)ଙ୍କୁ ଗଞ୍ଜାମ ଜିଲ୍ଲା ଗୋଳନ୍ଥରା ପୁଲିସ ଗିରଫ କରି କୋର୍ଟ ଚାଲାଣ କରିଛି । ଅଭିଯୁକ୍ତ ଜଣକ ହେଲେ, ଆସିକା ଥାନା ଗଙ୍ଗାପୁର ଗ୍ରାମର ସମୀର କୁମାର ମିଶ୍ର (୨୯)। କେସ୍ ନମ୍ବର ୨୨୨/୨୫ରେ ମାମଲା ରୁଜୁ ସହ ସମୀରଙ୍କୁ କୋର୍ଟ ଚାଲାଣ କରାଯାଇଥିବା ବ୍ରହ୍ମପୁର ଏସ୍ପି ଡା. ଶରବଣା ବିବେକ ଏମ୍ ସୂଚନା ଦେଇଛନ୍ତି। ତାଙ୍କ ପାଖରୁ ଦୁଇଟି ଦାମି ମୋବାଇଲ୍ ଫୋନ୍ ଓ ଗୋଟିଏ ଏଟିଏମ୍ କାର୍ଡ଼ ଜବତ ହୋଇଛି।
ତେବେ ପିଇଓ କୋଟିଏରୁ ଉର୍ଦ୍ଧ୍ବ ଟଙ୍କା ଚାଞ୍ଚକତା ସହ ଠକି ହଡ଼ପ କରିବା ଅବା ଆତ୍ମସାତ କରିବା ଘଟଣା ପଛରେ କଣ କାରଣ ରହିଛି ସମସ୍ତଙ୍କୁ ବିସ୍ମିତ କରିଛି। ପୋଲିସ ପକ୍ଷରୁ ମିଳିଥିବା ସୂଚନା ଅନୁସାରେ , ସମୀର ୨୦୧୯ ମସିହା ରୁ ଗଞ୍ଜାମ ଜିଲ୍ଲା ରଙ୍ଗେଇଲୁଣ୍ଡା ବ୍ଲକ୍ ଅନ୍ତର୍ଗତ କେଲୁଆପଲ୍ଲୀ ଗ୍ରାମ ପଞ୍ଚାୟତରେ ପିଇଓ ଭାବେ କାର୍ଯ୍ୟରତ ଥିଲେ । ପଞ୍ଚାୟତର ବିଭିନ୍ନ ସରକାରୀ ଯୋଜନାରେ ଆସୁଥିବା ସମସ୍ତ ଆର୍ଥିକ କାରବାର ଦାୟିତ୍ଵ ସମ୍ଭାଳୁ ଥିବାରୁ ତାଙ୍କ ପାଖରେ ପଞ୍ଚାୟତର ଚେକ୍ବୁକ୍ ଓ କ୍ୟାସ୍ବୁକ୍ ସହିତ ଅନ୍ୟ କାଗଜପତ୍ର ରହୁଥିଲା। ଯେକୌଣସି କାମ ପାଇଁ ଟଙ୍କା ଉଠାଣ ହେଲେ, ସେଥିରେ ସରପଞ୍ଚ ଓ ପିଇଓଙ୍କ ଦସ୍ତଖତ ରହୁଥିଲା। କିନ୍ତୁ ସମୀର ଏହା ମଧ୍ୟରେ ସରକାରୀ ଅର୍ଥ ହେରଫେର କରିବା ଆରମ୍ଭ କରିଦେଇଥିଲେ। ଏଥିପାଇଁ ସେ ଚତୁରତାର ସହ ବିଭିନ୍ନ ସମୟରେ ଚେକ୍ରେ ସରପଞ୍ଚଙ୍କ ଜାଲ୍ ଦସ୍ତଖତ କରି ବ୍ୟାଙ୍କରୁ ଟଙ୍କା ଉଠାଉଥିଲେ। ସରପଞ୍ଚଙ୍କ ଅଜାଣତରେ ଏହି ସବୁ ବେଆଇନ କାରବାର ଚାଲିଥିଲା ଏଭଳି ଭାବେ ସମୀର ତୁଳୁସ୍ଥିତ ୟୁନିଅନ ବ୍ୟାଙ୍କ୍ ଶାଖାରେ ଥିବା ପଞ୍ଚାୟତର ଆକାଉଣ୍ଟ୍ରୁ ପ୍ରାୟ ୧ କୋଟି ୩୭ ଲକ୍ଷ ଟଙ୍କା ଉଠାଇ ନେଇଥିବା ଜଣାପଡ଼ିବା ପରେ ବିଭାଗୀୟ ତଦନ୍ତ ଆରମ୍ଭ ହୋଇଥିଲା।
ଏହା ପରେ ନୂତନ ଭାବେ ସୁଶାନ୍ତ କୁମାର ପଟ୍ଟନାୟକଙ୍କୁ କେଲୁଆପଲ୍ଲୀ ପିଇଓ ଦାୟିତ୍ଵ ଦିଆଯାଇଥିଲା। ତାଙ୍କୁ ମଧ୍ୟ ସମୀର ପଞ୍ଚାୟତର ଏକ ନକଲି ପାସ୍ବୁକ୍ ଦେଇଥିଲେ। ୨୦୨୩-୨୪ ଆର୍ଥିକ ବର୍ଷର ଅଡିଟ୍ ପରେ ସମୀର ଟଙ୍କା ଆତ୍ମସାତ୍ କରିଥିବା ନେଇ ସ୍ପଷ୍ଟ ହୋଇଥିଲା। ଏଣୁ ରଙ୍ଗେଇଲୁଣ୍ଡା ବିଡିଓ ବିଶ୍ବଜିତ ରାୟ ଏନେଇ ଗୋଳନ୍ତରା ଥାନାରେ ଅଭିଯୋଗ କରିଥିଲେ। ତଦନ୍ତ ପରେ ପୁଲିସ ସମୀରଙ୍କୁ ଗିରଫ କରି କୋର୍ଟ ଚାଲାଣ କରିଛି। ତେବେ ସମୀର ଏତେ ପରିମାଣର ଟଙ୍କା କେଉଁଠି ବିନିଯୋଗ କରିଛନ୍ତି, ତାହା ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇ ନାହିଁ। ଏଦିଗରେ ଅଧିକ ତଦନ୍ତ ଜାରି ରହିଥିବା ଗୋଳନ୍ଥରା ଥାନାଧିକାରୀ ବିବେକାନନ୍ଦ ସ୍ଵାଇଁ ସୂଚନା ଦେଇଛନ୍ତି।
